ប្រធានកម្មវិធីតំបន់ប្រចាំអាស៊ី-ប៉ាស៊ីហ្វិក អបអរសាទរចំពោះសម្ដេចតេជោ ដែលធ្វើជាប្រធានអាស៊ាន នាឆ្នាំ ២០២២

លោក Joo-Ok Lee ប្រធានកម្មវិធីតំបន់ប្រចាំអាស៊ី-ប៉ាស៊ីហ្វិក និងជាសមាជិកគណៈកម្មាធិការប្រតិបត្តិវេទិកាសេដ្ឋកិច្ចពិភពលោក (WEF ) បានសម្ដែងនូវការអបអរសាទរ ជូនចំពោះសម្ដេចតេជោ ហ៊ុន សែន ដែលបានទទួលធ្វើជាប្រធានអាស៊ាន នាឆ្នាំ ២០២២នេះ។

ការបង្ហាញការអបអរសាទរនេះ គ្រាដែលសម្ដេចតេជោ ហ៊ុន សែន បានអនុញ្ញាតឲ្យលោក Joo-Ok Lee ប្រធានកម្មវិធីតំបន់ប្រចាំអាស៊ី-ប៉ាស៊ីហ្វិក និងជាសមាជិកគណៈកម្មាធិការប្រតិបត្តិវេទិកាសេដ្ឋកិច្ចពិភពលោក (WEF) ចូលជួបសម្ដែងការគួរសម និងពិភាក្សាការងារ នៅវិមានសន្តិភាព នាព្រឹកថ្ងៃទី ៣ ខែមីនា ឆ្នាំ ២០២២នេះ។

លោក​ អ៊ាង សុផល្លែត ជំនួយការផ្ទាល់សម្តេចតេជោ ហ៊ុន សែន បានមានប្រសាសន៍ឲ្យដឹងថា លោក Joo-Ok Lee បានសម្ដែងនូវការអបអរសាទរ ជូនចំពោះសម្ដេចតេជោ ហ៊ុន សែន ដែលបានទទួលធ្វើជាប្រធានអាស៊ានប្ដូរវេន និងសម្ដែងនូវចំណាប់អារម្មណ៍យ៉ាងខ្លាំងជាទីបំផុត ចំពោះវឌ្ឍនភាពនៃការអភិវឌ្ឍ របស់កម្ពុជា។

លោក Joo-Ok Lee បានបន្តថា លោកបានអញ្ជើញ មកប្រទេសកម្ពុជាកាលពីឆ្នាំ ២០១៧ ហើយនៅពេលនេះ ប្រទេសកម្ពុជាមានការអភិវឌ្ឍយ៉ាងខ្លាំង ទោះបីក្នុងដំណាក់កាល នៃការរីករាលដាលនៃជំងឺកូវីដ-១៩ ក៏ដោយ។ លោកបន្ថែមថា ប្រសិនបើគ្មានការរីករាលដាល នៃជំងឺកូវីដនោះទេ កម្ពុជាពិតជាមានការអភិវឌ្ឍលឿនជាងនេះមិនខាន។

ជាមួយគ្នានោះដែរលោក Joo-Ok Lee បានគោរពជម្រាបជូនសម្ដេចតេជោ អំពីដំណើរការរៀបចំ កិច្ចប្រជុំវេទិកាសេដ្ឋកិច្ចពិភពលោក ដែលនឹងប្រព្រឹត្តទៅ នៅខែ មិថុនា ឆ្នាំ ២០២២ ខាងមុខនេះ ជាមួយនឹងការទន្ទឹងទទួលអនុសាសន៍ ទស្សនៈរបស់សម្ដេចតេជោ នៅក្នុងវេទិកាសេដ្ឋកិច្ចពិភពលោក ក្នុងនាមសម្ដេចតេជោ ជាប្រធានអាស៊ាន ផងដែរ។

ជាការឆ្លើយតបសម្ដេចតេជោ បានយល់ស្របជាមួយនឹងលោក Joo-Ok Lee ដែលថា ប្រសិនណាបើមិនមានការរាលដាលជំងឺកូវីដ-១៩ នោះ កម្ពុជាពិតជា និងមានការអភិវឌ្ឍ​លឿនជាងនេះ ជាមួយនឹងការកាត់បន្ថយភាពក្រីក្រ កាន់តែច្រើនថែមទៀត។ ទោះជាយ៉ាងណាក៏ដោយ សម្ដេចតេជោ ក៏បានជម្រាបជូនលោក Joo-Ok Lee ផងដែរថា កម្ពុជាបានចាក់ស្រោចវ៉ាក់សាំង ទប់ស្កាត់ជំងឺកូវីដ ហើយក៏បានបើកប្រទេសឡើងវិញ កាលពីថ្ងៃទី ១ ខែវិច្ឆិកា ឆ្នាំ ២០២១ កន្លងទៅ ហើយអ្វីដែលជាការគួរកត់សម្គាល់នោះ សេដ្ឋកិច្ចកម្ពុជា គឺរំពឹងថានឹងមានការកើនឡើង ប្រមាណ ៥.៦% សម្រាប់ឆ្នាំ ២០២២ នេះ។

ពាក់ព័ន្ធនឹងទស្សនៈ របស់សម្ដេចតេជោ ក្នុងនាមជាប្រធានអាស៊ាន សម្ដេចតេជោ បានមានប្រសាសន៍ថា អ្វីដែលសម្ដេចតេជោ ចង់បាន គឺអាស៊ានសហការបើកប្រទេសវិញព្រមៗ គ្នា ដើម្បីជំរុញទំនាក់ទំនង​ក្នុងក្របខណ្ឌ AFTA ជំរុញពាណិជ្ជកម្ម ក្នុងតំបន់ ហើយបំពេញឲ្យគ្នាទៅវិញទៅមក នៅពេលដែលទាំងអស់គ្នា រស់នៅក្នុងបរិបទថ្មី នៃសម័យកូវីដ-១៩។

សម្ដេចតេជោ ក៏បានផ្ដល់ជូនលោក Joo-Ok Lee នូវទស្សនៈរបស់សម្ដេចពាក់ព័ន្ធនឹងរូបមន្ត ១បូក នោះ គឺការវិនិយោគមិនប្រមូលផ្ដុំ គឺការវិនិយោគនៅប្រទេសមួយ ហើយគប្បីវិនិយោគនៅប្រទេសជាប់នោះមួយទៀត ដើម្បីដោះស្រាយបញ្ហា នៅពេលដែលប្រទេសមួយជួប នូវវិបត្តិដូចជាជំងឺកូវីដរីករាតត្បាតជាដើម គឺប្រទេសមួយទៀតអាចបំពេញទៅ ឲ្យតម្រូវការដើម្បីរក្សាឲ្យខាងតែបាន នូវស្ថេរភាពនៃការផ្គត់ផ្គង់ទំនិញ ក៏ដូចជាទាញចំណាប់អារម្មណ៍ ទៅលើការវិនិយោគនៅលើវិស័យឌីជីថល ដែលកន្លងមកនេះវិស័យ Digital មិនត្រឹមតែមិនមានការប៉ះពាល់ទៅ ដោយការរីករាតត្បាតនៃជំងឺកូវីដ-១៩ ទេ ផ្ទុយទៅវិញវិស័យនេះ បាននិងកំពុងតែវិវត្តរីកចំរើនយ៉ាងឆាប់រហ័ស៕

អត្ថបទ៖ ណារី