អាជ្ញាធរជួសជុលផ្លូវក្នុងក្រុងបាវិតជាង ៤គីឡូម៉ែត្រ សម្រួលដល់ការធ្វើដំណើរពលរដ្ឋ

លោក លឹម សៀងហេង អភិបាលក្រុងបាវិត បានចុះត្រួតពិនិត្យការងារជួសជុលផ្លូវលំមួយខែ្ស ប្រវែង៤៥០០ម៉ែត្រ ទទឹង៦ម៉ែត្រ​ ដោយក្រាលថ្មមិច ស្ថិតនៅភូមិព្រៃទប់ និងភូមិច្រកម្ទេស សង្កាត់ច្រកម្ទេស ក្រុងបាវិត នៅថ្ងៃទី២៩ ខែមីនា ឆ្នាំ២០២២ ។

លោក លឹម សៀងហេង បានលើកឡើងថា ក្នុងនាមថ្នាក់ដឹកនាំ តែងតែខិតខំកៀរគរសប្បុរសជននានា ចូលរួមអភិវឌ្ឃហេដ្ឋារចនាសម្ព័ន្ធ តាមមូលដ្ឋានសំដៅធ្វើយ៉ាងណាឲ្យមានការអភិវឌ្ឍរីកចម្រើន ដើម្បីបម្រើផលប្រយោជន៍បងប្អូនប្រជាពលរដ្ឋ ជាពិសេសកម្មកកម្មការីរោងចក្រ ធ្វើដំណើរបានស្រួល ទៅបំពេញការងារដឹកកសិផលបានទាន់ពេលវេលា កាត់បន្ថាយភាពក្រីក្របានមួយកម្រិត។

លោកអភិបាលក្រុងបាវិត ក៏បានអំពាវនាវដល់ប្រជាពលរដ្ឋទាំងអស់ នៅពេលដែលបានទទួលបានសមិទ្ធផលផ្លូវល្អហើយ ត្រូវចេះជួយថែរក្សាផ្លូវនេះ ដើម្បីបានគង់វង្សយូរអង្វែង និងត្រូវបើកបរចេះយោគយល់អធ្យាស្រ័យគ្នាទៅវិញទៅមក ដើម្បីកាត់បន្ថយការគ្រោះថ្នាក់ចរាចរណ៍។

ប្រជាពលរដ្ឋ បានសម្តែងការអគុណចំពោះអាជ្ញាធរក្រុងបាវិត ដែលបានស្ថាបនាជូសជុលផ្លូវក្រាលគ្រួសមួយខ្សែ ដើម្បីសម្រួលក្នុងការធ្វើដំណើរបងប្អូនប្រជាពលរដ្ឋ៕

ដោយ:ភក្ដី