សម្តេច​តេ​ជោ ផ្ដល់​អនុសាសន៍​ដើម្បី​កែប្រែ​ឥរិយាបថ​ប្រជាកសិករ ពី​ការ​ធ្វើ​កសិកម្ម​ចិញ្ចឹម​ឆ្នាំង ទៅជា​ការ​ធ្វើ​កសិកម្ម ដើម្បី​ពាណិជ្ជកម្ម

សម្តេច​អគ្គមហាសេនាបតី​តេ​ជោ ហ៊ុន សែន បានជា​អនុសាសន៍​មួយចំនួន ដើម្បី​ជំរុញ​ការអភិវឌ្ឍន៍​វិស័យ​កសិកម្ម​ឱ្យមាន​លក្ខណៈ​ទំនើប ឆ្លើយតប​ទៅនឹង​បរិការណ៍​ប្រែប្រួល​សេដ្ឋកិច្ច​ក្នុង​តំបន់ ព្រមទាំង​វិបត្តិ​សកល​ជំងឺ​កូ​វីដ​១៩ និង​ធានា​បាន​នូវ​ចីរភាព​ផលិតផល​សរុប​ក្នុងស្រុក ជាពិសេស​ការ​កែប្រែ​ឥរិយាបថ​ប្រជាកសិករ ពី​ការធ្វើ​កសិកម្ម ដើម្បី​ចិញ្ចឹម​ឆ្នាំង​ទៅជា​ការធ្វើ​កសិកម្ម ដើម្បី​ពាណិជ្ជកម្ម និង​ដើម្បី​កែប្រែ​កសិករ​ទៅជា​សហគ្រិន​។

មាន​ប្រសា​ស​ន៍​នៅក្នុង​ពិធី​បិទ​សន្និបាត​ក្រសួងកសិកម្ម រុក្ខាប្រមាញ់ និង​នេសាទ នា​រសៀល​ថ្ងៃទី​២៣ ខែមីនា ឆ្នាំ​២០២២​នេះ សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា​បាន​លើក​ឡើងថា ក្រសួងកសិកម្ម​រួមទាំង​ស្ថាប័ន​ពាក់ព័ន្ធ​នានា ត្រូវខិតខំ​អនុវត្ត​គោលនយោបាយ​អភិវឌ្ឍ​វិស័យ​កសិកម្ម ឆ្នាំ​២០២១-២០២៣ ក្រោម​កិច្ចសម្របសម្រួល​ពី​គណៈកម្មការ​គោលនយោបាយ​សេដ្ឋកិច្ច និង​ហិរញ្ញវត្ថុ ដើម្បី​ប្រែក្លាយ​កសិកម្ម​កម្ពុជា ជា​កសិកម្ម​ទំនើប មាន​លក្ខណៈ​ប្រកួតប្រជែង មាន​ភាព​ធន់ នឹង​ការប្រែប្រួល​អាកាសធាតុ និង​មាន​ចីរភាព​។

ក្រសួង ស្ថាប័ន ពាក់ព័ន្ធ​ត្រូវ​រៀបចំ​ផែនការ​សកម្មភាព ដើម្បី​អនុវត្ត​ក្របខ័ណ្ឌ​យុទ្ធសាស្ត្រ និង​កម្មវិធី​ស្ដារ​ជំរុញ​កំណើន​សេដ្ឋកិច្ច​កម្ពុជា ក្នុងការ​រស់នៅ​ជាមួយ​កូ​វីដ​១៩ តាម​គន្លង​ប្រក្រតី​ភាព​ថ្មី​សម្រាប់​ឆ្នាំ​២០២១-២០២៣​។

ជាមួយគ្នា​នោះ ត្រូវ​ពង្រឹង​ការអនុវត្ត​វិធានការ​ការពារ​ដំណាំ និង​ជំរុញ​ការអនុវត្ត​ច្បាប់ ស្ដីពី​ការ​ការពារ​រុក្ខជាតិ និង​ភូតគាម​អនាម័យ​។ ដូច្នេះ​គ្រប់​ក្រសួង ស្ថាប័ន​ពាក់ព័ន្ធ រដ្ឋបាលខេត្ត សមត្ថកិច្ច​គយ និង​រដ្ឋាករ នៅ​ច្រកព្រំដែន​ត្រូវ​សហការ​ជាមួយ​ជំនាញ​អនាម័យ និង​ភូតគាម​អនាម័យ ជំរុញ​ការចុះហត្ថលេខា​លើ​ពិធីសារ​ភូតគាម​អនាម័យ សម្រាប់​នាំចេញ​កសិផល​កសិកម្ម ដែលមាន​តម្រូវការ​ទីផ្សារ និង​ត្រូវ​ពង្រឹងសមត្ថភាព​មន្ទីរ​ពិសោធន៍​ពិនិត្យ​គុណភាព សុវត្ថិភាព​កសិផល និង​ធាតុ​ចូល​កសិកម្ម ស្របតាម​ស្តង់ដារ​ជាតិ និង​អន្តរជាតិ​។

បើ​តាម​សម្តេច​តេ​ជោ ក្រសួង​ស្ថាប័ន​ពាក់ព័ន្ធ ត្រូវ​បន្ត​យកចិត្តទុកដាក់​កសាង​ហេដ្ឋារចនាសម្ព័ន្ធ​គាំទ្រ​ខ្សែ​ច្រវាក់​ផលិតកម្ម​សំខាន់ៗ សំដៅ​ធ្វើ​ឲ្យ​ប្រសើរ​ឡើង​នូវ​ផលិតភាព នៃ​ផ​លលិត​កម្ម​សត្វ បង្កើន​វិនិយោគ និង​ការរៀបចំ​បង្កើត​មជ្ឈមណ្ឌល​បង្កាត់​ពូជ​សត្វ ពង្រឹងសមត្ថភាព​មន្ទី​រ​ពិសោធន៍​វិភាគ​ជំងឺ​សត្វ បង្កើត​ស្ថានីយ​ច​ត្តា​ឡី​ស័ក និង​បង្កើត​មជ្ឈមណ្ឌល​ផលិត​វ៉ាក់សាំង​សត្វ ជាមួយនឹង​ការលើកទឹកចិត្ត​វិស័យ​ឯកជន ដើម្បី​វិនិយោគ​បន្ថែម​នូវ​រោងចក្រ​ផលិត​ចំណី​សត្វ ដើម្បី​កាត់បន្ថយ​ការនាំ​ចូល​ពី​បរទេស​។

ត្រូវ​បន្ត​ជំរុញ និង​លើកកម្ពស់​ការអភិវឌ្ឍ​ន៍​វារីវប្បកម្ម​គ្រប់​រូបភាព​ប្រកបដោយ​ប្រសិទ្ធភាព ស្របតាម​ផែនការ​យុទ្ធសាស្ត្រ​អភិវឌ្ឍ​វារីវប្បកម្ម​២០១៦-២០៣០ ដើម្បី​ធានាបាន​នូវ​ការ​ផ្គត់ផ្គង់​ត្រី​ក្នុងស្រុក និង​នាំចេញ​ប្រកបដោយ​គុណភាព សុវត្ថិភាព នឹង​រក្សាបាន​នូវ​ការប្រកួតប្រជែង​តម្លៃ​ទីផ្សារ​។ ត្រូវ​ពង្រឹងសមត្ថភាព​សហគម​ន៍​នេសាទ អោយក្លាយ​ទៅជា​សហគម​ន៍​នេសាទ ដែល​គ្មាន​បទល្មើស​ជលផល​។

សម្តេច​តេ​ជោ ក៏បានផ្តល់​អនុសា​ស​ន៏​ឲ្យ​ចូលរួម​លើកកម្ពស់​វិស័យ​ឯកជន និង​បង្កើត​តំបន់កសិឧស្សាហកម្ម​កែច្នៃ​សម្រាប់​នាំចេញ និង​ពង្រីក​យន្តការ​អនុវត្ត​ផលិតកម្ម​កសិកម្ម​តាម​កិច្ចសន្យា​ឲ្យ​បាន​កាន់តែ​ទូលំទូលាយ ហើយ​ស្ថាប័ន​ពាក់ព័ន្ធ ក៏ដូចជា​រដ្ឋបាល​ថ្នាក់ក្រោម​ជាតិ​ត្រូវ​សហការគ្នា​ផ្តល់​ឥណទាន​ដល់​សហគ្រាស​កែច្នៃ​កសិផល​ធុន​តូច និង​មធ្យម ហើយ​ត្រូវ​ព​ន្លឿ​ន​ការរៀបចំ និង​កែទម្រង់​រចនាសម្ព័ន្ធ​ដឹកនាំ និង​គ្រប់គ្រង​វិស័យ​កសិកម្ម និង​លើកកម្ពស់​ការស្រាវជ្រាវ​អភិវឌ្ឍ​បច្ចេកវិទ្យា​វិស័យ​កសិកម្ម​តាមបែប​ទំនើប​៕

ដោយ ៖ កោះ​កែវ