សម្តេចតេជោ ហ៊ុន សែន ស្នើអារ៉ាប៊ីសាអូឌីតជំរុញកិច្ចសហប្រតិបត្តិការ លើវិស័យដែលមានសក្តានុពល

សម្តេចតេជោ ​ហ៊ុន សែន នាយករដ្ឋមន្រ្តីនៃកម្ពុជា បានស្នើឲ្យព្រះអង្គម្ចាស់ ហ្វាសាស់ ​ប៊ីន ហ្វាហាន់ អាល់ សូដ រដ្ឋមន្រ្តីការបរទេសអារ៉ាប៊ីសាអូឌីត ជំរុញកិច្ចសហប្រតិបត្តិការលើរាល់វិស័យសក្តានុពល ដែលប្រទេសទាំងពីរមាន ជាពិសេស លើវិស័យទេសចរណ៍ កសិកម្ម ពាណិជ្ជកម្ម ដោយរៀបចំផែនការសកម្មភាព និងអនុវត្តបានជោគជ័យ។

សម្តេចតេជោនាយករដ្ឋមន្រ្តី បានស្នើបែបនេះទៅកាន់ព្រះអង្គម្ចាស់ ហ្វាសាស់ ​ប៊ីន ហ្វាហាន់ អាល់ សូដ ដែលត្រូវបានអនុញ្ញាតឲ្យចូលជួបសម្ដែងការគួរសម និងពិភាក្សាការងារ នារសៀលថ្ងៃទី ១៨ ខែ​មីនា ២០២២នេះ នៅវិមានសន្តិភាព ។

នៅក្នុងជំនួបនោះ ព្រះម្ចាស់ ហ្វាសាស់ ​ប៊ីន ហ្វាហាន់ អាល់ សូដ រដ្ឋមន្រ្តីការបរទេសអារ៉ាប៊ីសាអូឌីត បាននាំយកនូវការផ្ដាំផ្ញើសួរសុខទុក្ខ ពីសំណាក់ព្រះមហាក្សត្ររាជទាយាទ ជូនចំពោះសម្ដេចតេជោនាយករដ្ឋមន្ត្រី។ ក្នុងនោះ ព្រះម្ចាស់ ហ្វាសាស់ បានគោរពជម្រាបជូនសម្ដេចតេជោថា ដំណើរទស្សនកិច្ចនៅព្រះរាជាណាចក្រកម្ពុជា នៅពេលនេះ គឺតាមការណែនាំរបស់ព្រះមហាក្សត្រអារ៉ាប៊ីសាអូឌីត ដើម្បីពង្រីកចំណងមិត្តភាព រវាងប្រទេសទាំងពីរផង និងដើម្បីពង្រីកកិច្ចសហប្រតិបត្តិការ រវាងប្រទេសទាំងពីរផង។

ព្រះម្ចាស់ ហ្វាសាស់ បានមានបន្ទូលថា តាមរយៈកិច្ចពិភាក្សា ជាមួយលោកឧបនាយករដ្ឋមន្ត្រី​ ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ ប្រទេសទាំងពីរ កម្ពុជា-អារ៉ាប៊ីសាអូឌីត មានសក្ដានុពលច្រើន សម្រាប់ធ្វើកិច្ច សហប្រតិបត្តិការដូចជា៖ វិស័យទេសចរណ៍ បច្ចេកវិទ្យាថាមពល អប់រំ វប្បធម៌ និង កសិកម្ម។ល។ ក្នុងន័យនេះ ព្រះម្ចាស់ បានសុំការណែនាំពីសម្ដេចតេជោ ហ៊ុន សែន សម្រាប់កិច្ចសហប្រតិបត្តិការនេះ។

ជាការឆ្លើយតបសម្ដេចតេជោ ក៏បានយល់ស្របជាមួយព្រះម្ចាស់ហ្វាសាស់ ហើយបានស្វាគមន៍ និងលើកទឹកចិត្តឲ្យព្រះម្ចាស់ ហ្វាសាស់ ជំរុញកិច្ចសហប្រតិបត្តិការលើរាល់វិស័យសក្តានុពល ដែលប្រទេសទាំងពីរមាន ជាពិសេសលើវិស័យ ទេសចរណ៍ កសិកម្ម ពាណិជ្ជកម្ម រៀបចំផែនការសកម្មភាពនិងអនុវត្តឲ្យបានជោគជ័យ៕

អត្ថបទ៖ ណារី