រដ្ឋាភិបាលចំណាយថវិកាជាង ៥៦០ លានដុល្លារ ឧបត្ថម្ភពលរដ្ឋក្រីក្រ ក្នុងអំឡុងវិបត្តិកូវីដ-១៩

រហូតមកដល់ពេលនេះ រាជរដ្ឋាភិបាលបានចំណាយថវិកាប្រមាណ ៥៦២ លានដុល្លារ ជួយឧបត្ថម្ភដល់ប្រជាពលរដ្ឋក្រីក្រ និងងាយរងគ្រោះ ក្នុងអំឡុងពេលនៃការាតត្បាតជំងឺកូវីដ-១៩ ដើម្បីចូលរួមដោះស្រាយជីវភាពរបស់ប្រជាពលរដ្ឋឱ្យបានល្អប្រសើរ។

ថ្លែងក្នុងពិធីបើកសន្និបាតបូកសរុបការងាររបស់ក្រសួងសង្គមកិច្ច នៅថ្ងៃទី០៨ ខែកុម្ភៈនេះ លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជុន និងយុវនីតិសម្បទា បានមានប្រសាសន៍ថា ចាប់តាំងពីខែមិថុនា ឆ្នាំ២០២០ រហូតមកដល់បច្ចុប្បន្ន រាជរដ្ឋាភិបាលបានបញ្ចេញថវិកាដើម្បីឧបត្ថម្ភដល់ប្រជាពលរដ្ឋក្រីក្រ និងងាយរងគ្រោះ ក្នុងអំឡុងពេលនៃការាតត្បាតជំងឺកូវីដ-១៩ ជាង ៧០ ម៉ឺនគ្រួសារ ដោយចំណាយអស់ប្រមាណ ៥៦២ លានដុល្លារអាមេរិក។

លោករដ្ឋមន្ត្រីបានបន្តថា ក្នុងអំឡុងពេលប្រយុទ្ធនឹងជំងឺកូវីដ-១៩នេះ ក្រសួងបានបំពេញការងារលើកម្មវិធីឧបត្ថម្ភសាច់ប្រាក់ជូនស្រ្តីមានផ្ទៃពោះ និងកុមារអាយុ ក្រោម ២ឆ្នាំ ដោយមកទល់ពេលនេះ បានផ្តល់សេវាដល់ស្ត្រីមានផ្ទៃពោះ និងកុមារបានប្រមាណ ២៥ ម៉ឺននាក់ និងចំណាយថវិការដ្ឋសរុបប្រមាណជាង ១៧ លានដុល្លារអាមេរិក ហើយកម្មវិធីនេះជាកម្មវិធីជំនួយសង្គមមានលក្ខណៈអចិន្ត្រៃយ៍។

លោក វង សូត បានបញ្ជាក់ថា ក្រសួងបានអនុវត្តគោលនយោបាយ កម្មវិធីជាតិពាក់ព័ន្ធវិស័យសង្គមកិច្ច សំដៅបង្កើតនូវសេវាសាធារណៈ ដើម្បីជួយដល់ជនរងគ្រោះ និងក្រុមជនងាយរងគ្រោះក្នុងសង្គម និងការបង្កើតរបបសន្តិសុខសង្គមសម្រាប់អតីតមន្ត្រីរាជការស៊ីវិល អតីតយុទ្ធជន និងការជួយសង្គ្រោះដល់ប្រជាពលរដ្ឋ ជាដើម។

គួរបញ្ជាក់ថា រាជរដ្ឋាភិបាល បានដាក់ចេញនូវកម្មវិធីឧត្ថមសាច់ប្រាក់ដល់គ្រួសារក្រីក្រ និងងាយរងគ្រោះ ក្នុងអំឡុងប្រយុទ្ធនឹជំងឺកូវីដ-១៩ ដែលត្រូវបានអនុវត្តតាំងពីថ្ងៃទី២៤ ខែមិថុនា ឆ្នាំ២០២០ ដើម្បីឆ្លើយតមនឹងសភាពការណ៍ជាក់ស្តែង និងចូលរួមដោះស្រាយជីវភាពរបស់ប្រជាពលរដ្ឋដែលបានទទួលរងផលប៉ះពាល់ដោយសារជំងឺកូវីដ-១៩។ ដោយឡែក សម្រាប់កម្មវិធីឧបត្ថម្ភសាច់ប្រាក់ជូនស្រ្តីមានផ្ទៃពោះ និងកុមារអាយុក្រោម ២ឆ្នាំ ត្រូវបានរដ្ឋាភិបាលដាក់ឱ្យអនុវត្តចាប់តាំងពីខែមិថុនា ឆ្នាំ២០១៩៕

អត្ថបទ៖ សំអឿន