សម្ដេច ស ខេង ៖ អ្វីដែល​​ពលរដ្ឋចង់បានគឺយុត្តិធម៌ ដូច្នេះមន្ត្រីត្រូវខិតខំផ្តល់យុត្តិធម៌ជូនពួកគាត់

សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានលើកឡើងថា អ្វីដែលប្រ​ជា​​ពលរដ្ឋចង់បាន គឺយុត្តិធម៌ ដូច្នេះមន្ត្រីរាជការត្រូវខិតខំ ផ្តល់យុត្តិធម៌ជូនពួកគាត់។ ការលើកឡើង រប​ស់សម្ដេចក្រឡាហោម ស ខេង បានធ្វើឡើងក្នុងពិធីបិទសន្និបាតបូកសរុប លទ្ធផលការងារឆ្នាំ ២០២១ និងលើកទិសដៅការងារឆ្នាំ ២០២២ របស់រដ្ឋបាលខេត្តព្រះសីហនុ នៅសណ្ឋាគារសុខា ក្រុងព្រះសីហនុ។

ក្នុងពិធីនេះលោក គួច ចំរើន អភិបាលខេត្តព្រះសីហនុ បានរាយការណ៍ពីសកម្មភាពសន្និបាត ២០២១ និងលើកទិសដៅការងារឆ្នាំ ២០២២ របស់រដ្ឋបាលខេត្ត ដោយធ្វើការ បែងចែកក្រុមពិភាក្សាផ្ដល់ធាតុចូលលើរបាយការណ៍ និងទិសដៅការងារលើប្រធានបទសំខាន់ៗ សំដៅលើកកម្ពស់គុណភាព ប្រសិទ្ធ ភាពការងារ របស់រដ្ឋបាលខេត្តឆ្នាំខាងមុខ។ ការអនុវត្តគោលនយោបាយភូមិ ឃុំ-សង្កាត់ មានសុវត្ថិភាព ការអនុវត្តថវិការបស់រដ្ឋបាលខេត្ត រដ្ឋបាលក្រុង-ស្រុក និងឃុំ-សង្កាត់ ការផ្ដល់សេវាសាធារណៈ យន្តការគាំទ្ររដ្ឋបាលក្រុង-ស្រុក និងឃុំ-សង្កាត់ ការងារប្រយុទ្ធទប់ស្កាត់ការឆ្លង រាលដាល នៃជំងឺកូវីដ។

លោកអភិបាលខេត្ត បានបញ្ជាក់ថា ក្រោយពីការពិភាក្សាយ៉ាងផុលផុស លើប្រធានបទទាំង ៥ខាងលើ សន្និបាតបានរកឃើញ នូវបញ្ហាប្រឈមមានចំនួន ៧១ វិធានការដោះស្រាយចំនួន ៧៣ នឹងសំណូមពរចំនួន ៦០។ សន្និបាតនឹងប្រមូល យកបញ្ហាប្រឈម វិធានការដោះស្រាយ និងសំណូមពរទៅចងក្រងជាផែនការសកម្មភាព និងទិសដៅការងារ ដើម្បីអនុវត្តជាក់ស្ដែងឆ្នាំ ២០២២ ជាមួយការប្ដេជ្ញាចិត្តរួមគ្នាខិតខំពុះពារយ៉ាងប្ដូរផ្ដាច់ ដើម្បីរក្សាការពារសន្តិភាព ឯករាជ្យបូរណភាពទឹកដី អធិបតេយ្យភាព រក្សាការពារសន្តិសុខសណ្តាប់ធ្នាប់ និងសុវត្ថិភាពសង្គមឲ្យបានល្អ ព្រមទាំងប្ដេជ្ញាលើកកម្ពស់ស្មារតីទទួលខុសត្រូវ ក្នុងការអនុវត្តតួនាទី ភារកិច្ចរបស់រដ្ឋបាលខេត្ត ដើម្បីចូលរួមអភិវឌ្ឍប្រទេសជាតិ និងផែនការត្រៀមឆ្ពោះទៅរកការបោះឆ្នោត ជ្រើសរើសក្រុមប្រឹក្សាឃុំ-សង្កាត់អាណត្តិទី ៥ ដែលនឹងប្រព្រឹត្តទៅនៅថ្ងៃទី ៥ ខែមិថុនា ឆ្នាំ ២០២២ ខាងមុខ។

មានប្រសាសន៍ក្នុងឱកាសនោះ សម្ដេចក្រឡាហោម ស ខេង បានកោតសរសើរ និងវាយតម្លៃខ្ពស់ចំពោះ​រដ្ឋបាលខេត្តព្រះសីហនុ ក៏ដូចជាក្រុមការងាររាជរដ្ឋាភិបាល ចុះជួយខេត្តព្រះសីហនុ ដែលបានខិតខំសម្រេចបាន នូវការការពារសន្តិសុខ សណ្ដាប់ធ្នាប់សាធារណ: ការងារបម្រើសេវាសាធារណៈ និងដោះស្រាយវិវាទនានា។

សម្ដេចរដ្ឋមន្ត្រីក្រសួងមហាផ្ទៃ បានបន្តថា ដោយសារការខិតខំរបស់រដ្ឋបាលខេត្ត និងក្រុមការងារជំនះបាននូវឧបសគ្គ នឹងទទួលបានជោគជ័យជាបន្តបន្ទាប់ ទោះបីមកដល់ពេលនេះ មានបទល្មើសឧក្រិដ្ឋកម្មមាន ភាគស្មុគស្មាញដូចជា៖ ការចាប់ជំរិត ប្លន់សម្លាប់ គ្រឿងញៀន និងចរាចរណ៍ជាដើម ដោយបញ្ហាបទល្មើសឧក្រិដ្ឋកម្មទាំងនេះ បានជិះឥទ្ធិពលមិនល្អដល់ខេត្តព្រះសីហនុ តាមរយៈបណ្ដាញផ្សព្វ​ផ្សាយសង្គម បង្កឲ្យមានសតិអារម្មណ៍មិនល្អដល់អ្នកទេសចរ និងវិនិយោគ មកកាន់ខេត្តព្រះសីហនុ។

ជាមួយគ្នានេះ សម្តេចក្រឡាហោម ក៏បានលើកឡើងដែរថា រាជរដ្ឋាភិបាល បានបញ្ចេញកញ្ចប់ថវិកា ១០០លានដុល្លារ បូកនឹងប្រភពថវិកាផ្សេងទៀតសរុបជាង ៣០០លានដុល្លាអាមេរិក ធ្វើការអភិវឌ្ឍហេដ្ឋារចនាសម្ព័ន្ធផ្លូវ ក្នុងក្រុងព្រះសីហនុ ធ្វើឲ្យខេត្តព្រះសីហនុប្រែមុខមាត់ថ្មី និងក៏ជាផលប្រយោជន៍សេដ្ឋកិច្ច របស់ប្រទេសជាតិផងដែរ ដើម្បីស្រូបយកផលប្រយោជន៍ សម្រាប់ប្រជាជនកម្ពុជា។

ក្នុងនោះដែរ រាជរដ្ឋាភិបាល បានដាក់ចេញនូវគោលការណ៍ និងវិធានការដ៏មុតស្រួច ក្នុងការប្រយុទ្ធប្រឆាំងនឹងកូវីដ-១៩ ពិសេសការស្រោចវ៉ាក់សាំងជូនប្រជាពលរដ្ឋ នៅទូទាំងប្រទេស ដើម្បីបង្កើនភាពស៊ាំក្នុងខ្លួន ទប់ស្កាត់ការឆ្លងជំងឺកូវីដ -១៩។ ចំពោះគ្រឿងញៀន ខេត្តព្រះសីហនុ ក៏ជាច្រកនាំចេញ និងការ ចែកចាយប្រើប្រាស់។ ដូច្នេះអាជ្ញាធរមានសមត្ថកិច្ចពាក់ព័ន្ធ ត្រូវបង្កើនការយកចិត្តទុកដាក់ បង្ក្រាប ឲ្យបានទាន់ពេលវេលា។

សម្តេចក្រឡាហោមហោម បានបន្តទៀតថា កំណែទម្រង់វិមជ្ឈការ និងវិសហមជ្ឈការ របស់រាជរដ្ឋាភិបាល បានរៀបចំយុទ្ធសាស្ត្រកំណែ ទម្រង់ដូចជា៖ ការព្រាងច្បាប់គ្រប់គ្រងរដ្ឋបាល ឃុំ-សង្កាត់ ច្បាប់គ្រប់គ្រងរាជធានី ខេត្ត-ក្រុង។ ចំពោះរបៀបរបបការងារ ត្រូវអនុវត្តតាមលិខិត បទដ្ឋានគតិយុត្តឲ្យបានខ្ជាប់ខ្ជួន ក្នុងការប្រជុំតាមរបបកំណត់។ ក្រុង-ស្រុកចូលរួមប្រជុំឲ្យបានទៀងទាត់ មន្ត្រីត្រូវចុះទៅដល់មូលដ្ឋាន ដើម្បីដោះស្រាយបញ្ហាប្រឈមជូនប្រជាពលរដ្ឋ ហើយទទួលយកសំណើសំណូមពររបស់ពួកគាត់ចាំបាច់ យកមកដោះស្រាយប្រកបដោយយុត្តិធម៌។

ក្នុងនោះ សម្ដេចក្រឡាហោម បានគូសបញ្ជាក់ថា «អ្វីដែលពួកគាត់ចង់បានគឺយុត្តិធម៌ ដូច្នេះយើងត្រូវខិតខំផ្តល់យុត្តិធម៌ជូនពួកគាត់ គ្មានអ្វីកាត់ថ្លៃបាននោះទេ ដើម្បីពួកគាត់មានឱកាសអភិវឌ្ឍជីវភាពរស់នៅ កាន់តែល្អប្រសើរក្នុងគ្រួសារ»។

ជាចុងក្រោយសម្តេចក្រឡាហោម ស ខេង សង្ឃឹម និងជឿជាក់ថា ក្រោមការខិតខំប្រឹងប្រែងរបស់រដ្ឋ បាលខេត្ត ការខិតខំរបស់ក្រុមការងារ និងក្រោមការដឹកនាំរបស់រាជរដ្ឋាភិបាល និងការគាំទ្រពីក្រសួង ស្ថាប័នថ្នាក់ជាតិ ក៏ដូចជាការគាំទ្រការចូលរួមពីប្រជាពលរដ្ឋខេត្ត រួមគ្នាដោះស្រាយបាននូវបញ្ហាប្រឈម​នានា ដែលកំពុងមាននាពេលបច្ចុប្បន្ន ហើយបន្តអភិវឌ្ឍន៍ជីវភាពរស់នៅ របស់ប្រជាពលរដ្ឋកាន់តែល្អប្រសើរ៕

អត្ថបទ៖ ស៊ុយ ចាន់ធា