លោក ប្រាក់ សុខុន​ ចូលរួមថ្លែងសុន្ទរកថា ​ក្នុងកិច្ចប្រជុំ High-Level Segment នៃ​កិច្ចប្រជុំ ក្រុមប្រឹក្សាសិទ្ធិមនុស្ស UN

លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ ​បាន​អញ្ជើញចូលរួមថ្លែងសុន្ទរកថា​​​ នៅក្នុងកិច្ចប្រជុំ High-Level Segment នៃ​កិច្ចប្រជុំរបស់ក្រុមប្រឹក្សាសិទ្ធិមនុស្ស អង្គការសហប្រជាជាតិ (UN) លើកទី ៤៩ នៅទីក្រុងហ្សឺណែវ ប្រទេសស្វីស​ ដែ​ល​កិច្ចប្រជុំនេះ ធ្វើឡើងតាមប្រព័ន្ធវីដេអូ​។

​ក្រសួងការបរទេស បានឲ្យដឹងនាល្ងាចថ្ងៃទី ៤ ខែមីនានេះថា ​ក្នុងឱកាសកិច្ចប្រជុំ High-Level Segment មានឥស្សរជនជាន់ខ្ពស់ តំណាងឲ្យរដ្ឋាភិបាលនៃបណ្តាប្រទេសនានា និងអង្គការអន្តរជាតិនានាសរុបជាង ​១៤០រូប បាន​ចុះឈ្មោះ​ចូលរួមថ្លែង​សុន្ទរកថា ចាប់ពីថ្ងៃទី ២៨ ខែកុម្ភៈ ដល់ថ្ងៃទី ៣ ខែមីនា ឆ្នាំ ២០២២។ ក្នុងនោះ ប្រទេសអាស៊ាន ដែលបានចុះឈ្មោះចូលរួមថ្លែងសុន្ទរកថា រួមមាន៖ កម្ពុជា ថៃ ហ្វីលីពីន ម៉ាឡេស៊ី ឥណ្ឌូនេស៊ី និងវៀតណាម។​

សូមបញ្ជាក់ថា កិច្ចប្រជុំ​ High-Level Segment នេះ គឺជាវេទិកាសម្រាប់ឥស្សរជនជាន់ខ្ពស់តំណាង​ឲ្យរដ្ឋាភិបាលនៃប្រទេសនានា ថ្លែងពីអាទិភាពការងារ វឌ្ឍនភាព ការប្តេជ្ញាចិត្តរបស់ប្រទេសនីមួយៗ និងការផ្លាស់ប្តូរទស្សនៈគ្នា លើបញ្ហាប្រឈមផ្នែកសិទ្ធិមនុស្ស៕

អត្ថបទ៖ កោះកែវ