ព័ត៌មានជាតិ

សង្កាត់និរោធ មានអ្នកឆ្លងកូវីដកើនដល់ ០៩ នាក់

បានផុស

៤ years មុន

នៅ

ថ្ងៃអង្គារ ១៥ ធ្នូ ២០២០

ដោយ

រកឃើញថែម ០១ នាក់ទៀតនៅព្រឹកនេះ ជាករណីទី ០៩ ជាពលរដ្ឋរស់នៅសង្កាត់និរោធ ដែលអ្នកឆ្លងកូវីដកើនដល់ ០៩ នាក់ ពាក់ព័ន្ធសហគមន៍ ២៨ វិច្ឆិកា។

ការរកឃើញច្រើនបំផុតគឺនៅថ្ងៃ ២៩ វិច្ឆិកា ២០២០ អ្នកឆ្លងរហូតដល់ ០៦ នាក់ ដែលរស់នៅសង្កាត់និរោធ ក្នុងខណ្ឌច្បារអំពៅ។ ថ្ងៃ ៣០ វិច្ឆិកា ២០២០ រកឃើញថែម ០២ នាក់ទៀត។ ការរកឃើញចុងក្រោយគឺនៅថ្ងៃ ១៤ ធ្នូ ២០២០ គឺករណីឆ្លងពីម្តាយមកកូន។ ករណីនេះគឺកុមារអាយុ ០១ ឆ្នាំ ជាកូនប្រុសរបស់ស្រ្តីអាយុ ៣០ ឆ្នាំដែលតេស្តមានវិជ្ជមានកូវីដ ១៩ នៅថ្ងៃ ២៩ វិច្ឆិកា ២០២០ ពាក់ព័ន្ធព្រឹត្តិការណ៍ ២៨ វិច្ឆិកា។ កុមាររូបនេះរស់នៅសង្កាត់និរោធ ខណ្ឌច្បារអំពៅ បានតេស្តលើកទី ៣ ទើបរកឃើញមេរោគកូវីដ ១៩ បច្ចុប្បន្នកំពុងសម្រាកព្យាបាលនៅមន្ទីរពេទ្យមិត្តភាពខ្មែរសូវៀត។

សរុបអ្នកឆ្លងកូវីដ ១៩ ដែលពាក់ព័ន្ធព្រឹត្តិការណ៍សហគមន៍ ២៨ វិច្ឆិកា ២០២០ ពីថ្ងៃ ២៨ វិច្ឆិកា ២០២០ ដល់ ១៤ ធ្នូ ២០២០ មានចំនួន ៤១ នាក់ (ស្រី ១៩ នាក់ និងប្រុស ២២ នាក់)។

យ៉ាងណា អ្នកពាក់ព័ន្ធព្រឹត្តិការណ៍សហគមន៍ ២៨ វិច្ឆិកា ២០២០ ០៣ នាក់ បានជាសះស្បើយ រួមមានលោក ឆែម សាវុធ អគ្គនាយពន្ធនាគារនៃក្រសួងមហាផ្ទៃ និងមនុស្សពីរនាក់ទៀត ដែលពាក់ព័ន្ធនឹងក្រុមគ្រួសារលោកត្រូវបានប្រកាសជាសះស្បើយពីជំងឺកូវីដ១៩ នៅថ្ងៃទី១៥ ខែធ្នូ នេះ។