សម្ដេចតេជោ ហ៊ុន សែន ៖ ក្នុងឱកាសពិធីបុណ្យចូលឆ្នាំថ្មីនេះ ប្រជាពលរដ្ឋអាចលេងកម្សាន្ដនៅតាមបណ្ដារាជធានី-ខេត្ត

ស​ម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងថា នៅក្នុងពិធីបុណ្យចូលឆ្នាំថ្មី ប្រ​ពៃណីជាតិខ្មែរឆ្នាំនេះ នឹងត្រូវប្រារព្ធធ្វើឡើងវិញ បន្ទាប់ពីខកខានរយៈពេលពីរឆ្នាំ ដោយសារការរាតត្បាតនៃជំងឺកូវីដ-១៩។

សម្ដេចតេជោនាយករដ្ឋមន្ត្រី បានថ្លែងនៅក្នុងពិធីសម្ពោធដាក់ដំណើរការ អគារជំងឺត្រចៀក ច្រមុះ បំពង់កមិត្តភាពកម្ពុជា-កូរ៉េ ក្នុងមន្ទីរពេទ្យព្រះអង្គឌួង នាព្រឹកថ្ងៃទី ២៨ ខែមីនា ឆ្នាំ ២០២២នេះថា ប្រជាពលរដ្ឋ អាចដើរលេងកម្សាន្ដបាន នៅក្នុងពិធីបុណ្យចូលឆ្នាំថ្មី ប្រពៃណីជាតិខ្មែរនាឆ្នាំនេះ នៅតាមបណ្ដារាជធានី-ខេត្តនានា បន្ទាប់ពីជំងឺកូវីដ-១៩ មានការថយចុះ ជាបន្តបន្ទាប់។

បើតាមសម្ដេចតេជោ ហ៊ុន សែន ការដែលប្រទេសកម្ពុជា អាចនឹងរៀបចំពិធីបុណ្យចូលឆ្នាំថ្មី ប្រពៃណីជាតិឡើងវិញនេះ ដោយសារតែប្រជាពលរដ្ឋភាគច្រើន បានចាក់វ៉ាក់សាំងបង្ការជំងឺកូវីដ-១៩ ហើយការទប់ស្កាត់ការរាតត្បាតនៃជំងឺនេះ ក៏មានការថមថយផងដែរ។

ជាមួយគ្នានេះសម្ដេចតេជោ ហ៊ុន សែន ក៏បានឲ្យដឹងដែរថា នៅខេត្តព្រះសីហនុ បន្ទប់សណ្ឋាគារត្រូវបានកក់ស្ទើរតែអស់ ហើយខេត្តសៀមរាប ក៏ជិតអស់ផងដែរ ខណៈប្រជាពលរដ្ឋត្រៀមដើរលេងកម្សាន្ដ នៅក្នុងពិធីបុណ្យចូលឆ្នាំថ្មី នាពេលខាងមុខនេះ។

យ៉ាងណាក៏ដោយសម្ដេចតេជោ ហ៊ុន សែន បានលើកឡើងដែរថា បញ្ហាវិបត្តិនៅអ៊ុយក្រែន-រុស្ស៊ី នឹងធ្វើឲ្យបញ្ហាតម្លៃប្រេងសាំងបន្តឡើងថ្លៃ ហើយក៏នឹងអាចធ្វើឲ្យប៉ះពាល់ខ្លះ ដល់ការចំណាយរបស់ប្រជាពលរដ្ឋ ដែល​គ្រោងដើរលេងកម្សាន្ដ ក្នុងឱកាសពិធីបុណ្យចូលឆ្នាំថ្មី នាពាក់កណ្ដាលខែមេសាខាងមុខនេះ៕

អត្ថបទ៖ ឃួន សុភ័ក្រ