ឧបនាយករដ្ឋមន្ត្រី​ ប្រាក់ សុខុន ទទួល​យកការ​អញ្ជើញ ដើម្បី​បំពេញ​ទស្សន​កិច្ច​នៅ​អារ៉ាប៊ីសាអូឌីត​ នាពេលខាងមុខ

តាមការអញ្ជើញ​របស់ព្រះអង្គម្ចាស់​ ហ្វាសាល់ ប៊ីន ហ្វាហាន់ អាល់ សូដ (His Highness Prince Faisal bin Farhan Al Saud ) រដ្ឋមន្ត្រីការបរទេស នៃព្រះរាជាណាចក្រអារ៉ាប៊ីសាអូឌីត

លោក​ឧបនាយករដ្ឋមន្ត្រី​ ប្រាក់ សុខុន រដ្ឋមន្ត្រីការបរទេស​ និងសហប្រតិបត្តិការ​អន្តរជាតិ នៃព្រះរាជាណាចក្រកម្ពុជា បានទទួលយករួចហើយ ដើម្បីបំពេញទស្សនកិច្ច​ផ្លូវការ នាពេលខាងមុខ។

លោកឧបនាយករដ្ឋមន្ត្រី ប្រាក់ សុខុន បានឲ្យដឹងនៅរសៀលថ្ងៃទី ១៩ ខែមីនា នេះថា ពីម្សិលមិញ គឺជាព្រឹត្តិការណ៍សំខាន់ថ្មីមួយទៀតសម្រាប់ទំនាក់ទំនងទ្វេភាគីកម្ពុជា និងអារ៉ាប៊ីសាអូឌីត ខណៈ​ដែល​លោកបានស្វាគមន៍ ព្រះអង្គម្ចាស់ ហ្វាសាល់ ប៊ីន ហ្វាហាន់ អាល់ សូដ រដ្ឋមន្ត្រីការបរ​ទេស នៃព្រះរាជាណាចក្រអារ៉ាប៊ីសាអូឌីត មកកាន់ប្រទេសកម្ពុជា ហើយនេះក៏ជាដំណើរទស្សន​កិច្ចផ្លូវ​ការរបស់រដ្ឋមន្ត្រីការបរទេសអារ៉ាប៊ីសាអូឌីត លើកដំបូងក្នុងប្រវត្តិសាស្រ្តផងដែរ​។ 

លោកថា យើងមានប្រធានបទច្រើនត្រូវពិភាក្សាក្នុងជំនួបរយៈពេលខ្លីនោះ បើតាម​លោកឧបនាយករដ្ឋមន្ត្រី ប្រាក់ សុខុន យើងដឹងច្បាស់ណាស់ថា ប្រទេសទាំងពីរមាន​សក្តានុ​ពល​ខ្ពស់​ក្នុងការទាញយកផលប្រយោជន៍ទៅវិញទៅមកពីទំនាក់ទំនង និងកិច្ចសហប្រតិបត្តិការ​កាន់តែ​ជិតស្និទ្ធលើគ្រប់វិស័យ។ ខណៈដែលយើងរំពឹងទុកថា មិត្តភាពរវាងប្រទេស​ទាំងពីរនឹងកាន់​តែបន្ត​រីកលូតលាស់។

សូមបញ្ជាក់ថា ព្រះអង្គម្ចាស់ ហ្វាសាល់ ប៊ីន ហ្វាហាន់ អាល់ សូដ (His Highness Prince Faisal bin Farhan Al Saud ) រដ្ឋមន្ត្រីការបរទេសនៃព្រះរាជាណាចក្រអារ៉ាប៊ីសាអូឌីត បានយាងមកបំពេញ​ទស្សនកិច្ចផ្លូវការនៅព្រះរាជាណាចក្រកម្ពុជានៅថ្ងៃទី ១៨ ខែមីនា ឆ្នាំ២០២២ សំដៅពង្រឹង​ទំនាក់ទំនង និងកិច្ចសហប្រតិបត្តិការទ្វេភាគីរវាងប្រទេសទាំងពីរ តាមការអញ្ជើញរបស់លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា។

ក្នុងឱកាសនៃព្រះរាជទស្សនកិច្ចនេះ ព្រះអង្គម្ចាស់ ហ្វាសាល់ ប៊ីន ហ្វាហាន់ អាល់ សូដ បានយាង​ចូលជួបសម្តែងការគួរសមចំពោះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃ ព្រះរាជាណាចក្រកម្ពុជា ហើយសម្តេចតេជោនាយករដ្ឋមន្រ្តី បានយាងព្រះអង្គម្ចាស់រាជ​ទាយាទ Mohammed bin Salman នៃព្រះរាជាណាចក្រអារ៉ាប៊ីសាអូឌីត មកបំពេញព្រះរាជ​ទស្សន​កិច្ច​ផ្លូវការនៅកម្ពុជាផងដែរ៕

អត្ថបទ៖ កោះកែវ