ព័ត៌មានជាតិ

ឧត្តមសេនីយ៍ឯក ឌី វិជ្ជា ស្នើឲ្យអោយក្រុមហ៊ុនទាំងអស់សហការផ្តល់ព័ត៍មានដើម្បីបង្ក្រាបបទល្មើសទាន់ពេលវេលា

បានផុស

៣ years មុន

នៅ

ថ្ងៃព្រហស្បតិ៍ ១៧ មីនា ២០២២

ដោយ

ការស្នើឲ្យក្រុមហ៊ុនសន្តិសុខឯកជនទាំងអស់ផ្តល់កិច្ចសហការរបស់ឯកឧត្តម ឧត្តមសេនីយ៍ឯក ឌី វិជ្ជា បានធ្វើឡើងខណៈអញ្ជើញជាអធិបតីបើកកិច្ចប្រជុំជាមួយក្រុមហ៊ុនសន្តិសុខឯកជន និងកាស៊ីណូ នៅខេត្តព្រះសីហនុ នាថ្ងៃព្រហស្បតិ៍ ទី១៧ ខែមីនា ឆ្នាំ២០២២ នេះ ដើម្បីពង្រឹងកិច្ចសហការ ពាក់ព័ន្ធការរក្សាសន្តិសុខ សណ្តាប់ធ្នាប់ និងរបៀបរាបរយ ក្នុងខេត្តព្រះសីហនុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងកិច្ចប្រជុំនោះ លោកឧត្តម សេនីយ៍ឯក លឹម សុខារស្មី ប្រធាននាយកដ្ឋាន គ្រប់គ្រងសន្តិសុខឯកជន បានលើកឡើងអំពីការគ្រប់គ្រងភ្នាក់ងារសន្តិសុខឯកជន និងបញ្ហាប្រឈមរបស់ភ្នាក់ងារសន្តិសុខឯកជននៅខេត្តព្រះសីហនុ។

ចំណែកលោកឧត្តមសេនីយ៍ឯក អ៊ុក ហៃសិលា អគ្គនាយករងអន្តោប្រវេសន៍ បានណែនាំអោយក្រុមហ៊ុនសន្តិសុខឯកជន ដែលមានភ្នាក់ងារតាមគោលដៅ ដែលមានជនបរទេសស្នាក់នៅ ត្រូវរាយការណ៍អោយបានច្បាស់លាស់ ដើម្បីបញ្ចូលក្នុងប្រព័ន្ធទិន្នន័យអន្តោប្រវេសន៍។

មានប្រសាសន៍ទៅកាន់អង្គប្រជុំ ឯកឧត្តម ឧត្តមសេនីយ៍ឯក ឌី វិជ្ជា បានកោតសរសើរដល់ភ្នាក់ងារសន្តិសុខឯកជន ដែលបានខិតខំប្រឹងប្រែងចូលរួមថែរក្សាសន្តិសុខសណ្តាប់ធ្នាប់ក្នុងសង្គម ក៏ដូចជាការបង្ក្រាប ទប់ស្កាត់បទល្មើសផ្សេងៗ ។ជាមួយគ្នាផងដែរ។ ឯកឧត្តម បានសំណូមពរអោយក្រុមហ៊ុនទាំងអស់តាមដានត្រួតពិនិត្យទៅលើបទល្មើសតាមបណ្ដាគោលដៅ និងចូលរួមសហការផ្តល់ព័ត៌មានដល់សមត្ថកិច្ចមូលដ្ឋានដើម្បីបង្រា្កបអោយបានទាន់ពេលវេលា និងស្នើរអោយពង្រឹងសមត្ថភាព លក្ខណៈសម្បត្តិ ការគ្រប់គ្រងអោយស្របទៅតាមស្តង់ដាតែមួយ ។

ចុងក្រោយឯកឧត្តម បានស្នើរអោយសមត្ថកិច្ច និងភ្នាក់ងារសន្តិសុខឯកជនទាំងអស់ចូលរួមថែរក្សាសុខភាពអោយបានល្អ អនុវត្តទៅតាមគោលការណ៍របស់រាជរដ្ឋាភិបាល និងក្រសួងសុខាភិបាល ៣កុំ ៣ការពារ ដើម្បីជៀសវាងនូវការចម្លងជំងឺកូវីដ-១៩ និងសូមចូលរួមចាក់វ៉ាក់សាំងដូសជំរុញអោយបានគ្រប់ៗគ្នា។

សូមបញ្ជាក់ថា កិច្ចប្រជុំនោះ ក្រោមអធិប តីភាព ឯកឧត្តម ឧត្តមសេនីយ៍នឯក ឌី វិជ្ជា អគ្គស្នងការរងនគរបាលជាតិ និងជាប្រធាននាយកដ្ឋានកណ្តាលសន្តិសុខ តំណាងឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ដោយមានការចូលរួមពីលោកឧត្តមសេនីយ៍ឯក អ៊ុក ហៃសិឡា អគ្គនាយករងអន្តោប្រវេសន៍ និងលោក ម៉ាង ស៊ីណេត អភិបាលរងខេត្តព្រះសីហនុ លោកស្នងការ ស្នងការរង និងនាយការិយាល័យគ្រប់គ្រងសន្តិសុខឯកជន នៃស្នងការដ្ឋាននគរបាលខេត្តព្រះសីហនុ ព្រមទាំងមានការចូលរួមពីបណ្តាក្រុមហ៊ុនសន្តិសុខឯកជន និងកាស៊ីណូទាំងអស់ នៅក្នុងខេត្តព្រះសីហនុ៕

ដោយ ៖ កោះកែវ