​ប្រធានាធិបតីចិន ​ចាត់ទុកទស្សនកិច្ច ​របស់សម្ដេចតេជោទៅមីយ៉ាន់ម៉ា​​ថា មានសារៈសំខាន់ក្នុងការ​ដោះស្រាយបញ្ហា​​ក្នុងតំបន់​

ការលើកឡើងរបស់លោក ស៊ី ជិនពីង ប្រធានាធិបតីចិន បាន​ធ្វើឡើង​នៅក្នុងជំនួប​​ពិភាក្សាការងារ តាមទូរស័ព្ទ​ជាមួយ​​​សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅរសៀលថ្ងៃទី ១៨ ខែមីនា ឆ្នាំ២០២២នេះ។

លោក​បណ្ឌិត កៅ គឹមហួន រដ្ឋមន្ត្រីប្រតិភូអម​នាយករដ្ឋមន្ត្រី បានថ្លែងប្រាប់អ្នកសារព័ត៌មាន​ក្រោយ​កិច្ចពិភាក្សាថា នៅក្នុងជំនួបនោះលោក ស៊ី ជិនពីង និង​​សម្តេច​តេជោ ហ៊ុន សែន បាន​​​ពិភាក្សាទៅលើចំណុចជាច្រើន នៅក្នុងកម្រិតទ្វេភាគីតំបន់ និង​មានការផ្លាស់ប្តូរ​ជុំវិញបញ្ហា​ របស់ពិភពលោកផងដែរ។ លោកថា ជារួមការ​ពិភាក្សាផ្តោតទៅលើការពង្រឹង និងពង្រីក​​ទំនាក់ទំនងទ្វេភាគីរវាងកម្ពុជា ​និងចិន។

លោក ស៊ី ជិនពីង លើកឡើង​​ថា ដោយសា​​កិច្ចព្រម​ព្រៀងពាណិជ្ជកម្មសេរីរវាង​កម្ពុជា និងចិន បានចូលជាធរមាន។ ដូច្នេះចិន នឹងនាំចូលអង្ករឲ្យបានកាន់តែច្រើនជាងមុន ព្រមទាំងផលិត​ផលកិសកម្មមួយចំនួនទៀត ដូចជា៖ ផ្លែចេក ស្វាយ និងផ្លែមៀនជាដើម ដើម្បីរួមចំណែកកាត់បន្ថយភាពក្រីក្រនៅកម្ពុជា។ ជាមួយគ្នានោះ ​បានប្រកាសគាំទ្រ​ដល់គម្រោងអភិវឌ្ឍទាំងឡាយនៅកម្ពុជា ជាពិសេសការអភិវឌ្ឍលើហេដ្ឋារចនាសម្ព័ន្ធ។

អ្វីដែលសំខាន់ទៀតនោះ នៅក្នុងកិច្ចពិភាក្សា លោក ស៊ី ជិនពីង​ ​បានប្រកាសផ្តល់ជំនួយជាថ្មី នូវវ៉ាក់សាំងបង្ការជំងឺកូវីដ-១៩ ចំនួន ​២០​លានដូស ហើយក្នុងចំណោម​ ២០​លានដូសនេះ ៥លានដូស នឹងមកដល់កម្ពុជា នៅចុងខែមីនា ឆ្នាំ ២០២២នេះ។ លោកប្រធានាធិបតី ក៏បាន​​ប្រ​កាសធ្វើការរួមគ្នាជាមួយ​កម្ពុជា ក្នុងការបង្កើតរោងចក្រផលិតវ៉ាក់សាំងនៅកម្ពុជា នាពេលខាងមុខផងដែរ។ លើកឡើង នៅក្នុងឱកាសនោះដែរ លោក ស៊ី ជិនពីង ​បាន​ជំរុញបង្កើតជើងហោះហើររវាងប្រទេសទាំងពីរ​ គឺកម្ពុជា និងចិន។

ពាក់ព័ន្ធបញ្ហាអាស៊ាន-ចិន ដោយសារតែអាស៊ាន និងចិន ទើបនឹងដំឡើងកម្រិតទំនាក់ទំនង​របស់ខ្លួន​ទៅជាដៃគូយុទ្ធសាស្ត្រគ្រប់ជ្រុងជ្រោយកាលពីឆ្នាំ២០២១ លោកប្រធា​នាធិបតី​ បានប្រកាសគាំទ្រកម្ពុជា ក្នុងការធ្វើជាប្រធានអាស៊ាននៅឆ្នាំ២០២២នេះ។ ជាពិសេសគាំទ្រតួនាទីប្រ​ធានអាស៊ានរបស់កម្ពុជា លើបញ្ហានៅក្នុងតំបន់ និងលើពិភពលោក។ លោក ស៊ី ជិនពីង បានគូសរំលេចថា អាស៊ាន និងចិន ត្រូវធ្វើយ៉ាងណារួមចំណែករក្សាសន្តិភាព ស្ថេរភាព ការអភិវឌ្ឍ និងវិបុលភាពនៅក្នុងតំបន់។ ជាពិសេសធ្វើយ៉ាងពង្រីកនូវកិច្ចសហប្រតិបត្តិការរវាងអាស៊ាន និងចិន។

លោក ស៊ី ជិនពីង ​បានគាំទ្រការធ្វើដំណើរទស្សនកិច្ចរបស់សម្តេចតេជោ ហ៊ុន សែន ទៅកាន់មីយ៉ាន់ម៉ា ​​កាលពីខែមករា​កន្លងទៅនេះ។ លោកបានចាត់ទុកដំណើរទស្សនកិច្ចរបស់សម្តេចតេជោ​ថា មានសារៈសំខាន់ក្នុងចូលរួមចំណែកដោះស្រាយបញ្ហារបស់មីយ៉ាន់ម៉ា ដែល​ជាមធ្យោ​​បាយចូលរួមដំណោះស្រាយតាមផ្លូវអាស៊ាន។

ក្នុងជំនួបពិភាក្សានេះ សម្តេច​តេជោ ហ៊ុន សែន បានអញ្ជើញលោក ស៊ី ជិនពីង ​មកបំពេញ​ទស្សនកិច្ចនៅកម្ពុជាក្នុងពេលវេលាសមស្របណាមួយ ហើយលោកប្រធានាធិបតីចិន បានទទួលយកនូវការអញ្ជើញនេះ ហើយនឹងធ្វើការងារជាភាគីពាក់ព័ន្ធ ដើម្បីទស្សនកិច្ចនៅកម្ពុជា នាពេលខាងមុខ។

ជាមួយគ្នានោះ លោកប្រធានាធិបតីចិន ក៏បានអញ្ជើញសម្តេចតេជោ ហ៊ុន សែន ទៅទស្សន​កិច្ចនៅប្រទេសចិន ក្នុងពេលវេលាសមស្របណាមួយ ជាពិសេសក្រោយការរាតត្បាតជំងឺកូវីដ១៩៕

អត្ថបទ៖ កោះកែវ​