សម្តេចតេជោ ហ៊ុន សែន លើកទឹកចិត្តសឹង្ហបុរី ជំរុញការវិនិយោគ និងកិច្ចសហការលើវិស័យសំខាន់ៗ

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានលើកទឹកចិត្តឱ្យរដ្ឋមន្រ្តីការបរទេសសឹង្ហបុរី ជំរុញការវិនិយោគមកកម្ពុជាកាន់តែច្រើន ជំរុញការធ្វើពាណិជ្ជកម្មរវាងប្រទេសទាំងពីរឱ្យកាន់តែធំ និងពិនិត្យមើលកិច្ចសហប្រតិបត្តិការលើវិស័យអប់រំ វិស័យសុខាភិបាល និងវិស័យដទៃទៀតដែលអាចធ្វើទៅបាន។

សម្តេចតេជោ ហ៊ុន សែន បានជំរុញបែបនេះទៅកាន់លោកបណ្ឌិត វីវៀន បាឡាគ្រីស្ហ្សណាន់ រដ្ឋមន្រ្តីការបរទេសសឹង្ហបុរី នៅក្នុងឱកាសចូលជួបសម្ដែងការគួរសម នាល្ងាចថ្ងៃទី១៦ ខែកុម្ភៈ​ ឆ្នាំ២០២២នេះ នៅវិមានសន្តិភាព ទីស្តីការនាយករដ្ឋមន្រ្តី។

នៅក្នុងជំនួបនោះ សម្ដេចតេជោ ហ៊ុន សែន បានអរគុណចំពោះរដ្ឋមន្ត្រីការបរទេសសិង្ហបុរីដែលបានអបអរចំពោះសម្ដេច និងអរគុណចំពោះការផ្ដាំផ្ញើសួរសុខទុក្ខរបស់ លោកនាយករដ្ឋមន្ត្រី និងបានអរគុណចំពោះសឹង្ហបុរី ដែលបានគាំទ្រកម្ពុជាជាប្រធានអាស៊ាន ហើយចាត់ទុកកម្ពុជាជាតំបន់សុវត្ថិភាពបើកការហោះហើរឡើងវិញ។
សម្ដេចតេជោបានជម្រាបជូនលោក វីវៀន​ អំពីគោលបំណងរបស់សម្ដេចក្នុងការធ្វើដំណើរទៅប្រទេសមីយ៉ាន់ម៉ាដែលរួមមាន ទី១. គឺធ្វើយ៉ាងណាកាត់បន្ថយ ឬលុបបំបាត់អំពើហិង្សាតាមរយៈការឈប់បាញ់គ្នា ទី២. រកវិធីផ្ដល់ជំនួយមនុស្សធម៌ជូនដល់ប្រជាជនមីយ៉ាន់ម៉ាដោយគ្មានការរើសអើង និងទី៣. គឺបង្កើតនូវការសន្ទនា។

នៅក្នុងជំនួបនោះ លោក វីវៀន បានថ្លែងអំណរសាទរជូនចំពោះសម្ដេចតេជោនាយករដ្ឋមន្ត្រីដែលបានទទួលមេដាយសន្តិភាពស៊ុនហាក់ ហើយបានមានប្រសាសន៍ថា នេះជាការទទួលស្គាល់មិនត្រឹមតែនៅក្នុងប្រទេសកម្ពុជា ឬនៅក្នុងតំបន់ទេ គឺទូទាំងពិភពលោក។ 

លោក វីវៀន ក៏បានសម្ដែងនូវអំណរសាទរជូនសម្ដេចតេជោ ដែលបានទទួលនូវជោគជ័យយ៉ាងត្រចះត្រចង់នៅក្នុងការទប់ស្កាត់ការរីករាលដាលជំងឺកូវីដ-១៩ ដោយកម្ពុជាបានចាក់វ៉ាក់សាំងជូនប្រជាជនបានច្រើនជាងគេនៅក្នុងតំបន់ ច្រើនជាងប្រទេសអភិវឌ្ឍន៍មួយចំនួន ហើយអត្រាស្លាប់ក៏មានទាបជាងគេ។ នេះគឺជាកត្តាដែលអនុញ្ញាតឱ្យកម្ពុជាអាចបើកប្រទេសឡើងវិញបានយ៉ាងឆាប់រហ័ស ហើយអ្នកវិនិយោគសិង្ហបុរីក៏មានចំណាប់អារម្មណ៍មកវិនិយោគនៅក្នុងព្រះរាជាណាចក្រកម្ពុជា ជាពិសេសនៅលើវិស័យពាណិជ្ជកម្ម លើវិស័យឃ្លាំងស្តុកទំនិញត្រជាក់ ក៏ដូចជាវិស័យដឹកជញ្ជូន។ ក្នុងន័យនេះលោក វីវៀន បានគោរពជម្រាបជូនសម្ដេចតេជោថា សិង្ហបុរី បន្តគាំទ្រ និងជំរុញពង្រឹងពង្រីកកិច្ចសហប្រតិបត្តិការ ជាពិសេសទ្វេភាគីរវាងប្រទេសទាំងពីរ និងគាំទ្រកម្ពុជាជាប្រធានអាស៊ាន៕

អត្ថបទ៖ ណារី