កម្មវិធីមួយត្រូវបានដាក់ឲ្យប្រើប្រាស់ ដើម្បីរុញកំណើនសេដ្ឋកិច្ចទប់ស្កាត់បំណុលលើសលប់របស់អតិថិជន

សមាគមធនាគារ សមាគមមីក្រូហិរញ្ញវត្ថុកម្ពុជា និងសមាគមសហព័ន្ធហិរញ្ញវត្ថុ និងបច្ចេកវិទ្យាកម្ពុជា បានប្រកាសដាក់ឲ្យប្រើប្រាស់ជាផ្លូវការ«ក្រមប្រតិបត្តិនៃវិស័យធនាគារ និងហិរញ្ញវត្ថុ នៅព្រឹកថ្ងៃទី ០៤ ខែ មីនា ឆ្នាំ ២០២២នេះ។

ថ្លែងនៅក្នុងពិធីនេះ លោកបណ្ឌិត អ៊ិន ចាន់នី ប្រធានសមាគមធនាគារនៅកម្ពុជា បានលើកឡើងថា ការដាក់ឲ្យប្រើប្រាសនូវ«ក្រមប្រតិបត្តិនៃវិស័យធនាគារ និងហិរញ្ញវត្ថុ»នេះ គឺដើម្បីឆ្លើយតបទៅនឹងយុទ្ធសាស្រ្តអភិវឌ្ឍវិស័យហិរញ្ញវត្ថុឆ្នាំ ២០១៩-២០២៥ និងយុទ្ធសាស្រ្តជាតិ ស្តីពីបរិយាបន្តហិរញ្ញវត្ថុ ឆ្នាំ ២០១៩-២០២៥ ក្នុងគោលបំណងចូលរួមលើកកម្ពស់សិទ្ធិ និងការបង្កើនកិច្ចការពារអតិថិជន ព្រមទាំងបង្កើនតម្លាភាពក្នុងវិស័យធនាគារ និងហិរញ្ញវត្ថុ ដើម្បីជួយរុញកំណើនសេដ្ឋកិច្ចប្រកបដោយចីរភាព និងបរិយាបន្ន។

បើតាមលោកបណ្ឌិត អ៊ិន ចាន់នី ក្រមប្រតិបត្តិនៃវិស័យធនាគារ និងហិរញ្ញវត្ថុនេះ ក៏ចូលរួមទប់ស្កាត់បំណុលលើសលុប និងការពារអតិថិជន ដែលងាយរងគ្រោះផងដែរ។ លើសពីនេះទៀត ក្រមនេះ នឹងចូលរួមចំណែកជាមួយរាជរដ្ឋាភិបាល ជាពិសេសធនាគារជាតិនៃកម្ពុជា ក្នុងការសម្រេចឲ្យបាននូវប្រព័ន្ធហិរញ្ញវត្ថុមួយមានស្ថិរភាព ប្រសិទ្ធភាព និងពិពិធកម្មទីផ្សារ ហិរញ្ញវត្ថុប្រកបដោយបរិយាបន្ន ឆ្លើយតបទៅនឹងតម្រូវការសេវាហិរញ្ញវត្ថុក្នុងប្រទេស គាំទ្រដល់និរន្តភាពនៃកំណើនសេដ្ឋកិច្ច បង្កើនប្រាក់ចំណូលដល់ប្រជាជន និងកាត់បន្ថយភាពក្រីក្រ។

លោក សុខ វឿន ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា បានឲ្យដឹងដែរថា ក្រមប្រតិបត្តិនៃវិស័យធនាគារ និងហិរញ្ញវត្ថុនេះ បានបង្កើតឡើងនៅក្នុងថេរៈវេលាមួយសមស្រប ដើម្បីធានានូវនិរន្តភាពនៃវិស័យហិរញ្ញវត្ថុកម្ពុជា តាមរយៈការបង្កើននូវការអនុវត្តប្រកបដោយក្រមសីលធម៌ វិជ្ជាជីវៈ ក្នុងការបម្រើ និងផ្តល់សេវាជូនអតិថិជនប្រកបដោយការការពារ។

លោកបន្តថា ក្នុងកិច្ចខិតខំប្រឹងប្រែង ដើម្បីរួមចំណែកធ្វើឲ្យប្រព័ន្ធធនាគារកាន់តែរឹងមាំ និងប្រកបដោយបរិយាបន្ន ក្រមប្រតិបត្តិសម្រាប់ធនាគារ ត្រូវបានបង្កើតជាលើកដំបូងដោយធនាគារចំនួន ១៥ នៅក្នុងខែកុម្ភៈ ឆ្នាំ ២០១៥។ ប្រាំឆ្នាំក្រោយ ដោយមើលឃើញអំពីភាពចាំបាច់នៅក្នុងការជំរុញ និងពង្រឹងកិច្ចការពារអតិថិជន និងដើម្បីធានាបាននូវនិរន្តរភាពវិស័យធនាគារ និងហិរញ្ញវត្ថុ ទើបនៅក្នុងកិច្ចប្រជុំលើកទី១ នៃគណៈកម្មាធិការបរិយាបន្នហិរញ្ញវត្ថុ នៃសមាគមធនាគារកម្ពុជា កាលពីថ្ងៃទី ២២ ខែ ឧសភា ឆ្នាំ ២០២០ បានសម្រេចលើគម្រោងជាមួយសមគមមីក្រូហិរញ្ញវត្ថុ ដើម្បីបង្កើតក្រមប្រតិបត្តិនៃវិស័យធនាគារហិរញ្ញវត្ថុនេះឡើង បានអនុម័តដោយក្រុមប្រឹក្សាភិបាលសមាគមធនាគារកម្ពុជា នៅខែកក្កដា ឆ្នាំ ២០២១៕