ប្រធានសភាកូរ៉េខាងត្បូង ស្នើសុំឲ្យសម្ដេចតេជោ បន្តគាំទ្រដល់ការស្វែងរកសន្តិភាព នៅឧបទ្វីបកូរ៉េ

លោក Park Byeong-Seung ប្រធានសភានៃសាធារណរដ្ឋកូរ៉េ បានអរគុណសម្ដេចតេជោនាយករដ្ឋមន្ត្រី ដែលបានចូលរួមចំណែកយ៉ាងសំខាន់ ក្នុងការកសាងសន្តិភាពនៅឧបទ្វីបកូរ៉េ តាមរយៈក្របខណ្ឌនៃអង្គការ UPF សម្ដេចបានដើរតួនាទីជាសហប្រធាន នៅក្នុងកិច្ចប្រជុំកំពូលពិភពលោកឆ្នាំ ២០២២ដែលរៀបចំដោយអង្គការUPF។

លោ​កប្រធានសភា បានស្នើសុំឲ្យសម្ដេចតេជោនាយករដ្ឋមន្ត្រី បន្តគាំទ្រដល់ការស្វែងរកសន្តិភាពនៅឧបទ្វីបកូរ៉េផងដែរ។ លោក Park Byeong-Seung ប្រធានសភានៃសាធារណរដ្ឋកូរ៉េ បានស្នើបែបនេះនៅក្នុងជំនួប ជាមួយសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នារសៀលថ្ងៃទី ១១ ខែកុម្ភៈ ២០២២នេះ នៅទីក្រុងសេអូល សាធារណរដ្ឋកូរ៉េ។

លោក កៅ គឹមហួន រដ្ឋមន្រ្តីប្រតិភូអមនាយករដ្ឋមន្រ្តីបា នមានប្រសាសន៍ឲ្យដឹងថា លោក Park Byeong​ Seung ប្រធានសភានៃសាធារណរដ្ឋកូរ៉េ បានអរគុណសម្ដេចតេជោនាយករដ្ឋមន្ត្រី ដែលបានចូលរួមចំណែកយ៉ាងសំខាន់ ក្នុងការកសាងសន្តិភាពនៅឧបទ្វីបកូរ៉េ តាមរយៈក្របខណ្ឌនៃអង្គការ UPF ដោយសម្ដេចបានដើរតួនាទីជាសហប្រធាន​​ នៅក្នុងកិច្ចប្រជុំកំពូលពិភពលោកឆ្នាំ ២០២២ ដែលរៀបចំដោយអង្គការUPF។

ជាមួយគ្នានេះលោក Park Byeong​ Seung បានស្នើសុំឲ្យសម្ដេចតេជោនាយករដ្ឋមន្ត្រី បន្តគាំទ្រដល់ការស្វែងរកសន្តិភាព នៅឧបទ្វីបកូរ៉េផងដែរ។ លោកបានមានប្រសាសន៍ទៀតថា លោកដឹងថា សម្តេចតេជោនាយករដ្ឋមន្ត្រី បានទៅទស្សនកិច្ចនៅប្រទេសមីយ៉ាន់ម៉ាកន្លងទៅនេះ,ហើយលោកសង្ឃឹមថាប្រេសិតពិសេស នៃប្រធានអាស៊ាននឹងទៅទស្សនកិច្ចមីយ៉ាន់ម៉ា នៅពេលខាងមុខ,ហើយកូរ៉េគាំទ្រតួនាទីរបស់អាស៊ាន ក្នុងការស្វែងរកដំណោះស្រាយ របស់ប្រទេស មីយ៉ាន់ម៉ា ហើយគាំទ្រដល់ផែនទីចង្អុលផ្លូវ ៥ចំណុចរបស់អាស៊ាននេះ។

ឆ្លើយតបទៅការស្នើសុំរបស់លោក Park Byeong​ Seung ប្រធានសភាជាតិកូរ៉េ ,សម្ដេចតេជោ បានគាំទ្រចំពោះការមានប្រសាសន៍ល្អៗ របស់លោកប្រធានសភាសាធារណរដ្ឋកូរ៉េ,សម្តេចតេជោបន្តថា យើង នឹងបន្តកសាងសន្តិភាពនៅឧបទ្វីបកូរ៉េ, សន្តិភាពមិនមែនសម្រាប់តែនៅកម្ពុជាទេ គឺសន្តិភាពត្រូវមាននៅក្នុងគ្រប់ប្រទេស ​ដែលនេះវាជាផ្នែកមួយនៃគោលនយោបាយការបរទេស របស់កម្ពុជាផងដែរ ។

សម្ដេចតេជោ ក៏បានបញ្ជាក់ផងដែរថា ជាកិត្តិយសសម្រាប់ប្រទេសកម្ពុជា ក៏ដូចសម្ដេចផងដែរ ដែលបានធ្វើ ជាសហប្រធាននៃកិច្ចប្រជុំកំពូលពិភពលោកឆ្នាំ ២០២២ សម្រាប់ការស្វែងរកសន្តិភាព នៅឧបទ្វីបកូរ៉េនេះ។ លោ ​កៅ គឹមហួន បានឲ្យដឹងទៀតថា នៅក្នុងជំនួបនោះមេដឹកនាំទាំងពី រក៏បានពិភាក្សាគ្នា ពាក់ព័ន្ធការពង្រឹងកិច្ចសហប្រតិបត្តិការ រវាងប្រទេសទាំងពីរលើវិស័យសេដ្ឋកិច្ច ពាណិជ្ជកម្ម និងវិនិយោគ​​ និងទំនាក់ទំនងនៃខួប ២៥ឆ្នាំ នៃការបង្កើតទំនាក់ទំនងការទូត រវាងប្រទេសទាំងពីរ។

នៅក្នុងជំនួបនោះ លោកប្រធានរដ្ឋសភាកូរ៉េ បានស្វាគមន៍សម្តេចតេជោនាយករដ្ឋមន្ត្រី ដែលបានមកទស្សនកិច្ច នៅសាធារណរដ្ឋកូរ៉េ និងបានអញ្ជើញទស្សនកិច្ច នៅសភាជាតិនៃសាធារណរដ្ឋកូរ៉េផងដែរ។ លោកប្រធានសភា បានលើកឡើងថា ការតភ្ចាប់ទំនាក់ទំនងការទូត រវាងប្រទេសទាំងពីរ គឺស្ថិតក្នុងដំណាក់កាលដ៏លំបាក។

លោកបានគូសបញ្ជាក់ថា សម្ដេចតេជោនាយករដ្ឋមន្ត្រី ពិតជាបានចូលរួមយ៉ាងសំខាន់ ដោយសារមានឆន្ទៈ និងការប្ដេជ្ញាខ្ពស់ធ្វើឲ្យទំនាក់ទំនងទ្វេភាគីនេះ បង្កើតឡើងក្នុងរយៈពេល ២៥​ឆ្នាំកន្លងមកនេះប្រកបដោយលទ្ធផលជាវិជ្ជមាន ទំនាក់ទំនងរវាងប្រទេសយើងទាំងពីរ ពិតជារីកចំរើន ហើយធ្វើឲ្យប្រទេសទាំងពីរ មានទំនាក់ទំនងក៏ដូចជាកិច្ចសហការយ៉ាងស៊ីជម្រៅ។ លោកក៏បានមានប្រសាសន៏បន្ថែមថាទស្សនកិច្ច របស់សម្ដេចតេជោនាយករដ្ឋមន្រ្តី មកការប្រទេសកូរ៉េលើកនេះ គឺមិនត្រឹមតែមានអត្ថន័យបន្ថែមទៀតប៉ុណ្ណោះទេ។ ប៉ុន្តែធ្វើឲ្យទំនាក់ទំនងរវាងប្រទេសទាំងពីរ កាន់តែមានអត្ថន័យធំធេងហើ យយើងសង្ឃឹមថាទំនាក់ទំនងទ្វេភាគី រវាងប្រទេសទាំងពីរ និងរីកចម្រើនបន្ថែមទៀត និងកាន់តែខ្លាំងក្លាជាងមុន។

ការឆ្លើយតបសម្ដេចនាយករដ្ឋមន្ត្រី បានអរគុណចំពោះលោកប្រធានរដ្ឋសភាជាតិកូរ៉េ ដែលបានទទួលជួបសម្ដេចនិងប្រតិភូ។ សម្តេចក៏បានអរគុណ លោកប្រធានសភាកូរ៉េផងដែរ ដែលបានគាំទ្រដល់ប្រទេសកម្ពុជា ជាពិសេសគាំទ្រកិច្ចប្រជុំកំពូលអាស៊ី អឺរ៉ុប​កន្លងទៅនេះ ដែលកម្ពុជាធ្វើជាប្រធានហើយនិងឆ្នាំនេះ ក៏បានគាំទ្រកម្ពុជាជាប្រធាន អាស៊ានផងដែរ។

សម្ដេចក៏អរគុណ ចំពោះសាធារណរដ្ឋកូរ៉េ ដែលតែងតែរក្សានូវទំនាក់ទំនងល្អ ជាមួយប្រទេសកម្ពុជាទោះបីក្នុងស្ថានភាពកូវីដ-១៩ មានការលំបាក និងមានការប្រឈមក៏ដោយ ។ប៉ុន្តែយន្តហោះអាកាសចរណ៍ស៊ីវិលរបស់កូរ៉េ នៅតែបន្តហោះទៅកម្ពុជា ដោយមិនបានបិទជើងហោះហើរឡើយ,ការរក្សាជើងយន្តហោះបាននេះ គឺការរក្សាបាននូវទំនាក់ទំនង និងការតភ្ជាប់រវាងប្រជាជន នៃប្រជាជននៃប្រទេសទាំងពីរផងដែរ។

ចំពោះសេដ្ឋកិច្ចរវាងប្រទេសទាំងពីរវិញ ក៏មានភាពទូលំទូលាយនិងកិច្ចសហប្រតិបត្តិការល្អ។ សម្តេចបានគូសបញ្ជាក់ផងដែរ ជុំវិញការហោះហើររបស់អាកាសចរណ៍ស៊ីវិលកូរ៉េ មកកម្ពុជាក៏បានអនុញ្ញាតឲ្យពលករនិងពលរដ្ឋកម្ពុជា អាចហោះហើរពីកូរ៉េទៅដល់ប្រទេសកម្ពុជា ដែលជាច្រកចេញចូលដ៏សំខាន់នេះ ពិតជាជួយដល់ប្រទេសកម្ពុជាផងដែរ។

សម្តេចតេជោ ហ៊ុន សែន ក៏បានលើកឡើងពីសមិទ្ធផល ដែលកើតឡើងពីទំនាក់ទំនងការទូតរវាងប្រទេសទាំងពីរ ក្នុងរយៈពេល ២៥​ឆ្នាំមកនេះ ប្រទេសទាំងពីរបានឈានដល់ការចុះកិច្ចព្រមព្រៀងពាណិជ្ជកម្មសេរីជាមួយគ្នា។ សម្តេចតេជោ បានជម្រាបជូនប្រធានសភា នៃសាធារណរដ្ឋកូរ៉េផងដែរថាកម្ពុជាបានផ្ដល់សច្ចាប័ន លើកិច្ចព្រមព្រៀងពាណិជ្ជកម្មសេរីនេះរួចហើយ,ហើយសម្ដេចសង្ឃឹមថាលោកប្រធានសភា និងជួយជំរុញឲ្យមានការអនុម័ត ដល់កិច្ចព្រមព្រៀងពាណិជ្ជកម្មសេរីនេះ ឲ្យបានឆាប់ ហើយអ្វីដែលសំខាន់ គឺវាបានចូលរួមបង្កើនកិច្ចសហប្រតិបត្តិការសេដ្ឋកិច្ច រវាងប្រទេសទាំងពីរ ហើយក៏ជាការអបអរសម្រាប់ខួបលើកទី ២៥នៃទំនាក់ទំនងការទូតរវាងប្រទេស ទាំងពីរផងដែរ ។

សម្តេចបានបញ្ជាក់ថា សម្តេចបានជួបលោកប្រធានាធិបតីកូរ៉េ ហើយលោកប្រធានាធិបតី បានបញ្ជាក់ថា កិច្ចព្រមព្រៀងពាណិជ្ជកម្មសេរី បានបញ្ជូនមកដល់រដ្ឋសភាជាតិ ហើយដូច្នេះសម្ដេចបានស្នើលោកប្រធានរដ្ឋសភា ជួយគាំទ្រដើម្បីឲ្យកិច្ចព្រមព្រៀងនេះ វាអាចចេញឲ្យបានឆាប់។ សម្ដេចបានបន្តថា នៅក្នុងកិច្ចសហប្រតិបត្តិការ រវាងប្រទេសទាំងពីរនេះ សម្ដេចក៏ចង់ឃើញមានកិច្ចសហប្រតិបត្តិការរវាងរដ្ឋសភា,ព្រឹទ្ធសភានៃកម្ពុជា និងរដ្ឋសភា នៃសាធារណរដ្ឋកូរ៉េ ពិសេសការផ្លាស់ប្ដូរ នៃតំណាងរាស្ត្រជាស្ត្រី និងតំណាងរាស្រ្តវ័យក្មេង នៃស្ថាប័នរដ្ឋសភាព្រឹទ្ធសភា នៃប្រទេសទាំងពីរ ជាពិសេសចង់ឃើញការបង្កើន នូវកិច្ចសហប្រតិបត្តិការ រវាងស្ថាប័នរដ្ឋសភា នៃប្រទេសទាំងពីរ។

សម្តេចតេជោ ក៏បានគូសបញ្ជាក់ផងដែរថា សម្ដេចពិតចង់ឃើញកិច្ចព្រមព្រៀងពាណិជ្ជកម្មសេរីរវាងប្រទេសទាំងពីរចូលជាធរមាន,ជាពិសេសនោះកិច្ចព្រមព្រៀងភាពជាដៃគូតំបន់សេដ្ឋកិច្ចគ្រប់ជ្រុងជ្រោយ ដែលបានចូលជាធរមាន នៅខែមករាកន្លងទៅនេះ អាចចូលរួមដែលសំខាន់ក្នុងការជំរុញពាណិជ្ជកម្មរវាងនឹងទំហំវិនិយោគនិងបង្កើន កិច្ចសហប្រតិបត្តិការសេដ្ឋកិច្ចរវាងប្រទេសទាំងពីរ។

សម្ដេចសង្ឃឹមថា លោកប្រធានសភា នឹងអាចលើកទឹកចិត្តដល់ក្រុមហ៊ុនកូរ៉េ ឲ្យទៅបន្តវិនិយោគនៅក្នុងប្រទេសកម្ពុជាផងដែរ។ លើសពីនេះទៀតសម្ដេច ក៏បានលើកអំពីការស្នើសុំឲ្យកូរ៉េ ផ្ដល់ជំនួយឥតសំណង និងកម្ចីសម្បទាន សម្រាប់ការសាងសង់ស្ពានមិត្តភាពកម្ពុជា-កូរ៉េ ដែលឆ្លងកាត់ទន្លេមេគង្គ នៅក្នុងប្រទេសកម្ពុជា។ សម្តេចបានបញ្ជាក់ថា ស្ពាននេះអាចជាស្ពានដ៏គំរូមួយដ៏ល្អ ហើយសង្ឃឹមថាលោកប្រធានរដ្ឋសភា នឹងជួយជំរុញឲ្យបានចេញជារូបរាង។

សម្រាប់ការវិនិយោគ នៅក្នុងប្រទេសកម្ពុជាវិញសម្តេចបានលើកពីរូបមន្ត ១+ ហើយតាមរយៈនៃច្បាប់វិនិយោគថ្មីរបស់ប្រទេសកម្ពុជា សង្ឃឹមថា ក្រុមហ៊ុនកូរ៉េដែលកំពុង វិនិយោគនៅប្រទេសជិតខាងកម្ពុជាប្រទេសវៀតណាម និងថៃ អាចបន្តមកវិនិយោគនៅកម្ពុជាបន្ថែមទៀត។ សម្តេចបានគូសបញ្ជាក់ទៀតថា បទពិសោធន៏កន្លងទៅនេះ ប្រទេសណាក៏មានរងផលប៉ះពាល់ដោយកូវីដ-១៩ ដូចនេះអាចពង្រីកនិងពង្រាយការបណ្ដាក់ទុនរោងចក្រ ក្នុងការផលិតសម្ភារៈគ្រឿងបន្លាស់ នៅក្នុងតំបន់ក៏ដូចជាអន្តរជាតិផងដែរ។

ពាក់ព័ន្ធទំនាក់ទំនងប្រជាជន និងប្រជាជនវិញ សម្ដេចតេជោនាយករដ្ឋមន្ត្រី ក៏បានអរគុណដល់សាធារណរដ្ឋកូរ៉េ ដែលកន្លងទៅនេះបានទទួល នូវពលករកម្ពុជា និងបានយកចិត្តទុកដាក់ចំពោះពលករកម្ពុជា ក្នុងការធ្វើការនៅក្នុងប្រទេសកូរ៉េ។ សម្ដេចក៏បានគូស បញ្ជាក់អំពីពលរដ្ឋកម្ពុជា ដែលរស់នៅធ្វើការ នៅក្នុងប្រទេសកូរ៉េ ដែលបច្ចុប្បន្ននេះធ្វើឲ្យប្រទេសទាំងពីរ មានទំនាក់ទំនងកាន់តែជិតស្និទ្ធ។

លោកប្រធានសភា បានឆ្លើយតបដោយមានប្រសាសន៍ ពាក់ព័ន្ធជាមួយនឹងការកិច្ចព្រមព្រៀងពាណិជ្ជកម្មសេរី រវាងប្រទេសទាំងពីរ នឹងផ្ដល់សច្ចាប័នក្នុងពេលឆាប់ៗនេះ ជាពិសេសនៅពាក់កណ្ដាលឆ្នាំ ២០២២​ ហើយលោកនឹងទទួលធ្វើការងារនេះ ជាបន្ទាន់តែម្ដង។ លោកបន្តថា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ បូករួមជាមួយកិច្ចព្រមព្រៀងពាណិជ្ជកម្មសេរីកម្ពុជាសាធារណរដ្ឋកូរ៉េគឺពិតជាអាចជំរុញពាណិជ្ជកម្ម,វិនិយោគយ៉ាងខ្លាំងរវាងកូរ៉េនិងកម្ពុជា។

ពាក់ព័ន្ធការកសាងស្ពានមិត្ត ភាពកម្ពុជាសាធារណរដ្ឋកូរ៉េ លោកនឹងខិតខំជំរុញការងារនេះ ហើយអាចចុះកិច្ចព្រមព្រៀង ឲ្យ​បានឆាប់ក្នុងពេលខាងមុខ។ លោកប្រធានមានមានប្រសាសន៍ថា​ នៅឆ្នាំ ២០២១ កន្លងទៅនេះ ទំហំពាណិជ្ជកម្មរវាងកម្ពុជាកូរ៉េ មានប្រមាណ ១ពាន់លានដុល្លារអាមេរិក ឯណោះ ហើយលោកសង្ឃឹមថា នៅថ្ងៃខាងមុខនឹងមានការកើនឡើង ថែមទៀត។

ពាក់ព័ន្ធនឹងពលករកម្ពុជា លោកប្រធានសភាកូរ៉េ បានទទួលស្គាល់ពលករកម្ពុជា ដែលមកធ្វើការនៅប្រទេសកូរ៉េ បានរួមចំណែកយ៉ាងសំខាន់ ដល់សេដ្ឋកិច្ចកូរ៉េ និងចូលរួមចំណែកដល់កិច្ចសហប្រតិបត្តិការរវាងប្រទេសទាំងពីរ។ ពាក់ព័ន្ធនិងស្ត្រីកម្ពុជា ដែលបានរៀបការប្ដី មកកាន់ប្រទេសកូរ៉េនេះ គឺរដ្ឋាភិបាលកូរ៉េ បានផ្ដល់តម្លៃពាក់ព័ន្ធជាគ្រួសារ ហើយយកចិត្តទុកដាក់ជាកូនស្រី​ ជាកូនប្រសាររបស់ប្រទេសកូរ៉េផងដែរ។ លោកបន្តថា ក្នុងនាមជាប្រធានសភាជាតិ នៃសាធារណរដ្ឋកូរ៉េ លោកគាំទ្រគ្រួសារ ដែលមានវប្បធម៌ចម្រុះ នៅក្នុងប្រទេសកូរ៉េ៕​

អត្ថបទ៖ ណារី