គណបក្សប្រជាជនកម្ពុជាស្រុកឱរ៉ាល់ ចាប់ផ្តើមពង្រឹងរចនាសម្ព័ន្ធថ្នាក់ឃុំ សម្រាប់ត្រៀមការបោះឆ្នោតក្រុមប្រឹក្សាឃុំ-សង្កាត់

គណបក្សប្រជាជនកម្ពុជាស្រុកឱរ៉ាល់ ខេត្តកំពង់ស្ពឺ កាលពីថ្ងៃរសៀលថ្ងៃទី២៧ ខែមីនា ឆ្នាំ២០២២ បានរៀបចំកិច្ចប្រជុំពង្រឹងរចនាសម្ព័ន្ធថ្នាក់ឃុំ នៅមន្ទីរគណបក្សឃុំតាសាល ដើម្បីត្រួតពិនិត្យ លើកផែនការសកម្មភាពឆ្ពោៈទៅការបោះឆ្នោត និងណែនាំបន្ថែមដល់បេក្ខជនដែលឈរឈ្មោះបោះឆ្នោត សម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ ឆ្នាំ២០២២ខាងមុខ។

លោក យឿន យឿត អនុប្រធានក្រុមការងារគណបក្សចុះមូលដ្ឋានស្រុកឪរ៉ាល់ និងជាប្រធានក្រុមការងារចុះជួយឃុំតាសាល ស្រុកឱរ៉ាល់ ខេត្តកំពង់ស្ពឺ ដែលជាអ្នកដឹកនាំកិច្ចប្រជុំនេះ បានលើកឡើងថា ខណៈការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥កាន់តែជិតមកដល់នោះ បេក្ខជនដែលបានឈរឈ្មោះបោះឆ្នោតទាំងអស់ ស្របតាមគណៈកម្មាធិការជាតិរៀតចំការបោះឆ្នោត(គ.ជ.ប.) គប្បីបង្កើនការបម្រើដល់បងប្អូនប្រជាពលរដ្ឋឲ្យបានសកម្មបន្ថែមទៀតដូចជាភ្លៀងរលឹម ដោយមិនត្រូវគិតនិន្នាការ និងរើសអើងជាតិសាសន៍ និងគណបក្សនយោបាយអ្វីនោះឡើយ។

លោកបន្តថា គណបក្សប្រជាជនកម្ពុជានៅតែបន្តឈ្នះភ្លួកទឹកភ្លួកដីដដែល ខណៈគណបក្សប្រជាជនកម្ពុជា បានពុះពារ រួមសុខរួមទុក្ខ និងហែលឆ្លងការលំបាកជាច្រើនជាមួយប្រជាជនកម្ពុជាជាប់រហូតមក ហើយក៏នឹងបន្តរួមដំណើរដ៏វែងឆ្ងាយតទៅមុខទៀត ដើម្បីធ្វើយ៉ាងណាបន្តនិរន្តរភាពនៃសុខសន្តិភាព និងភាពសុខសាន្តជូនប្រជាពលរដ្ឋ។ រហូតដល់មកដល់ពេលនេះ គណបក្សប្រជាជនកម្ពុជាបានចុះឈ្មោះបេក្ខជនរបស់ខ្លួនទាំងពេញសិទ្ធ និងបំរុងចំនួន៦០រូបរួចជាស្ថាបពរហើយ ដោយបេក្ខជនទាំងអស់នោះសុទ្ធតែមានសមត្ថភាពនិងឆន្ទៈមនសិការបំរើប្រជា និងផលប្រយោជន៍រួមទាំងអស់។

សូមជម្រាបជូនថា ការបោះឆ្នោតជ្រើសរើសក្រុមប្រឹក្សាឃុំ-សង្កាត់ នឹងប្រព្រឹត្តទៅនៅថ្ងៃទី០៥ ខែមិថុនាឆ្នាំ២០២២ និងប្រជាពលរដ្ឋមានឈ្មោះក្នុងបញ្ជីបោះឆ្នោតផ្លូវការ ចំនួនជិត១០លាននាក់។ ចំណែក ការិយាល័យដំណើរការរៀបចំការបោះឆ្នោតនាពេលខាងមុខវិញ គឺមានចំនួនជាង២ម៉ឺនការិយាល័យនៃឃុំ-សង្កាត់នៅទូទាំងប្រទេសសរុបចំនួន ១៦៥២ឃុំ-សង្កាត់៕

ដោយ ៖ វណ្ណ សុគន្ធា