រាជរដ្ឋាភិបាល បន្តកម្មវិធីឧបត្ថម្ភសាច់ប្រាក់ដល់គ្រួសារក្រីក្រ ដល់ជុំទី៤

កម្មវិធីឧបត្ថម្ភសាច់ប្រាក់ដល់គ្រួសារក្រីក្រ និងងាយរងគ្រោះ អំឡុងពេលប្រយុទ្ធនឹងជំងឺកូវីដ-១៩ ត្រូវបានរាជរដ្ឋាភិបាល ប្រកាសបន្តជុំទី៤ នៅឆ្នាំដើមឆ្នាំ២០២១ ខណៈកម្មវិធីនេះ បានកាត់បន្ថយផលប៉ះពាល់ដែលបង្កឡើងដោយសារជំងឺកូវីដ-១៩ ដ៏សំខាន់មួយនៅក្នុងប្រទេសកម្ពុជា។

មានប្រសាសន៍ថ្លែងសារផ្ញើជនរួមជាតិ ពាក់ព័ន្ធនឹងស្ថានភាពជំងឺកូវីដ-១៩ និងការទិញវ៉ាក់សាំង ជំងឺកូវីដ-១៩ នាព្រឹកថ្ងៃទី១៥ ខែធ្នូ ឆ្នាំ២០២០នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានលើកឡើងថា រាជរដ្ឋាភិបាលកម្ពុជា នឹងបន្តកម្មវិធីឧបត្ថម្ភសាច់ប្រាក់ដល់គ្រួសារក្រីក្រ និងងាយរងគ្រោះ អំឡុងពេលប្រយុទ្ធនឹងជំងឺកូវីដ-១៩ ជុំទី៤ រយៈពេល៤ខែ ចាប់ពីខែមករា ដល់ខែមីនា ឆ្នាំ២០២១។

សម្តេចតេជោ មានប្រសាសន៍បញ្ជាក់ថា រដ្ឋាភិបាលនឹងពិនិត្យជាក់ស្តែងលើការផ្ដល់ថវិកានេះ ដើម្បីឲ្យប្រជាជនអាចទទួលយកបាន ខណៈមានកម្មវិធីជាច្រើនទៀត សម្រាប់ពលរដ្ឋនៅទីជនបទ។

កម្មវិធីឧបត្ថម្ភសាច់ប្រាក់ដល់គ្រួសារក្រីក្រ និងងាយរងគ្រោះ អំឡុងពេលប្រយុទ្ធនឹងជំងឺកូវីដ-១៩ ដែលធ្វើបានចំនួន៣​ជុំកន្លងមកនេះ ត្រូវបានសម្តេចតេជោ ហ៊ុន សែន នាយករដ្ឋមន្ត្រីកម្ពុជា លើកឡើងថា បានចំណាយថវិកាអស់ប្រមាណ​១៦០លានដុល្លារអាមេរិក ខណៈការផ្ដល់ជំនួយបណ្ដោះអាសន្ននេះ បានអនុវត្តលើពលរដ្ឋជាង ៥៦០.០០០ គ្រួសារ ដែល​កំណត់អត្តសញ្ញាណថា ជាគ្រួសារក្រីក្រ (ក្រ១ និងក្រ២) តាមរយៈកម្មវិធីជាតិ អត្តសញ្ញាណកម្មគ្រួសារក្រីក្រ៕