ព័ត៌មានជាតិ

ហង់ ជួនណារ៉ុន ពីអ្នកយាមផ្ទះក្លាយជារដ្ឋមន្រ្តីក្រសួងអប់រំ

បានផុស

៣ years មុន

នៅ

ថ្ងៃអង្គារ ១៥ កុម្ភៈ ២០២២

ដោយ

យកទ្រឹស្តីអ្នកចេះជាប់ បានជាប់ឈ្មោះលោក ហង់ ជួនណារ៉ុន ជារដ្ឋមន្រ្តីកណ្តាប់ដៃដែកដែលបានធ្វើការកែទម្រង់ប្រព័ន្ធ ប្រឡងថ្នាក់ជាតិ ដែលដណ្តប់ដោយរឿងអាស្រូវរាប់ឆ្នាំ។

ធ្លាប់ឆ្លងកាត់ជីវិតជាអ្នកយាមផ្ទះឲ្យមន្រ្តីធំ ជាបញ្ញវន្តមួយរូបដែលទទួលការអប់រំពីប្រទេសនៅអតីតសហភាពសូវៀត ជាមន្រ្តីនៅក្រសួងសេដ្ឋកិច្ច និងក្រសួងការបរទេស រហូតទទួលការទុកចិត្តពីប្រមុខរដ្ឋាភិបាលតែងតាំងជារដ្ឋមន្រ្តីក្រសួងអប់រំ យុវជននិងកីឡានៅឆ្នាំ២០១៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កុមារភាព

លោក ហង់ ជួនណារ៉ុន កើតនៅថ្ងៃទី ២ ខែមករា ឆ្នាំ១៩៦២ នៅសង្កាត់លេខ៥ ក្រុងភ្នំពេញ។ លោកមានឪពុកឈ្មោះហង់ ជួន ជាសាស្ត្រាចារ្យនៅសាលាវិចិត្រសិល្បៈ នៃមហាវិទ្យាល័យរបាំ មុនអំឡុងឆ្នាំ១៩៧០ និងមានម្ដាយឈ្មោះ ម៉ែន សាអ៊ុន ជាស្ត្រីមេផ្ទះ។

ជីវិតក្នុងសម័យខ្មែរក្រហម

លោកនិងគ្រួសារបានជម្លៀសពីក្រុងភ្នំពេញទៅនៅក្នុងភូមិជ្រឹង ឃុំវាលម្លូ ស្រុកតំបែរ ខេត្តកំពង់ចាម(ខេត្តត្បូងឃ្មុំសព្វថ្ងៃ)។ នៅខែមករា ឆ្នាំ១៩៧៩ បន្ទាប់ពីការដួលរលំរបបខ្មែរក្រហម ក្រុមគ្រួសារលោកបានវិលត្រឡប់ចូលមករស់នៅជាយរាជធានីភ្នំពេញ ម្តុំគីឡូម៉ែត្រលេខ ៧។

យាមផ្ទះឲ្យរដ្ឋមន្រ្តីក្រោយបែកឆ្នាំ១៩៧៩

អំឡុងខែមករា ឆ្នាំ១៩៧៩ ក្រោយពីការដួលរលំរបបអាវខ្មៅ លោក ចាន់ វ៉ែន ជារដ្ឋមន្ត្រីក្រសួងអប់រំនាសម័យនោះ បានចុះទៅជ្រើសរើសយុវជនដើម្បីធ្វើជាអ្នកយាមផ្ទះ ហើយក៏បានជ្រើសរើសយកលោក ដោយសារតែលោកក្រៅពីមានរាងកាយមាំមួន ក៏ចេះក្បាច់គុនការពារខ្លួនទៀតផង។

ប្រវត្តិសិក្សា

ក្នុងឆ្នាំ១៩៨០ ក្រោយការដួលរលំរបបប៉ុលពត លោកបានចូលសិក្សានៅវិទ្យាល័យកម្ពុជបុត្រ។ កាលនោះមានត្រឹមថ្នាក់ទី ៨ ជាថ្នាក់ខ្ពស់ជាងគេ ហើយលោកក៏ផ្លាស់ទៅរៀននៅវិទ្យាល័យព្រះស៊ីសុវត្ថិ។ វិទ្យាល័យព្រះស៊ីសុវត្ថិ ដែលមានពីថ្នាក់ទី ៨ ដល់ទី១០ ជាថ្នាក់បញ្ចប់វិទ្យាល័យ។

ក្រោយប្រឡងជាប់បាក់ឌុបក្នុងឆ្នាំ១៩៨១ លោកបានចូលរៀននៅវិទ្យាស្ថានបច្ចេកវិទ្យាកម្ពុជា។ សិក្សាបានតែមួយឆ្នាំ ក៏ទទួលបានអាហារូបករណ៍ទៅសិក្សានៅប្រទេសអតីតសហភាពសូវៀត ផ្នែកទំនាក់ទំនងសេដ្ឋកិច្ចអន្តរជាតិ។ ឆ្នាំ១៩៨៨ លោកបានបញ្ចប់បរិញ្ញាបត្រជាន់ខ្ពស់ផ្នែកសេដ្ឋកិច្ច ហើយក៏បានវិលត្រឡប់មកកាន់ប្រទេសកម្ពុជាវិញ ។

ជីវិតក្រោយពេលវិលត្រឡប់មកស្រុកកំណើតវិញ

ក្រោយត្រឡប់មកដល់ប្រទេសកំណើតវិញ លោកបានក្លាយជាអ្នកបកប្រែឱ្យគណៈប្រតិភូជាន់ខ្ពស់កម្ពុជា ដោយធ្វើជាអ្នកបកប្រែភាសាឱ្យក្រសួងការបរទេស ក្នុងតួនាទីជាអ្នកសរសេរបកប្រែផង និងជាអ្នកបកប្រែដោយផ្ទាល់មាត់ផង។ បន្តបន្ទាប់មក លោកក៏បានបម្រើការនៅក្នុងស្ថានទូតអូស្ត្រាលី និងបានចូលបម្រើការនៅវិទ្យាស្ថាន CDRI ក្នុងតំណែងជាអ្នកបកប្រែអង់គ្លេស និងបានក្លាយជាមន្ត្រីស្រាវជ្រាវផ្នែកសេដ្ឋកិច្ច នយោបាយពីឆ្នាំ១៩៩៣ រហូតដល់ឆ្នាំ១៩៩៨។

ថ្ងៃទី១ ខែមករា ឆ្នាំ១៩៩៩ លោកបានបម្រើការនៅក្នុងក្រសួងសេដ្ឋកិច្ច និងហិរញ្ញវត្ថុ ដោយមានតួនាទីជាអ្នកសរសេរសុន្ទរកថាជូនសម្ដេចតេជោនាយករដ្ឋមន្ត្រី។

ជីវិតអាពាហ៍ពិពាហ៍

ឯកឧត្ដមបណ្ឌិត ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា និងលោកជំទាវ ប៉ែន វិមល ជាភរិយា

លោកបានរៀបការជាមួយអ្នកស្រី ប៉ែន វិមល និងមានកូនប្រុស២នាក់ គឺកូនប្រុសច្បងឈ្មោះហង់ វិរៈឫទ្ធិ និងកូនប្រុសទី២ឈ្មោះហង់ វិមលា អាយុ២០ឆ្នាំ។ ភរិយារបស់លោក ក៏ជាមន្ត្រីក្នុងនាយកដ្ឋានផែនការរបស់ក្រសួងបរិស្ថានផងដែរ ដោយលោកជំទាវគឺជាកូនស្រីរបស់លោក ប៉ែន ណាវុឍ អតីតរដ្ឋមន្ត្រីក្រសួងអប់រំ និងសិក្សាធិការនៅអំឡុងឆ្នាំ១៩៨៤ ដល់១៩៩៩។

ចំណេះដឹងភាសា

ក្រៅពីភាសាខ្មែរជាភាសាកំណើត លោកមានចំណេះដឹងផ្នែកភាសាអង់គ្លេស បារាំង និងរុស្សី។ បើតាមលោកហង់ ជួនណារ៉ុង នៅពេលលោកកំពុងសិក្សាថ្នាក់បរិញ្ញាបត្រជាន់ខ្ពស់ផ្នែកសេដ្ឋកិច្ចនៅអតីតសហភាពសូវៀត លោកបានសរសេរសុន្ទរកថាដែលមានការទទួលស្គាល់ ដោយសារតែលោកមានស្នាដៃក្នុងការស្រាវជ្រាវ និងមានចំណេះដឹងផ្នែកភាសាអង់គ្លេស បារាំង និងរុស្ស៊ីច្បាស់លាស់។

និស្សិយចូលចិត្តកីឡាតេក្វាន់ដូ

ក្រៅពីមានសមត្ថភាពធ្វើកំណែទម្រង់ប្រព័ន្ធអប់រំឱ្យមានគុណភាពក្នុងរយៈពេលចុងក្រោយ ក៏ជារដ្ឋមន្ត្រីមួយរូបដែលបានស្វែងយល់ពីវិស័យកីឡាតាមរយៈការឆ្លៀតពេលហ្វឹកហាត់តេក្វាន់ដូ រហូតទទួលបានខ្សែក្រវាត់ខ្មៅផងដែរ ។

លោកធ្លាប់បានបញ្ជាក់ថា កីឡាគឺជាចំណូលចិត្តរបស់លោកតាំងពីក្មេង ហើយបើលោកមានពេលទំនេរមិនរវល់ដូចរាល់ថ្ងៃ គឺលោកនឹងបន្តហ្វឹកហាត់ឱ្យបានខ្សែក្រវាត់ខ្មៅខ្ពស់បំផុតនោះផង ដោយសារតែលោកយល់ថា កីឡា ឬក្បាច់គុនក្រៅពីធ្វើឱ្យអ្នកតស៊ូហ្វឹកហាត់អាចការពារខ្លួន ក៏ជួយឱ្យអ្នកហាត់មានសុខភាពល្អ និងមិនខុសពីការបំផុសឱ្យយុវជនងាកមកហ្វឹកហាត់ដើម្បីលើកស្ទួយកីឡា និងដើម្បីជំរុញដល់សុខភាពរបស់ខ្លួន។

លោកបានទទួលខ្សែក្រវាត់ខ្មៅផ្នែកតេក្វាន់ដូ ដោយខ្សែក្រវាត់ដែលលោកទទួលបាន មិនមែនជាខ្សែក្រវាត់កិត្តិយសនោះទេ ប៉ុន្តែជាខ្សែក្រវាត់ប្រយុទ្ធដែលលោកបានឆ្លងកាត់ការប្រកួត និងមានការបំពាក់ខ្សែក្រវាត់ដោយលោក ឆយ យ៉ុងសុក គ្រូបង្វឹកកីឡាតេក្វាន់ដូជម្រើសជាតិកម្ពុជា ។

លោក ហង់ ជួនណារ៉ុន និយាយថា ឱ្យតែលោកឆ្លៀតបាន គឺលោកនៅតែឆ្លៀតពេលហ្វឹកហាត់ ដើម្បីរំលឹកក្បាច់គុនតេក្វាន់ដូផង និងដើម្បីសុខភាពផង។ ដោយសារតែចេះក្បាច់គុនតេក្វាន់ដូនេះហើយ ទើបធ្វើឱ្យលោករឹងមាំផ្នែកសុខភាព ហើយបំពេញកិច្ចការបានយ៉ាងច្រើន តាំងពីបានក្លាយជារដ្ឋមន្ត្រីដែលមានការងារដកឃ្លាមិនចង់រួច។

ប្រើកណ្តាប់ដៃដែកកែទម្រង់ការប្រឡងបាក់ឌុប

មួយឆ្នាំបន្ទាប់ពីឡើងកាន់ដំណែង កំណែទម្រង់ការអប់រំរបស់លោក ហង់ ជួនណារ៉ុន ឈានជំហានដំបូង តាមរយៈយន្តការរឹតបន្តឹងការប្រឡងបាក់ឌុប។ ការប្រឡងបាក់ឌុបក្នុងខែសីហាឆ្នាំ២០១៤ ដែលមិនអនុញ្ញាតឲ្យមានការសូកលុយជាដាច់ខាតក្នុងដំណើរការប្រឡង ក៏ដូចជាហាមឃាត់ការបើកចម្លងនិងលួចចម្លងគ្នា។ ក្រសួងក៏បានអនុញ្ញាតឲ្យមានការសង្កេតការណ៍ពីសំណាក់អង្គភាពប្រឆាំងអំពើពុករលួយនិងស្ថាប័នពាក់ព័ន្ធ នៅក្នុងដំណើរការប្រឡងផងដែរ។ ជាលទ្ធផល សិស្សជាង៧៥ភាគរយ ឬស្មើនឹងប្រមាណ៦ម៉ឺននាក់ ប្រឡងធ្លាក់បាក់ឌុប។

ស្នាដៃ

ចាប់តាំងពីឡើងកាន់តំណែងនៅឆ្នាំ២០១៣ លោកហង់ ជួនណារ៉ុន មានមហិច្ឆតាធ្វើកំណែទម្រង់ការអប់រំដ៏ពុកផុយនៅកម្ពុជា ឲ្យមានសក្ដានុភាពឡើងវិញ។ ពង្រឹងគុណភាពអប់រំ រឹតបន្តឹងការប្រឡង ដំឡើងប្រាក់បៀវត្សរ៍ឲ្យគ្រូបង្រៀន សុទ្ធសឹងជាអ្វីដែលលោករដ្ឋមន្ដ្រីរូបនេះបានធ្វើរួចហើយ បើទោះបីជាត្រូវរងការសង្ស័យចំពោះសមត្ថភាពពីដំបូងក៏ដោយចុះ។

បន្ទាប់ពីឡើងកាន់ដំណែង លោកបណ្ឌិត ហង់ ជួនណារ៉ុន បានដាក់ចេញនូវផែនការសកម្មភាពអប់រំអាទិភាពចំនួន៨ចំណុច។ ទី១៖ បង្កើនគុណភាពនិងប្រសិទ្ធភាពនៃសេវាអប់រំ។ ទី២៖ ពង្រឹងការគ្រប់គ្រងបុគ្គលិក។ ទី៣៖ ពង្រឹងការប្រឡងគ្រប់ប្រភេទ។ ទី៤៖ កែទម្រង់ឧត្តមសិក្សា។ ទី៥៖ អភិវឌ្ឍសម្រាប់យុវជននូវជំនាញបច្ចេកទេសនិងជំនាញទន់។ ទី៦៖ អនុវត្តកំណែទម្រង់ការគ្រប់គ្រងហិរញ្ញវត្ថុសាធារណៈ។ ទី៧៖ បង្កើតធនាគារខួរក្បាលវិស័យអប់រំ។ និងអាទិភាពទី៨៖ កែទម្រង់ការអប់រំកាយនិងកីឡា។

ទស្សនៈនិងគោលដៅនៅថ្ងៃខាងមុខ

«អ្វីដែលខ្ញុំស្រមៃក្នុងជីវិត ក្លាយជាអ្នកសេដ្ឋកិច្ចដែលមានការទទួលស្គាល់ និងសរសេរសៀវភៅសេដ្ឋកិច្ចសម្រាប់ ក្មេង ជំនាន់ក្រោ»។ ជាមួយគ្នានេះ មហិច្ឆតាមួយទៀត លោកចង់កែប្រែនូវទម្លាប់របស់សិស្សានុសិស្សក្នុងប្រទេសកម្ពុជា ពីការប្រឡងមិនបើកចម្លង មកធ្វើដោយពឹងផ្អែកលើសមត្ថភាពខ្លួនឯង។ លោកបានប្តេជ្ញាចិត្តរួចហើយ គឺត្រូវតែធ្វើឲ្យប្រសើរឡើងវិញនូវវិស័យអប់រំ ដោយអនុវត្តទ្រឹស្តីអ្នកចេះជាប់។

ជាការពិត កំណែទម្រង់របៀបប្រឡងបាក់ឌុប កាលពីឆ្នាំ ២០១៤ ត្រូវបានគេស្វាគមន៍ភាគច្រើន ចំពោះគំនិតថ្មីរបស់រដ្ឋមន្ត្រីរូបនេះ៕