កម្ពុជា-ថៃ ប្រជុំ​ទ្វេភាគី ត្រៀមបើក​ច្រកព្រំដែនអន្តរជាតិ ស្ទឹង​បបត់-ណង​អៀន

ខេត្តបន្ទាយមានជ័យ៖ ប្រតិភូ​រដ្ឋបាលខេត្តបន្ទាយមានជ័យ កម្ពុជា និងប្រតិភូខេត្ត​ស្រះកែវ ថៃ បានបើកកិច្ចប្រជុំ​ទ្វេភាគី ស្តីពី ​ការបើក​ច្រកព្រំដែន​អន្តរជាតិស្ទឹង​បត់​ និង ណង​អៀន។​ កិច្ចប្រជុំ​នោះ ធ្វើ​នៅ​សាលប្រជុំ នៃ​ទីស្នាក់ការ​គយ នៃ​ច្រកព្រំដែន​អន្តរជាតិ ខ្លង​លឹក ស្រុក​អារញ្ញ​ប្រ​ថេត ខេត្ត​ស្រះកែវ ទល់មុខ​ច្រកព្រំដែន​អន្តរជាតិ ប៉ោយប៉ែត ខេត្តបន្ទាយមានជ័យ នៅ​រសៀលថ្ងៃទី​១០ ខែមីនា ឆ្នាំ​២០២២ នេះ។

​​ភាគី​ខេត្ត​បន្ទា​មានជ័យ ដឹកនាំ​ដោយ​លោក អ៊ុំ រាត្រី អភិបាលខេត្ត​បនបន្ទាយមានជ័យ អភិបាលរង​ខេត្ត មេបញ្ជាការ ស្នងការ នៃ​កងកម្លាំង ប្រធាន អនុប្រធាន​មន្ទីរ នាយ នាយរង​ប៉ុស្តិ៍នគរបាល ច្រកព្រំដែន​អន្តរជាតិ ប៉ោយប៉ែត និង​ច្រក​ស្ទឹង​បត់ ឯ​សម​ភាគី​ថៃ គឺ​ លោក ព្រី​ន​ប៉ៈ​យ៉ា ភោធីសាធ អភិបាលខេត្ត​ស្រះកែវ និង​មន្ត្រី​ពាក់ព័ន្ធ​។
ក្នុងកិច្ចប្រជុំ លោកអ៊ុំ រាត្រី អភិបាលខេត្តបន្ទាយមានជ័យ និង ប្រតិភូជំនាញជួបប្រជុំពិនិត្យពីវឌ្ឍនភាពការងារ និងលទ្ធភាពនៃការដឹកជញ្ជូនទំនិញ នៃច្រកព្រំដែនអន្តរជាតិថ្មីខាងសេដ្ឋកិច្ចស្ទឹងបត់ ក្រុងប៉ោយប៉ែត ខេត្តបន្ទាយមានជ័យ ប្រទេសកម្ពុជា និង ណងអៀន ស្រុកអារញ្ញប្រាថេត ខេត្តស្រះកែវ ប្រទេសថៃ។

លោក អ៊ុំ រាត្រី បានមានប្រសាសន៍ថា កិច្ចប្រជុំនេះពាក់ព័ន្ធនឹងការងារកិច្ចសហប្រតិបត្តិការចូលរួមដោះស្រាយ អំពីបញ្ហាព្រំដែន ការចរាចរណ៍ឆ្លងកាត់ព្រំដែន និងការអភិវឌ្ឍន៍សម្ព័ន្ធមេត្រីភាព រវាងខេត្តបន្ទាយមានជ័យ និងខេត្តស្រះកែវ។
លោក អ៊ុំ រាត្រី បានបញ្ជាក់ទៀតថា ខេត្តទាំង២នេះ កន្លងមកចេះគោរពគ្នាយ៉ាងខ្ជាប់ខ្ជួននូវឯករាជភាព អធិបតេយ្យភាព និងបូរណភាពទឹកដី និងមានការទំនាក់ទំនងគ្នាល្អលើគ្រប់វិស័យ។ ធ្វើឱ្យនៅតាមតំបន់ព្រំដែនមានសុខសន្តិភាព និងក្លាយជាតំបន់ប្រកបដោយសក្តានុពល លើវិស័យពាណិជ្ជកម្ម ឧស្សាហកម្ម ទេសចរណ៍ ដែលអាចបង្កងាយស្រួល ដល់ប្រជាពលរដ្ឋរស់នៅតាមតំបន់ព្រំដែនទាំងពីរ។

លោក អ៊ុំ រាត្រី បញ្ជាក់ទៀតថា កន្លងមកភាគីទាំង២តែងតែមានកិច្ចប្រជុំប្តូរវេនគ្នា ការធ្វើទស្សនៈកិច្ចពិក្សាដោះស្រាយ ដើម្បីទប់ស្កាត់នូវបទល្មើសឆ្លងដែនខុសច្បាប់ ការជួញដូរមនុស្ស ការជួញដូរគ្រឿងញៀន ការរត់ព័ន្ធខុសច្បាប់ និងទំនិញខូចគុណភាពជាដើម ក្រៅពីនេះខេត្តទាំងពីរកំពុងអនុវត្តរួមគ្នានូវការស្ថាបនាស្ពានឆ្លងកាត់ព្រំដែន និងច្រកព្រំដែនស្ទឹងបត់ ត្រៀមបើកដំណើរការទៀតផង។

ក្នុងកិច្ចប្រជុំនោះ ក៏មានពិភាគ្សាគ្នាស្តីពីបើកច្រកទ្វារតំបន់ព្រំដែន​អន្តរជាតិ ស្ទឹង​បត់-ណង​អៀន។ ក្នុងនោះលោក ព្រី​ន​ប៉ៈ​យ៉ា ភោធីសាធ បានថ្លែងអំណរគុណដល់អភិបាលខេត្តបន្ទាយមានជ័យដែលបានឆ្លៀតឱកាសចូលរួមក្នុងកិច្ចពិភាគ្សាការងារដើម្បីរឹតចំណងសាមគ្គី មិត្តភាពយូរអង្វែងរឹងមាំ និងដើម្បីភាពរីកចម្រើននៃខេត្តទាំង២ ក៏ដូចប្រជាពលរដ្ឋនៃខេត្តទាំង២៕

អត្ថបទ៖ វ៉ាន់ ណាង