ត្រឹម២ខែកម្ពុជា មានករណីឆ្លងជំងឺអូមីក្រុងជាង ៣ពាន់ករណី

ចាប់តាំងពីថ្ងៃទី ១៤ខែ ធ្នូឆ្នាំ២០២១ រហូតមកដល់ថ្ងៃទី១៣ ខែកុម្ភៈឆ្នាំ២០២២នេះ កម្ពុជាមានអ្នកឆ្លងជំងឺកូវីដ១៩ បំប្លែងខ្លួនថ្មីប្រភេទ អូមីក្រុង ជាង ៣០០០ករណី ក្នុងនោះមានជាង២៦០០ ករណីឆ្លងចូលសហគមន៍។

បើតាមរបាយករណ៍ប្រចាំថ្ងៃរបស់ក្រសួងសុខាភិបាលបានឱ្យដឹងថា ក្រសួង បានរកឃើញករណីមេរោគបំប្លែងថ្មីប្រភេទអូមីក្រុងជាលើកដំបូងនៅថ្ងៃទី១៤ខែធ្នូឆ្នាំ ២០២១ ទៅលើស្ត្រីមានផ្ទៃពោះជាជនជាតិខ្មែរម្នាក់អាយុ ២៣ឆ្នាំ នៅខេត្តស្វាយរៀង ដែលបានធ្វើដំណើរតាមជើងហោះហើរចេញ ពីប្រទេសហ្គាណា។

ក្រសួងបានបន្តថា ចាប់តាំងពីថ្ងៃទី១៤ធ្នូឆ្នាំ២០២១ រហូតមកដល់ព្រឹកថ្ងៃទី១៣ខែកម្ភៈ ឆ្នាំ២០២២នេះ កម្ពុជា មានអ្នកឆ្លងជំងឺកូវីដ១៩បម្លែងខ្លួនថ្មីប្រភេទអូមីក្រុងចំនួន៣០០២ករណីហើយរួមទាំង៤០១ ករណីដែលរកឃើញនៅថ្ងៃនេះផងហើយក្នុងចំណោម៤០១ករណីនោះមានករណីឆ្លងសហគមន៍ ៣៩៧នាក់ និងអ្នកដំណើរមកពីបរទេស០៤នាក់ អ្នកជាសះស្បើយ១៤៤នាក់និងស្លាប់គ្មាន ។

ក្រសួងសុខាភិបាលបានបន្តទៀតថា ក្នុងចំណោមអ្នកឆ្លងជំងឺកូវីដ១៩ បំប្លែងខ្លួនថ្មីប្រភេទអូមីក្រុងចំនួន៣០០២ ករណីនោះមាន២៦៥០ករណីឆ្លងចូលក្នុងសហគមន៍និងក្រៅពីនេះជាករណីនាំចូលមកពីបរទេស។

គិតត្រឹមព្រឹក ថ្ងៃទី១៣ ខែកុម្ភៈ ឆ្នាំ២០២២ នៅកម្ពុជា មានអ្នកឆ្លងសរុប ១២៣,៤៤៣នាក់  ក្នុងនោះ អ្នកជាសះស្បើយចំនួន ១១៨,៨០៤នាក់ និងអ្នកស្លាប់សរុប ៣០១៥នាក់៕ សំអឿន