អាជ្ញាធរ​ខេត្តស្ទឹងត្រែង​ពង្រីកផ្លូវឱ្យធំដល់ ១៨ ម៉ែត្រ​ពីមុខសាលាខេត្តទៅផ្លូវជាតិលេខ ៧

អាជ្ញាធរខេត្តស្ទឹងត្រែង ពង្រីកផ្លូវឲ្យបានធំទូលាយដើម្បីសម្រួលដល់ការធ្វើចរាចរណ៍ ស្នើឱ្យបងប្អូនប្រជាពលរដ្ឋ មានផ្ទះរស់នៅតាមដងផ្លូវកំពុងស្ថាបនា ក្នុងភូមិរានុកូល ចាប់ពីចំណុចចំការម៉ៃសាក់ មកដល់ចំណុចផ្លូវ បំបែកជា៤ ផ្លូវជាតិ​លេខ០៩ សូមឱ្យបង្កើនការចូលរួមសហការជាមួយក្រុមហ៊ុនសាសងសង់ឱ្យបានល្អ។

លោក សាយ កុសល អភិបាលក្រុងមានប្រសាសន៍បញ្ជាក់ថា ក្នុងសកម្មភាពពង្រីកផ្លូវនេះ ជាការផ្លាស់ប្តូរយុទ្ធ​សាសាស្ត្ររបស់រាជរដ្ឋាភិបាលក្នុងការអភិវឌ្ឍផ្លូវ ស្ពាន ពីផ្លូវតូចចង្អៀតឱ្យទៅជាធំទូលាយ  ព្រោះការអភិវឌ្ឍបានតិច   តែឱ្យមានគុណភាពរឹងមាំ ប្រើប្រាស់បានយូរអង្វែង។

លោកអភិបាលក្រុងមានប្រសាសន៍បន្តថា ក្នុងសកម្មភាពស្ថាបនានេះ ស្នើឱ្យបងប្អូនប្រជាពលរដ្ឋយើង ដែលមានមូលដ្ឋានរស់នៅជិតតាមដងផ្លូវ ត្រូវរួមគ្នាបង្កើនកិច្ចសហការជាមួយក្រុមហ៊ុនកំពុងសាងសង់ផ្លូវឱ្យបានល្អ ដើម្បីធ្វើឱ្យដំណើរការទៅមានភាពរលូន។

អ្នកស្រី មាស សុវណ្ណារី ប្រជាពលរដ្ឋអ្នកលក់ដូរ នៅភូមិរាជានុគោលនេះបានសំដែងការសាទរ ដែលអាជ្ញាធរក្រុង- ខេត្តបានស្ថាបនាសមិទ្ធផលផ្លូវល្អនៅក្នុងក្រុង ហើយបងប្អូនប្រជាពលរដ្ឋយើងអនុវត្កតាមការណែនាំរបស់អាជ្ញាធរក្រុង។

លោកស្រីថា ពេលមានផ្លូវធំទូលាយស្អាតបានផ្តល់ អត្ថប្រយោជន៏ច្រើនសម្រាប់ការរស់នៅ ប្រជាពលរដ្ឋស្រួលធ្វើដំណើរ ហើយទីប្រជុំជនក្រុងក៍មានសោភណ្ឌភាព ភូមិឋានក៍កាន់តែស្អាតល្អ។

លោក ស គឹមណាត ប្រធានមន្ទីរសាធារណៈការ និងដឹកជញ្ជូនខេត្តបានបញ្ជាក់ថា ផ្លូវថ្មីនេះមានទទឹង ១៨ម៉ែត្រ ចាក់មេតុងនៅក្នុងក្រុងមួយកំណាត់ ដែលជាផ្លូវធំជាងគេនៅក្នុងក្រុង ស្ទឹងត្រែង បង្កលក្ខណៈងាយស្រួលបំរើក្នុងការធ្វើចរាចរណ៍ទាំងរថយន្តនិងម៉ូតូទៅមកបានងាយស្រួល និងបញ្ជៀសពីការគ្រោះថ្នាក់ចរាចរណ៍បានបន្ថែមទៀត។

សូមបញ្ជាក់ថា ផ្លូវមួយខ្សែនេះស្ថាបនាចាប់ចេញពីមុខសាលាខេត្តទៅកាន់ផ្លូវជាតិលេខ ០៧ ចំណុចចំការមៃសាក់ ដែលមានទទឹង១៨ម៉ែត្របានសាងសង់ជាជំហ៊ានៗក្នុងនោះនៅឆ្នាំ២០២០ស្ថាបនាផ្លូវបេតុង ប្រវែងជាង ៦០០ម៉ែត្រ ឆ្នាំ២០២១ ស្ថាបនាជាផ្លូវកៅស៊ូបានជិតមួយ គីឡូម៉ែត្រ-និងជំហានទី ៣នេះ បន្តស្ថាបនាប្រមាណជាង២គីឡូម៉ែត្រ-នៅសល់តែជាងមួយគឺឡូម៉ែត្រទៀតអាចបន្តនៅឆ្នាំ២០២៣ ឱ្យបានរួច រាល់ជាស្ថាពរក្នុងប្រវែងជាង៦គីឡូម៉ែត្រ៕

អត្ថបទ៖ ងិន លីម