ព័ត៌មានជាតិ

មេបញ្ជាការកងទ័ពជើងទឹកជប៉ុន មិនធ្វើអត្ថាធិប្បាយចំពោះការចោទប្រកាន់របស់អាមេរិកលើ មូលដ្ឋានកងទ័ពជើងទឹកសមុទ្ររាម

បានផុស

៣ years មុន

នៅ

ថ្ងៃពុធ ១៦ មីនា ២០២២

ដោយ

គណៈប្រតិភូនាវាស្វ័យការពារជើងទឹកជប៉ុន ដឹកនាំដោយលោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំព្រះរាជាណាចក្រកម្ពុជា អមដំណើរដោយលោកវរនាវីឯក NOGUCHI Yasushi មេបញ្ជាការកងពលធំទី ១ បោសសំអាតមីន ប្រចាំតំបន់ឥណ្ឌូប៉ាស៊ីហ្វិក របស់ជប៉ុន បានអញ្ជើញទស្សនកិច្ចនៅទីបញ្ជាការកងទ័ពជើងទឹកមូលដ្ឋានសមុទ្ររាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងដំណើរប្រមាណ ១ ម៉ោងកន្លះ ចេញពីកំពង់ផែពហុបំណងក្នុងខេត្តព្រះសីហនុ ទៅកាន់ទីបញ្ជាការកងទ័ពជើងទឹកមូលដ្ឋានសមុទ្ររាម ប្រតិភូកងទ័ពជើងទឹកជប៉ុនមានចំនួន ៤ រូបក្នុងនោះ មានសេនានុពន្ធយោធាជប៉ុន ១ រូប និងឯកអគ្គរាជទូតជប៉ុនប្រចាំកម្ពុជា ១ រូបផង បានទៅដល់នៅវេលាម៉ោងប្រមាណ ១០ ព្រឹក ហើយខណៈនោះ ទទួលទទួលបានស្វាគមន៍យ៉ាងកក់ក្តៅពីលោកឧត្តមនាវីឯក អ៊ុក សីហា មេបញ្ជាការរងកងទ័ពជើងទឹក មេបញ្ជាការមូលដ្ឋានសមុទ្រ។

នៅពេលទៅដល់ទីបញ្ជាការកងទ័ពជើងទឹកមូលដ្ឋានសមុទ្ររាម គណៈប្រតិភូជប៉ុនបានធ្វើទស្សនកិច្ចស្ទើរពេញមូលដ្ឋានទ័ពរាមតែម្ដង ដើម្បីពិនិត្យមើលទិដ្ឋភាពមួយចំនួន រួមទាំងការអភិវឌ្ឍនានានៅទីនោះ ដោយមានការណែនាំ និងបង្ហាញដោយផ្ទាល់ពីលោកឧត្តមនាវីឯក អ៊ុក សីហា។ នៅទីនោះ ប្រតិភូកងទ័ពទាំងពីរ គឺកម្ពុជា និងជប៉ុន ក៏បានជួបពិភាក្សាលើការងារមួយចំនួនទៀតផងដែរ។

នៅពេលមានសំណួរពីអ្នកសារព័ត៌មាន ទាក់ទងទៅនិងគោលបំណងនៃដំណើរទស្សនកិច្ច និងការចោទប្រកាន់មួយចំនួនរបស់អាមេរិកដែលថា កម្ពុជាបានផ្ដល់មូលដ្ឋានឲ្យកងទ័ពបរទេសនោះ លោកវរនាវីឯក NOGUCHI Yasushi មិនបានអត្ថាធិប្បាយយ៉ាងណាទេ ប៉ុន្តែលោកបញ្ជាក់ថា ដំណើរទស្សនកិច្ចនេះ គឺដើម្បីបង្ហាញពីចំណងមិត្តភាព និងកិច្ចសហប្រតិបត្តិការ ព្រមទាំងអបអរសាទរខួប ៣០ ឆ្នាំ នៃការបញ្ជូនកម្លាំងរក្សាសន្តិភាពជប៉ុន មកកាន់ប្រទេសកម្ពុជាលើកទី ១ ហើយទស្សនកិច្ចនេះ ក៏ដើម្បីជួបសំដែងការគួរសមជាមួយលោកឧត្តមនាវីឯក អ៊ុក សីហា ដើម្បីស្វែងយល់ពីការងារសំខាន់ៗនៅមូលដ្ឋានទ័ពរាមនេះ។

គួររំលឹកថា មូលដ្ឋានសមុទ្ររាមនេះ ទទួលរងការចោទប្រកាន់ម្តងហើយម្តងទៀត ពីសហរដ្ឋអាមេរិកថា កម្ពុជាបានប្រគល់មូលដ្ឋានទ័ពរាមនេះ ទៅកងទ័ពបរទេសឈរជើង (កងទ័ពចិន) ហើយបើទោះបីជាមានការបកស្រាយយ៉ាងណា ក៏មិនបានធ្វើឲ្យអាមេរិកស្ងប់ចិត្តឡើយ៕

អត្ថបទ៖ កោះកែវ