អភិបាលខេត្តកែប​ អញ្ជើញបិទកិច្ចប្រជុំបូកសរុបលទ្ធផលការងារ របស់មន្ទីរផែនការ

លោកបណ្ឌិត​ សោម​ ពិសិដ្ឋ​ អភិបាល​ នៃគណៈអភិបាលខេត្តកែប នៅថ្ងៃទី ២៥ ខែមីនា ឆ្នាំ ២០២២នេះ​ បានអញ្ជើញជាអធីបតីភាពក្នុងពីធីបិទកិច្ចប្រជុំបូក សរុបលទ្ធផលការងារប្រចាំឆ្នាំ ២០២១ និងលើកទិសដៅការងារឆ្នាំ ២០២២ របស់មន្ទីរផែនការរបស់ខេត្ត​។

​បន្ទាប់ពីលោក​ គង់​ សាវ៉ាត​ ប្រធានមន្ទីរផែនការខេត្ត​ បានធ្វើរបាយការណ៍​ ស្ដីពី ​លទ្ធផលការងារប្រចាំឆ្នាំ ២០២១​ និងទិសដៅអនុវត្តបន្តឆ្នាំ ២០២២​រួចមក​ លោកបណ្ឌិត​ សោម​ ពិសិដ្ឋ​​ អភិបាលខេត្ត បានកោតសរសើរ​ និងវាយតម្លៃខ្ពស់ចំពោះលទ្ធផលការងារ ដែលថ្នាក់ដឹកនាំ​ និងមន្ត្រីរាជការនៃមន្ទីរផែនការខេត្ត​ បានអនុវត្តនាពេលកន្លងមក​។

លោកបណ្ឌិត​ មានប្រសាសន៍បន្តថា​ កិច្ចប្រជុំនេះរៀបចំឡើង ដើម្បីពិនិត្យលទ្ធផលការងារ ដែលសម្រេចបាន បញ្ហាប្រឈម តម្រូវការ និងដំណោះស្រាយលើការងាររបស់មន្ទីរ ដើម្បីបង្ហាញជូនមន្ទីរ អង្គភាពជុំវិញខេត្ត និងអ្នកពាក់ព័ន្ធនានា លើការងារកសាងផែនការអភិវឌ្ឍន៍រយៈពេលប្រាំឆ្នាំ កម្មវិធីវិនិយោគ បីឆ្នាំរំកិលនៅថ្នាក់ក្រោមជាតិ ការប្រមូលទិន្ន័យមូលដ្ឋាន ការងារអត្តសញ្ញាណកម្មគ្រួសារក្រីក និងជនងាយរងគ្រោះ ការរធ្វើជំរឿន អង្កេតនានា ឲ្យបានល្អប្រសើរ និងទាន់ពេលវេលា។

​លោកបានបន្ថែមទៀតថា​ ស្ថិតក្នុងបុព្វហេតុ នៃការរួមចំណែកជាមួយរាជរដ្ឋាភិបាល រដ្ឋបាលខេត្ត និងអ្នកពាក់ពន្ធ័ទាំងអស់ ក្នុងស្មារតីចូលរួមកិច្ចការកសាងផែនការអភិវឌ្ឍន៍រយៈពេលប្រាំឆ្នាំ កម្មវិធីវិនិយោគបីឆ្នាំរំកិលនៅថ្នាក់ក្រោមជាតិ និងសហការសម្របសម្រួលផ្តល់ទិន្នន័យផ្សេងៗ ដើម្បីកំណត់ឲ្យបាននូវចក្ខុវិស័យអភិវឌ្ឍន៍ខេត្ត ក្រុង ស្រុក និងឃុំ សង្កាត់ ប្រកបដោយភាពច្បាស់លាស់ ស្របតាមតម្រូវការជាក់ស្ដែងរបស់មូលដ្ឋាន​ ដើម្បីចូលរួមអភិវឌ្ឍលើកកម្ពស់ជីវភាពរស់នៅ របស់ប្រជាពលក្នុងមូលដ្ឋាន ស្របតាមយុទ្ធសាស្ត្រចតុកោណដំណាក់កាលទី ៤ របស់រាជរដ្ឋាភិបាលកម្ពុជា គោលការណែនាំផ្នែក គោលនយោបាយរបស់ក្រុមប្រឹក្សាខេត្ត និងចក្ខុវិស័យអភិវឌ្ឍន៍ខេត្ត ដើម្បីកាត់បន្ថយភាពក្រីក្ររបស់ប្រជាពលរដ្ឋ៕

អត្ថបទ៖ សេង​ ណារិទ្ធ