សន្តិសុខសង្គម

មន្ត្រីជំនាញដុតកម្ទេចសាច់ជ្រូកនាំចូលពីប្រទេសថៃជាងកន្លះតោន

បានផុស

៣ years មុន

នៅ

ថ្ងៃចន្ទ ១៤ មីនា ២០២២

ដោយ

សាច់ជ្រូកចម្រុះប្រមាណ៦០០គីឡូក្រាមដែលលួចនាំចូលពីប្រទេសថៃ ត្រូវបានដុតកម្ទេចចោល បន្ទាប់ពីកម្លាំងជំនាញពិនិត្យឃើញថា ការនាំចូលនេះគ្មានច្បាប់អនុញ្ញាត ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចប្រតិបត្តិការនេះបានធ្វើឡើងដោយកម្លាំងនគរបាលចរាចរណ៍ស្រុកកំរៀង ដែលឈរជើងលើកំណាត់ផ្លូវជាតិលេខ៥៩ ដឹកនាំដោយលោកវរសេនីយ៍ទោ វេ គឹមចត់ អធិការនគរបាលស្រុកកំរៀង សហការជាមួយកម្លាំងនគរបាលវរសេនាតូចនគរបាលការពារព្រំដែនគោកលេខ៨១៩ លោកវរសេនីយ៍ឯក ម៉ង់ ស៊ី កាលពីថ្ងៃទី១៣ ខែមីនា ឆ្នាំ២០២២ បានធ្វើការឃាត់រថយន្តមួយគ្រឿងម៉ាក LEXUS RX300ពណ៌ខ្មៅ ពាក់ស្លាកលេខ ព្រះសីហនុ2A-7015 នៅចំណុចក្បែរច្រកទ្វារអន្តរជាតិដូង ស្ថិតក្នុងភូមិបឹងរាំង ឃុំបឹងរាំង ស្រុកកំរៀង ខេត្តបាត់ដំបង ខណ:ដែលរថយន្តមួយគ្រឿងនេះព្យាយាមបើករត់គេចពីសមត្ថកិច្ចដែលកំពុងបំពេញភារកិច្ចតាមដងផ្លូវ ។

សមត្ថកិច្ចបានឲ្យដឹងថា អ្នកបើករថយន្តឈ្មោះ រ៉ន ធឿត ភេទប្រុស អាយុ៣០ឆ្នាំ រស់នៅភូមិព្រែកឆ្តោរ ឃុំពាមឯក ស្រុក ឯកភ្នំ ខេត្តបាត់ដំបង ហើយនៅពេលសមត្ថកិច្ចធ្វើការពិនិត្យក្នុងរថយន្តរកឃើញមានគ្រឿងក្នុងសាច់ជ្រូកប្រមាណ៦០០គីឡូក្រាម។

លោកឧត្តមសេនីយ៍ត្រី ចេង ឡេង ស្នងការរងផែនប្រឆាំងបទល្មើសសេដ្ឋកិច្ច លោកវរសេនីយ៍ឯក យី យក់សាន នាយការិយាល័យ រួមជាមួយមន្រ្តីជំនាញកាំកុងត្រូល និងមន្រ្តីជំនាញបសុពេទ្យ នាំយកសាច់គ្រឿងក្នុងជ្រូកខូចគុណភាពទៅដុតកម្ទេចចោលនៅទីលានចាក់សំរាម ស្ថិតក្នុងភូមិថ្មីឃុំអូរដា ស្រុកកំរៀង ខេត្តបាត់ដំបង វេលាម៉ោង១និង០០នាទីថ្ងៃដដែល រីឯរថយន្តនិងម្ចាស់បាននាំមកកាន់ការិយាល័យជំនាញដើម្បីអនុវត្តតាមផ្លូវច្បាប់៕

អត្ថបទ៖ សោ និយមរ័ត្ន