សម្ដេចតេជោ ហ៊ុន សែន អញ្ជើញទទួលវ៉ាក់សាំងកូវីដជាង ៥២ម៉ឺនដូស ដែលជាជំនួយរបស់ហុងគ្រី នាព្រឹកនេះ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅព្រឹកថ្ងៃទី ១៨ ខែមីនា ឆ្នាំ ២០២២នេះ បានអញ្ជើញ​ជាអធិបតីក្នុងពិធីប្រគល់-ទទួលអំណោយជាវ៉ាក់សាំងកូវីដ-១៩ ប្រភេទ AstraZeneca ពីរដ្ឋាភិបាល និងប្រជាជន នៃប្រទេស ហុងគ្រី ជូនរាជរដ្ឋាភិបាល និងប្រជាជននៃព្រះរាជាណាចក្រកម្ពុជា ដើម្បីទប់ស្កាត់ការរីករាលដាលជំងឺកូវីដ-១៩។ ពិធីនេះ ធ្វើឡើងនៅវិមានសន្តិភាព ទីស្ដីការនាយករដ្ឋមន្ត្រី ដោយមានការចូលរួមពីភារៈធារីស្ដីទី នៃស្ថានទូតហុងគ្រីប្រចាំកម្ពុជា និងមន្ត្រីពាក់ព័ន្ធជាច្រើនរូបទៀត។

សូមជម្រាបថា វ៉ាក់សាំងបង្ការជំងឺកូវីដ-១៩ ប្រភេទ AstraZeneca ចំនួន ៥២៣ ១០០ ដូសទៀត ដែលជាជំនួយរបស់រដ្ឋាភិបាលហុងគ្រី ជូនរាជរដ្ឋាភិបាលកម្ពុជា ត្រូវបានដឹកដល់រាជធានីភ្នំពេញ តាមយន្តហោះតួគី (TK 6266) កាលពីយប់ថ្ងៃទី ១៥ ខែមីនា ឆ្នាំ ២០២២កន្លងទៅនេះ៕  

អត្ថបទ៖ ឃួន សុភ័ក្រ