កម្ពុជា លក់អង្ករឲ្យរុស្ស៊ី និងអ៊ុយក្រែន​បានប៉ុន្មានតោន ​​ក្នុងមួយឆ្នាំ?

ក្នុងរយៈពេល​ ៥ឆ្នាំចុងក្រោយ (២០១៧ -២០២១) ប្រទេសកម្ពុជា បាននាំអង្ករចេញទៅកាន់ប្រទេសរុស្ស៊ី បានចំនួន ១៧​ ៥១២តោន។ សម្រាប់ឆ្នាំ ២០២១ បរិមាណដែលបានលក់ទៅកាន់ប្រទេសរុស្ស៊ីមាន ចំនួន​ ២​ ២២៣​ តោន ដែលគិតជាទឹកប្រាក់ប្រមាណ ​ ១​ ៩៦៣​ ៦៤០​ ដុល្លារអាមេរិក។ នេះបើតាមការឲ្យដឹងពីសហព័ន្ធស្រូវអង្ករកម្ពុជា។

បើតាមសហព័ន្ធស្រូវអង្ករកម្ពុជា សម្រាប់ ខែមករា និងខែកុម្ភៈ​ នៃឆ្នាំ ២០២២ បរិមាណអង្ករ ដែលបាននាំចេញទៅកាន់ប្រទេសរុស្ស៊ីមានចំនួនត្រឹមតែ ២០០តោន ដែលគិតជាទឹកប្រាក់មានចំនួន ​ ២០០​ ៦៤០​ ដុល្លារសហរដ្ឋអាមេរិក។

ដោយឡែកការនាំអង្ករចេញទៅកាន់ប្រទេសអ៊ុយក្រែន បានបរិមាណតិចតួចបំផុតត្រឹមតែ ៥៧២ តោនតែប៉ុណ្ណោះ ក្នុងរយៈពេល៥ឆ្នាំ ចុងក្រោយនេះ។

ចំណែកទំហំពាណិជ្ជកម្មកម្ពុជា-រុស្ស៉ី កាលពីឆ្នាំ២០២១ មានចំនួនជាង ៩៤.១៨ លានដុល្លារ កើនឡើងជាង ៣០លានដុល្លារ បើធៀបនឹងកាលពីឆ្នាំ២០២០ ដែលមានចំនួន ៦៣.៨១ លានដុល្លារអាមេរិក។ ទិន្នន័យនេះ បានបញ្ជាក់ថា កម្ពុជា នាំចេញទៅរុស្ស៉ីចំនួនជាង ៥៩.៥៤លានដុល្លារ ខណៈការនាំចូលពីរុស្ស៉ីវិញមានចំនួន ៣៤.៦៤ លានដុល្លារ ។

រីឯទំហំពាណិជ្ជកម្មរវាងកម្ពុជា និងអ៊ុយក្រែន កាលពីឆ្នាំ២០២១ មានជាង ៨.៥៦លានដុល្លារ ក្នុងនោះ កម្ពុជា នាំចេញទៅអ៊ុយក្រែនចំនួនជាង ៦ លានដុល្លារ និងនាំចូលពីអ៊ុយក្រែនមានចំនួន ២.៤លានដុល្លារអាមេរិក៕

អត្ថបទ៖ ទួន សុផល