ឧកញ៉ា តែ តាំងប៉៖ ការហូរចូលទំនិញបរទេស​​ច្រើនលើសលប់ ប៉ះពាល់ដល់វិស័យ SME ក្នុងស្រុក

វិស័យសហគ្រាសធុនតូច និងមធ្យម (SME) នៅកម្ពុជា ដើមឆ្នាំ ២០២២នេះ នៅតែជួបបញ្ហាប្រឈមការប្រកួតប្រជែងទីផ្សារ ខណៈការហូរចូលទំនិញពីក្រៅប្រទេសច្រើនលើសលប់ ធ្វើឲ្យប៉ះពាល់ដល់វិស័យ SME នៅក្នុងស្រុក។

លោកឧកញ៉ា តែ តាំងប៉ ប្រធាន​សម្ព័ន្ធ​សមាគម​សហគ្រាស​ធុនតូច និង​មធ្យម​កម្ពុជា បានប្រាប់កម្ពុជាថ្មីថា ការបើកទូលាយឲ្យទំនិញពីក្រៅប្រទេសហូរចូលកម្ពុជា ច្រើនហួសពេក ធ្វើឲ្យលប់ទំនិញក្នុងស្រុក ពិបាកក្នុងការប្រកួតប្រជែង។ លោកបានលើកឡើងថា រដ្ឋាភិបាល គួរតែរិតបន្តឹងការនាំចូលទំនិញពីក្រៅប្រទេស ដើម្បីថែរក្សាផលិតផលនៅក្នុងស្រុក។ លោកឧកញ៉ាបន្តថា «យើងលក់ម៉េចឈ្នះគេ បើទំនិញគេចូលពេញស្រុកហើយ បើសិនជាយើងចេះការពារ ប្រជាជនជាង ១៦លាននាក់ ផលិតបានយើងលក់ក្នុងស្រុកយើង ទោះយើងមិនធ្វើការនាំចេញ ក៏យើងទទួលបានផលល្អ»។

លោកថា សហគ្រាសធុនតូច និងមធ្យម នៅកម្ពុជា មិនចាំបាច់ផលិតដើម្បីនាំចេញ គឺផលិតលក់តែក្នុងស្រុកក៏វិស័យនេះរីកចម្រើន ព្រោះតម្រូវការក្នុងស្រុកសំខាន់ណាស់ ប៉ុន្តែបញ្ហាប្រឈម គឺការនាំចូលដ៏ច្រើនសន្ធឹកសន្ធាប់។

លោកឧកញ៉ាធ្លាប់បានលើកឡើងពីទិដ្ឋភាពជាក់ស្តែងអំពីពិធីបុណ្យទន្លេ និងបុណ្យសមុទ្រ គឺមានផលិតផលបរទេសយ៉ាងច្រើន ដាក់តាំងពិព័រណ៍លក់យ៉ាងគគ្រឹកគគ្រេងលក់ក្នុងតម្លៃធូរថ្លៃ ប្រជែងជាមួយផលិតផលក្នុងស្រុក។

ប្រធាន​សម្ព័ន្ធ​សមាគម​សហគ្រាស​ធុនតូច និង​មធ្យម​កម្ពុជា បានគូសបញ្ជាក់ថា ដើម្បីឲ្យវិស័យ SME កម្ពុជារីកចម្រើន រាជរដ្ឋាភិបាល ត្រូវតែទប់ស្កាត់ទំនិញនាំចូលពីក្រៅប្រទេស និងចូលរួមបំផុសគំនិតពលរដ្ឋឲ្យជួយគាំទ្រទំនិញក្នុងស្រុក ដើម្បីជួយវិស័យ SME ងើបឡើងវិញបានលឿន ក្រោយវិបត្តិកូវីដ-១៩។

សហគ្រាសធុនតូច និងមធ្យម(SME) នៅកម្ពុជា មានប្រមាណជាង ៥៣ម៉ឺនសហគ្រាស កំពុងដំណើរការអាជីវកម្ម នៅក្នុងឆ្នាំ ២០២១។ លោកឧកញ៉ា បានឲ្យដឹងថា ក្នុងចំណោមសហគ្រាសជាង ៥៣ម៉ឺននេះ សហគ្រាសដែលបានចុះបញ្ជីមានតែជាង ៤ម៉ឺនសហគ្រាសប៉ុណ្ណោះ។

សូមបញ្ជាក់ថា រាជរដ្ឋាភិបាល បានត្រៀមកញ្ចប់ថវិកាប្រមាណ ២៥០លានដុល្លារ តាមរយៈធនាគារ SMEs Bank ដើម្បីជួយគាំទ្រសហគ្រាសធុនតូច និងមធ្យមនៅកម្ពុជា ក្នុងកម្រិតការប្រាក់ទាប នៅឆ្នាំ ២០២២៕

អត្ថបទ៖ ទួន សុផល