ព័ត៌មានជាតិ

ខេត្តព្រះសីហនុចាប់ផ្តើមអភិរក្សព្រែកកំពង់ស្មាច់ក្លាយជាតំបន់អេកូទេសចរណ៍ធម្មជាតិ

បានផុស

៣ years មុន

នៅ

ថ្ងៃសុក្រ ២៥ កុម្ភៈ ២០២២

ដោយ

ខេត្តព្រះសីហនុបានអនុម័តលើសេចក្តីព្រាងផែនទីកំណត់តំបន់គ្រប់គ្រងជលផលសមុទ្រព្រែកកំពង់ស្មាច់ក្នុងស្រុកព្រៃនប់ ដើម្បីអភិរក្សនិងប្រែក្លាយតំបន់នេះជាតំបន់អេកូទេសចរណ៍ធម្មជាតិដ៏ទាក់ទាញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងឱកាសចូលរួមកិច្ចប្រជុំអនុម័តលើសេចក្តីព្រាងផែនទីកំណត់តំបន់គ្រប់គ្រងជលផលសមុទ្រព្រែកកំពង់ស្មាច់ ក្នុងស្រុកព្រៃនប់កាលពីរសៀលថ្ងៃទី២៤ ខែកុម្ភៈ លោក គង់ វិតាណៈ អភិបាលរងខេត្តបានមានប្រសាសន៍ថា ព្រែកកំពង់ស្មាច់ជាតំបន់ដែលមានសក្តានុពលសម្បូរបែប នៃធម្មជាតិតំបន់ឆ្នេរមានដូចជា ព្រៃកោងកាង ស្មៅសមុទ្រ ផ្កាថ្ម ក្តាម បង្គា ។ល។ ស្រុកព្រៃនប់ មានព្រែក៣សំខាន់ៗមានដូចជា ព្រែកទឹកសាប ព្រែកកំពង់ស្មាច់ និងព្រែកទាល់។ ដោយឡែកព្រែកកំពង់ស្មាច់មានទេសភាពស្រស់ស្អាត និងប្រព័ន្ធអេកូឡូស៊ីល្អបំផុតមានដែននេសាទសម្រាប់សហគមនេសាទតំបន់ឆ្នេរគ្របដណ្ដប់ដោយព្រៃកោងកាងដ៏វិសេសវិសាល។

លោកបានបន្តថា ព្រែកកំពង់ស្មាច់ទទួលប្រភពទឹកពីដៃស្ទឹងតូចធំចំនួន១៦ហើយ ព្រែកនេះមានកោងកាងចំនួន៣៩ប្រភេទ ដោយ២៣ប្រភេទដាំដុះឡើងវិញ និង១៦ប្រភេទដុះក្នុងតំបន់តែម្ដង ហើយវាមានកម្ពស់២៥ម៉ែត្រ អង្កត់ផ្ចិត ០,៨០ម៉ែត្រ អំណោយផលដល់ប្រភេទខ្យងសមុទ្រ គ្រែងឈាម និងក្តាមព្រមទាំងមានសត្វល្មូន និងសត្វស្លាបជាច្រើនប្រភេទទៀត។

លោកអភិបាលរងខេត្តបានបន្ថែមទៀតថា ដើម្បីសម្រេចបាននូវទស្សនវិស័យផែនការគ្រប់គ្រងជលផលសមុទ្រព្រែកកំពង់ស្មាច់ ខេត្តបានកំណត់នូវគោលដៅចំនួន៤៖ ទី១.ធ្វើឱ្យប្រសើរឡើងនូវស្ថានភាពធនធានជលផលសមុទ្រ និងជីវ:ចម្រុះដែលបាត់បង់ក្នុងតំបន់ព្រែកកំពង់ស្មាច់ ២.ការពារ និងអភិរក្សនូវប្រភេទសត្វកម្រ ងាយរងគ្រោះ និងទីជម្រករបស់វា ៣.លើកកម្ពស់ការចិញ្ចឹមជីវិតរបស់ប្រជាពលរដ្ឋមូលដ្ឋានឱ្យប្រសើរឡើង និង៤.ពង្រឹងនូវអភិបាលកិច្ចល្អក្នុងតំបន់ព្រែកកំពង់ស្មាច់ទាំងសមត្ថភាពក្នុងការគ្រប់គ្រងធនធានជលផលសមុទ្រ និងជីវៈចម្រុះក្នុងតំបន់ព្រែកកំពង់ស្មាច់ប្រកបដោយនិរន្តរភាព។

លោក គួច ចំរើន អភិបាលខេត្តព្រះសីហនុដែលបានដឹកនាំកិច្ចប្រជុំបានមានប្រសាសន៍បញ្ជាក់ថា យើងត្រូវកំណត់តួលេខផ្ទៃដីដែលត្រូវដាំដុះព្រៃកោងកាងឱ្យបានច្បាស់លាស់។ ទន្ទឹមនោះត្រូវធ្វើការឯកភាពគ្នាកំណត់ដែនជលផលព្រែកកំពង់ស្មាច់ដើម្បីធានាថា ធនធានព្រៃកោងកាង និងជីវ:ចំរុះនានាត្រូវបានការពារ និងអភិរក្សតាមរយៈការបង្កើតជាតំបន់អេកូទេសចរណ៍ធម្មជាតិ។

លោកអភិបាលខេត្ត បានធ្វើការណែនាំដល់អាជ្ញាធរស្រុក និងឃុំត្រូវរៀបចំចលនាបំផុសបងប្អូនប្រជាពលរដ្ឋនៅក្នុងសហគមនេសាទកុំឱ្យកាប់បំផ្លាញព្រៃកោងកាង ដោយត្រូវរួមគ្នាថែរក្សា អភិរក្ស និងដាំដុះព្រៃកោងកាងនៅក្នុងដែនសហគមនេសាទឡើងវិញ ដើម្បីជួយលើកកម្ពស់ជីវភាពរស់នៅរបស់ប្រជានេសាទនៅក្នុងមូលដ្ឋានឱ្យកាន់តែល្អប្រសើរ៕

អត្ថបទ៖ សំអឿន

Related Topics:ខេត្តព្រះសីហនុ