ព័ត៌មានជាតិ

រថយន្ត ២ គ្រឿង ប៉ះទង្គិចគ្នាពេញទំហឹង បណ្តាលឲ្យស្លាប់ម្នាក់

បានផុស

៥ years មុន

នៅ

ថ្ងៃសៅរ៍ ១២ ធ្នូ ២០២០

ដោយ

ជនរងគ្រោះម្នាក់ ដែលជាអ្នកបើកបររថយន្តតូច បានស្លាប់ភ្លាមៗនៅនឹងកន្លែង បន្ទាប់ពីមានការប៉ះទង្គិចគ្នាយ៉ាងធ្ងន់ធ្ងរ រវាងរថយន្តតូច និងរថយន្តធំដែលមានដឹកស្រូវរាប់តោន ដោយភ្លាមៗនោះដែរ រថយន្តតូចដែលបានធ្លាក់ចេញពីផ្លូវចូលទៅក្នុងព្រៃរបោះ បានបង្កទៅជាអណ្តាតភ្លើងឆាបឆេះឡើងតែម្តង តែត្រូវបានរថយន្តពន្លត់អគ្គិភ័យរបស់អធិការដ្ឋាន ចេញអន្តរាគមន៍ទាន់ពេលវេលា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នៃករណីគ្រោះថ្នាក់ចរាចរណ៍ដ៏រន្ធត់នេះ បានកើតឡើងនៅវេលាម៉ោង ០០និង៣០ នាទីរំលងអធ្រាត្រ ឈានចូលថ្ងៃទី១២ ខែធ្នូ ឆ្នាំ២០២០ នៅលើកំណាត់ផ្លូវជាតិលេខ ៥ ត្រង់ចំណុចភូមិកគោ ឃុំជ្រៃ ស្រុកថ្មគោល ខេត្តបាត់ដំបង រវាងរថយន្តធុនធ្ងន់ដឹកស្រូវម៉ាកហ៊ីយ៉ាន់ដាយ ពណ៌ស ពាក់ស្លាកលេខត្បូងឃ្មុំ 3A-1268 ជាមួយនិងរថយន្តធុនតូចម៉ាកព្រូស ពណ៌ឈាមជ្រូក ពាក់ស្លាកលេខ ភ្នំពេញ 2AY-7925 ក្នុងទិសដៅច្រាសគ្នា។

យោងតាមខ្លឹមសារនៃការផ្សព្វផ្សាយរបស់លោកអធិការ ផង់ សុភាព ក្នុងការស្វែងរកក្រុមគ្រួសារសាច់ញាតិ ដើម្បីឲ្យមកទទួលយកសពរបស់ជនរងគ្រោះ គឺបានបញ្ជាក់ថា បន្ទាប់ពីមានការប៉ះទង្គិចគ្នាយ៉ាងធ្ងន់ធ្ងររួចមក គឺភាគីអ្នកបើកបររថយន្តតូច បានស្លាប់នៅនឹងកន្លែង ខណៈដែលរថយន្តតូចនេះ បានធ្លាក់ចេញពីផ្លូវ ហើយត្រូវអណ្តាតភ្លើងឆាបឆេះឡើង ប៉ុន្តែត្រូវបានរថយន្តពន្លត់អគ្គិភ័យជួយអន្តរាគមន៍ទាន់ពេលវេលា ដោយឡែកអ្នកបើកបររថយន្តធំ បានរត់គេចខ្លួនមុនពេលសមត្ថកិច្ចចុះទៅដល់។

លោកអធិការ បានបញ្ជាក់អត្តសញ្ញាណរបស់អ្នកបើកបររថយន្តតូច ដែលបានស្លាប់នៅនឹងកន្លែង គឺមានឈ្មោះ ញ៉យ ជំនោរ ភេទប្រុស អាយុ៣៤ឆ្នាំ រស់នៅភូមិ៤ សង្កាត់បឹងសាឡាង ខណ្ឌទួលគោក រាជធានីភ្នំពេញ ដោយបច្ចុប្បន្ន គឺនៅរក្សាទុកក្នុងទីអារាម ដើម្បីប្រកាសស្វែងរកក្រុមគ្រួសារសាច់ញាតិ ឲ្យមកទទួលយកសពទៅធ្វើបុណ្យតាមប្រពៃណី ដោយឡែករថយន្តទាំង២គ្រឿង ត្រូវបាននាំយកមករក្សាទុកជាបណ្ដោះអាសន្ន៕

អត្ថបទ៖ សោ និយមរ័ត្ន

សូមចុចអាន៖ ប្រទះឃើញបុរសវ័យចំណាស់ម្នាក់ដេកស្លាប់ សមត្ថកិច្ចសង្ស័យជាករណីខ្យល់ គ

Related Topics:គ្រោះថ្នាក់ចរាចរណ៍