កសិករខេត្តសៀមរាប បន្តសកម្មភាពដាំដំណាំ​ផ្គត់ផ្គង់ជីវភាព​ក្នុងវិបត្តិកូវីដ-១៩

សៀមរាប៖ ប្រជាកសិករនៅខេត្តសៀមរាប នៅតែបន្តសកម្មភាពដាំដំណាំកសិកម្ម ដើម្បីផ្គត់ផ្គង់ជីវភាពគ្រួសារ ស្របទៅនឹងយន្តការ​ជំរុញលើកទឹកចិត្ត​​ពីសំណាក់មន្ទីរកសិកម្មរុក្ខាប្រម៉ាញ់និងនេសាទ ទោះបីស្ថិតក្នុងវិបត្តិសាកលនៃជំងឺកូវីដ១៩យ៉ាងណាក្តី។

កសិករភាគច្រើនរស់នៅតាមបណ្តាស្រុក និងក្រុងសៀមរាប កំពុងប្រមូលផលដំណាំផ្កាខាត់ណា និងផ្លែត្រប់ យកទៅលក់នៅតាមទីផ្សារនានា ដើម្បីទ្រទ្រង់ជីវភាពគ្រួសារឲ្យមានភាពប្រសើរឡើង។

អុ្នកស្រី ម៉ុន ឡម អាយុ៦០ឆ្នាំ រស់នៅភូមិធ្លកអណ្តូង សង្កាត់ស្លក្រាម ក្រុងសៀមរាប បានប្រាប់កម្ពុជាថ្មីថា អ្នកស្រីចាប់ផ្តើមប្រកបមុខរបរដាំបន្លែលក់នេះ ជាយូរយាណាស់មកហើយទៅតាមលក្ខណៈធម្មជាតិ បែបបុរាណ មិនមានបច្ចេកទេសអ្វីឡើយ ប្រើតែជីអាចម៍គោ ប៉ុណ្ណោះ។អ្នកស្រីបន្តថា បច្ចុប្បន្ននេះគាត់កំពុងដាំដុះដំណាំមួយចំនួនមានដូចជា ផ្កាខាត់ណា ឆាយថាវ ត្រប់ ជាដើម។ បើតាមអ្នកស្រី ឡម ផ្កាខាត់ណាលក់បានតម្លៃ ១គីឡូ ៥០០០រៀល ឆាយថាវ ២០០០រៀល និងផ្លែត្រប់លក់បាន១គីឡូក្រាមតម្លៃ ៣០០០រៀល។

លោក ទា គឹមសុទ្ធ ប្រធានមន្ទីរកសិកម្មរុក្ខាប្រម៉ាញ់ និងនេសាទខេត្តសៀមរាប បានឲ្យដឹងថា មន្ទីរ និងក្រសួងកសិកម្ម តែងតែចុះទៅជួយបង្ហាត់បង្រៀន និងផ្តល់ពូជដំណាំដល់ប្រជាកសិករជាបន្តបន្ទាប់ផងដែរ។ លោកថា អាជ្ញាធរតែងតែគិតគូ និងចង់ឃើញប្រជាកសិករមានការរីកចម្រើនក្នុងជីវភាពគ្រួសាររបស់ពួកគេ៕ អត្ថបទ៖ កុសល