ឧបនាយករដ្ឋមន្រ្តី ប្រាក់ សុខុន៖ វត្តមានរបស់រដ្ឋមន្រ្តីការបរទេសឡាវ ក្នុងកិច្ចប្រជុំចង្អៀតបញ្ជាក់ពីការប្តេជ្ញាចិត្តយ៉ាងមុតមាំ

ការបញ្ជាក់របស់លោកឧបនាយករដ្ឋមន្រ្តី ប្រាក់ សុខុន រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិកម្ពុជាបានធ្វើឡើងនៅក្នុងជំនួបជាមួយលោក សាលើមសៃ គុំម៉ាស៊ីត រដ្ឋមន្រ្តីការបរទេសឡាវ ដែលបានអញ្ជើញមកទស្សនកិច្ចនៅកម្ពុជា ដើម្បីចូលរួមកិច្ចប្រជុំចង្អៀតរដ្ឋមន្ត្រីការបរទេសអាស៊ាននៅភ្នំពេញ។

ក្រោយជំនួបនោះ ប្រមុខការទូតកម្ពុជា លោកឧបនាយករដ្ឋមន្រ្តី ប្រាក់ សុខុន បានមានប្រសាសន៏ថា ទំនាក់ទំនងទ្វេភាគីរវាងប្រទេសកម្ពុជា និងឡាវ កំពុងមានសន្ទុះគួរឱ្យកត់សម្គាល់ ជាពិសេសក្រោយដំណើរទស្សនកិច្ចផ្លូវការប្រកបដោយផ្លែផ្ការបស់ឯកឧត្តមបណ្ឌិត ផនខាំ វីផាវ៉ាន់ នាយករដ្ឋមន្រ្តីឡាវ កាលពីខែវិច្ឆិកានៅឆ្នាំមុន។ ជាក់ស្តែង “វត្តមានដោយផ្ទាល់របស់ឯកឧត្តម រដ្ឋមន្រ្តីការបរទេសឡាវ ក្នុងដំណើរទស្សនកិច្ចនេះ និងកិច្ចប្រជុំចង្អៀតរដ្ឋមន្ត្រីការបរទេសអាស៊ាន បានសបញ្ជាក់ឱ្យឃើញច្បាស់ពីការប្តេជ្ញាចិត្តយ៉ាងមុតមាំរបស់រដ្ឋាភិបាលឡាវ ក្នុងការជំរុញទំនាក់ទំនងទ្វេភាគី និងការអភិវឌ្ឍតំបន់អាស៊ានទាំងមូល”។

លោកឧបនាយករដ្ឋមន្រ្តី ប្រាក់ សុខុន បានអះអាងថា ប្រទេសទាំងពីរ នឹងបន្តស្វែងរកសក្តានុពលថ្មីៗ តាមរយៈការលើកស្ទួយ និងកិច្ចសហប្រតិបត្តិការនានា ជាពិសេសក្នុងវិស័យពាណិជ្ជកម្ម វិនិយោគ អប់រំ ទេសចរណ៍ ការតភ្ជាប់ និងការផ្លាស់ប្តូររវាងប្រជាជននិងប្រជាជន៕

អត្ថបទ៖ កោះកែវ