សម្តេចតេជោ៖ ​លោក ឆែម សាវុធ ជាជនរងគ្រោះដោយ​សារកូវីដ-១៩

ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានថ្លែងថា លោក ឆែម សាវុធ អគ្គនា​យកពន្ធនាគារ នៃក្រសួង​មហាផ្ទៃ​ និងក្រុមគ្រួសាររបស់លោក​ គឺ​បានរងគ្រោះ ដោយសារជំងឺកូវីដ-១៩។

មានប្រសាសន៍ថ្លែងសារផ្ញើជនរួមជាតិ ពាក់ព័ន្ធនឹងស្ថានភាពជំងឺកូវីដ​-១៩ និងការទិញវ៉ាក់សាំង ជំងឺកូវីដ-១៩ សម្តេច​តេជោ ហ៊ុន សែន នាយករដ្ឋមន្ត្រី​កម្ពុជា បានលើកឡើងថា មានមតិមួយចំនួនចង់ឲ្យ​លោក ឆែម សាវុធ សម្រាកពីការងារ ក្រោយពេលរកឃើញថា លោក និងក្រុមគ្រួសារ បានកើតជំងឺកូវីដ-១៩ ។

សម្តេច​តេជោ មានប្រសាសន៍បញ្ជាក់ថា ក្រោយការស្រាវជ្រាវបានបង្ហាញថា លោក ឆែម សាវុធ អគ្គនាយកពន្ធនាគារ នៃក្រសួង​មហាផ្ទៃ​ និងក្រុមគ្រួសារ គឺជាជនរងគ្រោះ ​ដោយសារជំងឺកូវីដ-១៩ ប៉ុណ្ណោះ​។

សូមបញ្ជាក់ថា លោក ឆែម សាវុធ អគ្គនាយពន្ធនាគារ នៃក្រសួង​មហាផ្ទៃ និងមនុស្សពីរ​នាក់​ទៀត​ ដែល​ពាក់ព័ន្ធនឹងក្រុម​គ្រួសារលោកត្រូវបាន​ប្រកាស​ជាសះស្បើយពីជំងឺ​កូវីដ-១៩ នៅថ្ងៃទី១៥ ខែធ្នូ នេះ ។

លោក ឆែម សាវុធ បាន​ធ្វើតេស្តអវិជ្ជមានចំនួន៣​ដង​ និង​ត្រូវ​បានអនុញ្ញាតឱ្យ​ចេញពីមន្ទីរពេទ្យមិត្តភាពខ្មែរ-សូវៀត​។ ចំណែក​អ្នក​ពាក់ព័ន្ធនឹងក្រុម​គ្រួសារ​លោក២នាក់ទៀត បានធ្វើតេស្តអវិជ្ជមានកូវីដ-១៩ ចំនួន២ដង និង​បាន​អនុញ្ញាតឱ្យ​ចេញពីមន្ទីរពេទ្យ​មិត្តភាពខ្មែរ-សូវៀត​ រាជធានី​ភ្នំពេញ៕