២ ថ្ងៃជាប់គ្នា កម្ពុជា រកឃើញអ្នកស្លាប់ដោយសារជំងឺកូវីដ-១៩ ឡើងវិញ បន្ទាប់ពីស្ងាត់ ១ ខែកន្លះ

រយៈពេល ២ថ្ងៃជាប់គ្នានេះ កម្ពុជា បានរកឃើញករណីអ្នកស្លាប់ ដោយសារជំងឺកូវីដ-១៩ បន្ទាប់ពីស្ងាត់ អស់ ១ ខែកន្លះ ដោយគិតចាប់ពីថ្ងៃទី៥ ខែមករា ឆ្នាំ២០២២មក។

ក្រសួងសុខាភិបាល នៅថ្ងៃទី២១ ខែកុម្ភៈ ឆ្នាំ ២០២២ នេះ បានចេញសេចក្តីប្រកាសព័ត៌មាន ស្ដីពី ស្តីពីការសរុបស្ថានភាពជំងឺកូវីដ-១៩ ក្នុងព្រះរាជាណាចក្រកម្ពុជា សម្រាប់ថ្ងៃទី២០ ខែកុម្ភៈ ឆ្នាំ២០២២ ដោយបានរកឃើញ រកឃើញ ករណីស្លាប់ដោយសារជំងឺកូវីដ-១៩ ចំនួន ៣នាក់ ខណៈ កាលពីម្សិលមិញ មានករណីស្លាប់ ២នាក់។

ក្រសួងសុខាភិបាល បានឱ្យដឹងថា ក្នុងចំណោមអ្នកស្លាប់ថ្មី ទាំង ៣ ករណីចុងក្រោយនេះមាន ២ករណី មិនបានចាក់វ៉ាក់សាំងកូវីដ-១៩។ ចំណែកករណីស្លាប់ កាលពីម្សិលមិញ គឺមិនបានចាក់វ៉ាក់សាំង ទាំង ២ករណី។

គិតមកដល់ការប្រកាសព័ត៌មានចុងក្រោយរបស់ក្រសួងសុខាភិបាលនៅថ្ងៃនេះ កម្ពុជា មានករណីស្លាប់ដោយសារជំងឺកូវីដ១៩ សរុប ៣ ០១៧ ករណី។

ជាមួយគ្នានេះ ក្រសួងសុខាភិបាល បានប្រកាសរកឃើញ អ្នកឆ្លងកូវីដ-១៩ ថ្មីចំនួន ៧៣៦ នាក់ ជាប្រភេទអូមីក្រុង ក្នុងនោះករណីនាំចូលចំនួន ៦ នាក់ និងឆ្លងក្នុងសហគមន៍ ៧៣០ នាក់ ខណៈអ្នកជំងឺចំនួន ២៩៧ នាក់ ជាសះស្បើយ។

គួរបញ្ជាក់ថា គិតត្រឹមនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន ១២៦ ៤៨៩ ករណី អ្នកជាសះស្បើយសរុបចំនួន ១២០ ៤៦២ ករណី។

រដ្ឋាភិបាលបានជ្រើសរើសយកការចាក់វ៉ាក់សាំងកូវីដ-១៩ និងការអនុវត្តវិធានការសុខាភិបាល ៣កុំ ៣ការពារ ជាមធ្យោបាយចម្បងក្នុងការទប់ស្កាត់ និងប្រយុទ្ធប្រឆាំងជំងឺកូវីដ-១៩៕

អត្ថបទ៖ ច័ន្ទ វីរៈ