AstraZeneca ជាង ៥២ ម៉ឺនដូស ជាជំនួយរបស់ ហុងគ្រី នឹងមកដល់កម្ពុជា នៅយប់នេះ

វ៉ាក់សាំងបង្ការជំងឺកូវីដ-១៩ ប្រភេទ AstraZeneca ចំនួន ៥២៣ ១០០ ដូសទៀតដែលជាជំនួយរបស់រដ្ឋាភិបាលហុងគ្រី ជូនរាជរដ្ឋាភិបាលកម្ពុជា នឹងត្រូវបានដឹកដល់រាជធានីភ្នំពេញ តាមយន្តហោះតួគី (TK 6266) នៅវេលាម៉ោង ៧ យប់ ថ្ងៃទី១៥ ខែមីនា ឆ្នាំ២០២២នេះ។

លោកស្រីវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល និងភារធារីស្ថានទូតហុងគ្រី នឹងទៅទទួលនៅអាកាសយានដ្ឋានភ្នំពេញអន្តរជាតិភ្នំពេញ។

លោកស្រីវេជ្ជបណ្ឌិត យក់ សម្បត្តិ បានមានប្រសាសន៍ថា ចំណែកកម្មវិធីប្រគល់ទទួលវ៉ាក់សាំងផ្លូវការ នឹងប្រារព្ធធ្វើឡើងនៅវិមានសន្តិភាព ក្រោមអធិបតីភាពរបស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅព្រឹកថ្ងៃទី១៨ ខែមីនា ឆ្នាំ២០២២។

​រហូតមក​ដល់ពេលនេះ​ កម្ពុជា​ទទួលបាន​វ៉ាក់សាំង​បង្ការ​ជំងឺ​កូវីដ-​១៩ ​ទាំង​ការបញ្ជាទិញ​ និង​ជំនួយ​សរុប​ប្រហែល​ជាង​៤៣​ លាន ៥០ ម៉ឺន​ដូ​ស​ហើយ​ រួមទាំង​វ៉ាក់សាំង​បង្ការ​ជំងឺ​កូ​វីដ​-១៩ ប្រភេទ Astra Zeneca ចំនួន​ជាង ៥២ ​ម៉ឺន​ដូ​ស​ដែលជា​ជំនួយ​របស់​រដ្ឋាភិបាល ​និង​ប្រជាជន​ប៉ូហុងគ្រី​ នេះ​​។

គិតត្រឹមថ្ងៃទី១៤ ខែមីនា ឆ្នាំ២០២២ ក្រសួងសុខាភិបាល និងក្រសួងការពារជាតិ បានចាក់វ៉ាក់សាំងការពារកូវីដ១៩ ជូនមន្រ្តីរាជការ កងកម្លាំងប្រដាប់អាវុធ និងប្រជាពលរដ្ឋ នៅទូទាំងប្រទេសសរុបចំនួន ១៤ ៧៥៧ ២០៥ នាក់៕

អត្ថបទ៖ សំអឿន