ព័ត៌មានជាតិ

ផ្សោតឯកាចុងក្រោយ នៅអន្លង់ឈើទាល បានស្លាប់ផុតពូជ ហើយ

បានផុស

៣ years មុន

នៅ

ថ្ងៃអង្គារ ១៥ កុម្ភៈ ២០២២

ដោយ

សត្វផ្សោតចុងក្រោយមួយក្បាល នៅអន្លង់ឈើទាល តំបន់ព្រះរំកិល ស្រុកបុរីអូរស្វាយសែនជ័យ ខេត្តស្ទឹងត្រែង បានស្លាប់បាត់បង់ជីវិតហើយ នៅថ្ងៃទី១៥ ខែកុម្ភៈ ឆ្នាំ២០២២នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមគណនី Facebook របស់ លោកស្រី ជា សិលា អ្នកសម្របសម្រួលគម្រោងអច្ឆរិយភាពនៃទន្លេមេគង្គ បានលើកឡើងថា៖ “ពិតជាគួរឱ្យសោកសង្រេងខ្លាំងណាស់ ដែលមិត្តផ្សោតឯការបស់យើងបានស្លាប់បាត់បង់ជីវិតពីអន្លង់ឈើទាល នាព្រឹកព្រហាមថ្ងៃទី១៥ ខែកុម្ភៈ ឆ្នាំ២០២២នេះហើយ។ សូមមិត្តទាំងអស់គ្នាកុំភ្លេចបណ្តាំគាត់ជាចុងក្រោយឱ្យសោះ សូមផ្តាំការពារពូជពង្សខ្ញុំផង។ គាត់មិនដឹងជាឈឺចាប់យ៉ាងណាទេមុនស្លាប់ បើកន្ទុយរបស់គាត់ជាប់ដោយមងនេសាទបែបនេះ។ លាហើយផ្សោតឯកោ”។

លោក សន ប៉ាន់ មេភូមិអូរស្វាយ និងជាប្រធានក្រុមឆ្មាំទន្លេក្នុងតំបន់អន្លង់ឈើទាល បានឱ្យដឹងថា លោកបានចុះល្បាតឃ្លាំមើលផ្សោតដ៏កម្សត់ ១ ក្បាលចុងក្រោយនោះជារៀងរាល់ថ្ងៃ ចាប់តាំងពីវាបានក្លាយជាផ្សោតឯកោក្នុងតំបន់អន្លង់ឈើទាលនៃអន្តរព្រំប្រទល់ដែនទឹករវាងប្រទេសកម្ពុជា-ឡាវ។ កម្លាំងពាក់ព័ន្ធបានប្រឹងប្រែងរកមធ្យោបាយ ដើម្បីកាត់កំណាត់មងដែលជាប់កន្ទុយផ្សោតនោះដែរ ប៉ុន្តែពុំអាចជួយបាន ព្រោះគ្មានឧបករណ៍ និងបច្ចេកទេសគ្រប់គ្រាន់ក្នុងការដងចាប់វា។

លោក ស្រី សមវិចិត្រ នាយខណ្ឌរដ្ឋបាលជលផលខេត្តស្ទឹងត្រែង បានលើកឡើងថា ដោយសារកត្តាភូមិសាស្ត្រ និងវ័យរបស់សត្វផ្សោត ១ ក្បាលនោះបានធ្វើឱ្យក្រុមការងាររបស់លោក និងអង្គការ WWF-Cambodia មិនអាចធ្វើសកម្មភាពណាមួយដោយអត្តនោម័តិបានទេ ព្រោះទីតាំងភូមិសាស្ត្រនៃដងទន្លេមេគង្គ ដែលផ្សោតនោះរស់នៅ គឺស្ថិតក្នុងតំបន់អន្តរព្រំដែនទឹករវាងប្រទេសកម្ពុជា និងប្រទេសឡាវ។

គួររំលឹកថា សត្វផ្សោតនៅអន្លង់ឈើទាលនេះមានស្នាមរបួសនៅផ្នែកកន្ទុយរបស់វា ដែលបណ្ដាលមកពីកំណាត់សរសៃមងរំជាប់កន្ទុយ កាលពីជាង ១ ខែមុន ដែលបានបង្កជាដំបៅ និងធ្លាក់ខ្លួនឈឺស្គមរីងរៃ។ កាលពីមុនមានករណីនេះកើតឡើង ផ្សោតដែលមានប្រវែងជាង ២ ម៉ែត្រនោះមានទម្ងន់ប្រមាណ ២០០ គីឡូក្រាម ប៉ុន្តែចុងក្រោយនេះវាស្គមខ្លាំងណាស់ គឺនៅសល់ប្រមាណ ១០០ គីឡូក្រាម ឬស្រាលជាងនេះ និងមានដំបៅនៅផ្នែកកន្ទុយ។ ផ្សោតនោះជាផ្សោតឈ្មោល ដែលមានលេខកូដសម្គាល់ ៣៥ និងមានអាយុប្រមាណ ២៥ ឆ្នាំ ដែលជាទូទៅសត្វផ្សោតភាគច្រើនស្លាប់ក្នុងអាយុត្រឹម ៣០ ឆ្នាំ។

បច្ចុប្បន្ន សត្វផ្សោតទន្លេមេគង្គក្នុងប្រទេសកម្ពុជា មានចំនួន ៨៩ ក្បាល ដែលចំនួននេះមិនរាប់បញ្ចូលនូវចំនួនផ្សោតដែលទើបកើតថ្មីនោះទេ។ ពួកវាកំពុងរស់នៅតាមអន្លង់មួយចំនួនចាប់ពីអន្លង់កាំពីក្នុងភូមិសាស្ត្រខេត្តក្រចេះដល់អន្លង់ឈើទាលនៃភូមិសាស្ត្រខេត្តស្ទឹងត្រែង៕

អត្ថបទ៖ ច័ន្ទ វីរៈ

Related Topics:សត្វកម្រ