ព័ត៌មានជាតិ

លោក វេង សាខុន បម្រើរដ្ឋជាង ៣០ ឆ្នាំ មុនក្លាយជារដ្ឋមន្ត្រីក្រសួងកសិកម្ម

បានផុស

៣ years មុន

នៅ

ថ្ងៃព្រហស្បតិ៍ ២៤ កុម្ភៈ ២០២២

ដោយ

ជាមួយបទពិសោធន៍ការងារជាង ៣០ ឆ្នាំ លោក វេង សាខុន បានក្លាយជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទនៅអំឡុងឆ្នាំ ២០១៦។ មុនកាន់តំណែងជារដ្ឋមន្ត្រីទទួលបន្ទុកកិច្ចការផ្នែកកសិកម្ម រុក្ខាប្រមាញ់ និងនេសាទ លោកធ្លាប់កាន់តួនាទីជាអនុរដ្ឋលេខាធិការពីឆ្នាំ ១៩៩៨ ដល់ឆ្នាំ ២០០៤ និងជារដ្ឋលេខាធិការក្រសួងធនធានទឹក និងឧតុនិយមពីឆ្នាំ ២០០៤ ដល់ឆ្នាំ ២០១៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រៅពីនេះក៏ធ្លាប់កាន់តួនាទីផ្សេងទៀត ដូចជាជាអគ្គនាយករងនៃអគ្គនាយកដ្ឋានធារាសាស្រ្តកសិកម្ម និងវារីសាស្ត្រឧតុនិយម។ អនុប្រធាននាយកដ្ឋានជលសាស្ត្រ និងឧតុនិយមនៃក្រសួងកសិកម្ម រុក្ខាប្រមាញ់ និងនេសាទ (ពីឆ្នាំ១៩៩៣-ដល់ឆ្នាំ៩៦) ដោយទទួលបន្ទុកកិច្ចការបច្ចេកទេស និងកិច្ចសហប្រតិបត្តិការអន្តរជាតិ។ អនុប្រធានការិយាល័យគ្រប់គ្រងប្រព័ន្ធធារាសាស្ត្រ នាយកដ្ឋានជលសាស្ត្រ និងឧតុនិយម ក្រសួងកសិកម្ម រុក្ខាប្រមាញ់ និងនេសាទ ដែលលោកទទួលបន្ទុកកិច្ចការបច្ចេកទេស និងកិច្ចសហប្រតិបត្តិការអន្តរជាតិ (ពីឆ្នាំ១៩៩១-ដល់ឆ្នាំ១៩៩៣) និងមន្ត្រីទទួលបន្ទុករៀបចំគម្រោងអភិវឌ្ឍន៍ប្រព័ន្ធធារាសាស្ត្រខ្នាតតូច ក្រោមការិយាល័យគ្រប់គ្រងធារាសាស្ត្រ នាយកដ្ឋានជលសាស្ត្រ និងឧតុនិយម ក្រសួងកសិកម្ម រុក្ខាប្រមាញ់ និងនេសាទ (ពីឆ្នាំ១៩៨៧-ដល់ឆ្នាំ៩១)។

ក្រសួងកសិកម្មដែលមានលោកវេង សាខុន ជារដ្ឋមន្រ្តីបានសម្រេចជោគជ័យ ក្នុងការចុះកិច្ចព្រមព្រៀងជាមួយប្រទេសចិនដើម្បីនាំចេញស្វាយស្រស់ និងចេកលឿងទៅទីផ្សារប្រទេសមហាយក្សមួយនេះ ខណៈដំណាំតាង៉ែនឬមៀនប៉ៃលិន ដែលជាដំណាំដ៏មានសក្តានុពល ក៏កំពុងស្ថិតនៅក្នុងដំណាក់កាលចចារបន្ថែមដើម្បីអាចនាំចេញដោយផ្ទាល់ទៅចិន ខណៈកន្លងទៅមានការរាំងស្ទះដោយសារខ្វះទីផ្សារនាំចេញ។

លើការអភិវឌ្ឍធនធានមនុស្ស លោក វេង សាខុន បានស្វះស្វែងបញ្ជូននិស្សិតកម្ពុជាទៅធ្វើកម្មសិក្សានៅក្រៅប្រទេស ជាពិសេសប្រទេសអ៊ីស្រាអែល ដែលល្បីល្បាញខាងវិស័យកសិកម្ម។

យ៉ាងណាមិញ កាលពីម្សិលមិញ រដ្ឋមន្រ្តីរូបនេះបានរងការស្តីបន្ទោសពីប្រមុខរដ្ឋាភិបាល។ ក្នុងពិធីបិទសន្និបាតបូកសរុបការងារឆ្នាំ២០២១ និងលើកទិសដៅការងារឆ្នាំ២០២២ របស់ក្រសួងមហាផ្ទៃ នារសៀលថ្ងៃទី២៣ កុម្ភៈ សម្តេចតេជោ ហ៊ុន សែន នាយករដ្ឋមន្រ្តីកម្ពុជាបានរិះគន់ដាក់ចំៗទៅកាន់លោក វេង សាខុន ថាជារដ្ឋមន្រ្តីជិះសេះមើលផ្កា និងស្តីបន្ទោសជារដ្ឋមន្ត្រីដែលធ្វើការងារមិនចេះសហការជាមួយក្រសួង-ស្ថាប័នដទៃ។

ប្រមុខរដ្ឋាភិបាលក៏បានលើករិះគន់ទៅលើយន្តការនាំចូលជ្រូករបស់រដ្ឋមន្រ្តីរូបនេះ ដែលធ្វើឲ្យតម្លៃជ្រូកលក់លើទីផ្សារឡើងថ្លៃ។ ការប្រតិកម្មខ្លាំងៗបន្ទាប់ពីក្រសួងសេដ្ឋកិច្ច បានប្រកាសពីការផ្តួចផ្តើមរៀបចំយន្តការដេញថ្លៃនាំចូលជ្រូករស់ផ្គត់ផ្គង់មកកម្ពុជា សំដៅបង្កើនការប្រកួតប្រជែង និងធានាការផ្គត់ផ្គង់ជ្រូករស់ក្នុងកម្រិតថ្លៃមួយសមរម្យ៕

អត្ថបទ៖ ប៊ុណ្ណារ៉ា