ព័ត៌មានជាតិ

ជនជាតិព្នង ក្នុងភូមិឃុំក្បាលរមាស នៅបន្តរំឭកពិធីសែនព្រេន បែបប្រពៃណីដូនតា

បានផុស

៣ years មុន

នៅ

ថ្ងៃពុធ ១៦ កុម្ភៈ ២០២២

ដោយ

ជនជាតិដើមភាគតិចព្នង នៅឃុំក្បាលរមាស ស្រុកសេសាន ខេត្តស្ទឹងត្រែងបានរៀបចំពិធីសែនព្រេន តាមប្រពៃណីពីបុរាណ ដើម្បីសុំសេចក្តីសុខ ពីអារក្សអ្នកតាម្ចាស់ទឹកម្ចាស់ទីភូមិករ ដែលផ្តល់សេចក្តីសុខចំរើនក្នុងការរស់នៅ ការដាំដំណាំលូតលាស់បានផ្លែផ្កាល្អចិញ្ចឹមកូនចៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សែ សាមី ជនជាតិព្នង នៅភូមិក្បាលរមាសចាស់ ឃុំក្បាលរមាស បានបញ្ជាក់ថា ពិធីសែនព្រេនដូនតានេះ បានប្រារព្ធធ្វើនៅថ្ងៃទី ១៦ ខែកុម្ភៈជារៀងរាល់ឆ្នាំ ដើម្បីបួសសួងទៅដូនតានិងបារមីវត្ថុសក្ដិសិទ្ធិថែរក្សាទឹកដីភូមិករ សុំសេចក្តីសុខចម្រើនដល់ការរស់នៅរបស់ជនជាតិដើមភាគតិច និងរក្សាបានប្រពៃណីដើមមិនឲ្យបាត់បង់ផង។ លោកថា ពិធីនេះកាលពីជំនាន់ដើមបងប្អូនជនជាតិព្នង, ព្រៅ, គួយ, ចារាយ, ការវែត, ស្ទៀង, ខិ, លន់, កញ្ជាក់, ស្មូន។ល។ គឺសែនព្រេនម្តង ត្រូវកាប់ក្របី ខ្មៅ ក្របីស មាន់ ជ្រូក ផ្លែឈើ ស្រាពាង នំចំណីអាហារ ផ្សេងៗធ្វើនៅតាមទីតាំងព្រៃអារក្សអ្នកតាភ្នំ រៀងៗខ្លួនទៅតាមទម្លាប់។

លោកក៏បានបន្តថា បច្ចុប្បន្នពិធីនេះ បានកាត់បន្ថយខ្លះៗហើយ គឺមិនបានកាប់សម្លាប់ក្របី ជ្រូកទេ គឺគ្រួសារនីមួយៗ មកចូលរួមសែនយកតែអាហារ នំ ចំណី ស្រាដប ស្រាពាង រៀងៗខ្លួនមកសែនព្រេនប្រាប់ដល់ដូនតាជាដំណឹង សូមឱ្យកូនចៅរស់នៅក្នុងភូមិ សុំឲ្យមានសេចក្តីសុខចម្រើន។

លោកតា ញ៉យ សារ៉ូ អាយុ ១០៥ ឆ្នាំ ជាមេកន្ទ្រាញជនជាតិព្នងដឹកនាំពិធីសែនព្រាននេះ បានបញ្ជាក់បន្ថែមថា ជនជាតិព្នងមានជំនឿទៅលើដូនតា ព្រោះចាស់ទុំធ្លាប់ធ្វើបង្ហាញកន្លងមក ហើយពេលធ្វើនេះក៏មានបំណងឱ្យកូនចៅជំនាន់ក្រោយបន្តធ្វើតាម ដើម្បីតែសេចក្តីសុខសប្បាយក្នុងភូមិតែប៉ុណ្ណោះ។ លោកតា បានបន្តថា ពិធីនេះធ្វើឡើងនៅក្នុងខែកុម្ភៈ ចាប់ពីថ្ងៃទី ១៥ ដល់ថ្ងៃទី ២៥ បងប្អូនរើសយកថ្ងៃណាមួយក៏បាន នៅពេលជិតបុណ្យចូលឆ្នាំ ព្រោះមានសមាជិកថ្មីចេញចូលមកលេងក្នុងភូមិ ហើយជាទម្លាប់មួយទៀតធ្វើនៅខែមិថុនា ជិតដល់ពេលចេញទៅធ្វើស្រែចម្ការ ដើម្បីសុំឲ្យអ្នកតាព្រៃភ្នំជួយថែរក្សាភោគផលឲ្យគង់វង្សកុំឲ្យសត្វព្រៃស៊ីបំផ្លាញ។

លោក សុវណ្ណ ពិសេដ្ខ អភិបាលស្រុកសេសាន បានលើកឡើងថា ពិធីសែនព្រេននេះ អាជ្ញាធររីករាយណាស់ ព្រោះបានឃើញសកម្មភាពស្រុះស្រួលគ្នារបស់បងប្អូនជនជាតិ បានមកជួបជុំសប្បាយហើយក្រុមការងារថ្នាក់ស្រុកក៏នៅតែបន្តគាំទ្របងប្អូនជានិច្ច។ លោកថា នេះជាការបង្ហាញឲ្យឃើញពីទឹកចិត្តបងប្អូនជនជាតិ ចេះរួមសាមគ្គីគ្នាថែរក្សាប្រពៃណីជនជាតិដើម-ទំនៀមទម្លាប់ និងបង្ហាញឱ្យកូនចៅជំនាន់ក្រោយ និងប្រជាពលរដ្ឋភ្ញៀវទេសចរ បានឃើញនិងបានស្គាល់បន្ថែមទៀត។

សូមបញ្ជាក់ថា នេះជាប្រពៃណីជនជាតិដើមភាគតិចដែលពួកគាត់បានប្រារព្ធធ្វើជារៀងរាល់ឆ្នាំដើម្បីឱ្យកូនចៅជំនាន់ក្រោយជួយថែរក្សា និងធ្វើការប្រតិបត្តិទៅតាមតែប៉ុណ្ណោះ ព្រោះទំនៀមទម្លាប់មួយចំនួនត្រូវបានធ្វើកាត់បន្ថយហើយ៕

អត្ថបទ៖ ងិនលីម