មកដឹងតម្លៃប្រេងសាំង នៅខេត្តកំពត

ជាទូទៅតម្លៃប្រេង នៅតាមស្ថានីយរបស់ក្រុមហ៊ុននានា ក្នុងខេត្តកំពតហាក់នៅធម្មតា តែនៅកន្លែងលក់រាយធម្មតា បែរជាមានតម្លៃខ្ពស់ជាងដោយក្នុង ១លីត្រ​ ខុសគ្នាចាប់ពី ៥០០រៀល ទៅ ៧០០រៀល។

ក្នុងដំណាក់កាលប្រេងសាំង ឬប្រេងម៉ាស៊ូតកំពុងឡើងថ្លៃ ដែលបណ្តាលមកពីវិបត្តិអ៊ុនក្រែន-រុស្ស៊ី បានធ្វើឲ្យអ្នកប្រើប្រាស់យានយន្តគ្រប់ប្រភេទ ត្រូវសម្រេចចិត្តជ្រើសរើសតែស្ថានីយប្រេងណា ដែលលក់ធូរថ្លៃ ជាពិសេសស្ថានីយប្រេងឥន្ធនៈ ដែលក្រុមហ៊ុនច្បាស់លាស់។  

ប៉ុន្តែបើនិយាយពីកន្លែងលក់រាយធម្មតា ដែលភាគច្រើនបើកអាជីវកម្ម នៅតាមបណ្តាស្រុក-ក្រុង បែរជាមានតម្លៃខ្ពស់ ពោលគឺការលក់ដូរតាមហាងឆេងផ្ទាល់មាត់ ដោយពុំបានដាក់តាំងតម្លៃជាក់លាក់ ដូចស្ថានីយប្រេងឥន្ធនៈ របស់ក្រុមហ៊ុននោះឡើយ។

លោក ស្រី កុម្ភៈ ប្រធានមន្ទីរពាណិជ្ជកម្មខេត្តកំពត បានប្រាប់ភ្នាក់ងារកម្ពុជាថ្មី នៅព្រឹកថ្ងៃទី ១៥ ខែមីនា ឆ្នាំ ២០២២ នេះថា បើទោះជាមានវិបត្តិរវាងប្រទេសអ៊ុយក្រែន ជាមួយរុស្ស៊ីយ៉ាងណាក្ដី តែតម្លៃប្រេងសាំងនៅតាមស្ថានីយរបស់ក្រុមហ៊ុននានា នៅតែលក់ទៅតាមតារាងនៃតម្លៃ របស់ក្រសួងពាណិជ្ជកម្មបានកំណត់។

លោកបានបញ្ជាក់ទៀតថា ជាទូទៅសម្រាប់តម្លៃប្រេងសាំងស៊ុបពែរ ក្នុង ១លីត្រ មានតម្លៃ ៥៣០០រៀល និងកន្លែងខ្លះ ៥៣៥០រៀល, សាំងធម្មតា ១លីត្រ ៤៨០០រៀល, និងប្រេងម៉ាស៊ូត ក្នុង ១លីត្រ តម្លៃ ៤៥០០រៀល៕

អត្ថបទ៖ សេង ណារិទ្ធ