នាយករដ្ឋមន្រ្តីស្នើឱ្យស្ថាប័នរដ្ឋសន្សំសំចៃថវិកាទប់ទល់វិបត្តិកូវីដ-១៩

សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានស្នើដល់គ្រប់ស្ថាប័នរដ្ឋ ត្រូវតែសន្សំសំចៃថវិកា កាត់បន្ថយការចំណាយគ្រប់បែបយ៉ាង ដើម្បីត្រៀមថវិកាទប់ស្កាត់វិបត្តិកូវីដ-១៩ ដែលកំពុងឆ្លងរីករាលដាលនៅលើសកលលោក ក៏ដូចជាកម្ពុជា។ សម្តេចថ្លែងបែបនេះ នៅក្នុងពិធីបិទសន្និបាតបូកសរុបការងារឆ្នាំ ២០២១ លើកទិសដៅឆ្នាំ ២០២២ របស់ក្រសួងមហាផ្ទៃ នៅរសៀលថ្ងៃទី ២៣ ខែ កុម្ភៈ ឆ្នាំ ២០២២។

ជាមួយគ្នានេះ សម្តេចតេជោ មានប្រសាសន៍ប្រាប់ទៅរដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ត្រូវត្រួតពិនិត្យលើការស្នើសុំធ្វើគម្រោងនានា ដែលមិនចាំបាច់ ត្រូវផ្អាកសិន ដើម្បីកាត់បន្ថយការចំណាយ។

សម្តេចបានលើកឡើងថា បច្ចុប្បន្នរដ្ឋាភិបាល បានចំណាយថវិកាប្រមាណជិត ៤០លានដុល្លារ ដើម្បីជួយដល់ពលរដ្ឋក្រីក្រ ងាយរងគ្រោះក្នុងវិបត្តិកូវីដ។ លើសពីនេះទៀត ថវិកាដែលប្រមូលបានពីវិស័យនានា ត្រូវបានប្រើប្រាស់លើការទិញវ៉ាក់សាំង សម្រាប់ចាក់ជូនពលរដ្ឋឲ្យបានគ្រប់ៗគ្នា៕