ស្ត្រីម្នាក់ ចេញមុខបំភ្លឺក្រោយមានការផ្សព្វផ្សាយខុសពីការពិត ធ្វើឲ្យប៉ះពាល់ដល់កិត្តិយសរបស់ខ្លួន  

បន្ទាប់ពីមានបណ្តាញសារព័ត៌មានមួយចំនួន បានចេញផ្សាយនូវអត្ថបទមួយថា «សមត្ថកិច្ចឃាត់ខ្លួនស្ត្រីម្នាក់ បញ្ជូនទៅតុលាការពាក់ព័ន្ធករណីឆបោកប្រាក់ដៃគូររកស៊ី» គឺស្ត្រីដែលរងការចោទប្រកាន់នោះ បានចេញមុខប្រតិកម្មយ៉ាងខ្លាំង ចំពោះការចុះផ្សាយដែលផ្សាយខុសពីការពិត ធ្វើឲ្យប៉ះពាល់ដល់កិត្តិយសរបស់អ្នកស្រី។

អ្នកស្រី ជីវ ណារ៉ា ដែលត្រូវគេចោទប្រកាន់ បានថ្លែងប្រាប់អ្នកសារព័ត៌មានថា ការផ្សព្វផ្សាយទាំងនោះបានធ្វើឲ្យប៉ះពាល់ដល់កិត្តិយស និងសេចក្តីថ្លៃថ្នូររបស់អ្នកនាង ដែលជាសាម៉ីខ្លួន។ អ្នកស្រីថា ជុំវិញករណីនេះ គឺមន្ត្រីយុត្តិធម៌មិនបានបញ្ជូនទៅតុលាការ ដូចការចេញផ្សាយនោះទេ គឺគ្រាន់តែសាកសួរនៅត្រឹមក្រសួងមហាផ្ទៃ ដោយលោកស្រី ជីវ ណារ៉ា មិនទាន់ត្រូវបានតុលាការចោទប្រកាន់ នៅឡើយ។ ដូចនេះលោកស្រីមិនមានទោសនោះទេ ហើយភាគីទាំងពីរបានព្រមព្រៀងគ្នា បញ្ចប់វិវាទដោយសន្តិវិធីក្រៅប្រពន្ធ័តុលាការ ដោយមានសាក្សីដឹងលឺត្រឹមត្រូវ។

ជាមួយគ្នានេះដែរ អ្នកស្រីក៏បានបង្ហាញការសោកស្តាយ ចំពោះអ្នកសារព័ត៌មានដែលចេញផ្សាយប្រាសចាកពីការពិត ដោយមិនបានសួរសាម៉ីខ្លួនដោយផ្ទាល់។ អ្នកស្រីថា ការផ្សាយនេះ វាធ្វើឲ្យប៉ះពាល់ដល់សេចក្តីថ្លៃថ្នូរ របស់អ្នកស្រី។ ក្នុងនាមអ្នកស្រី ជាអ្នកជំនួញ ជាសហគ្រិនស្ត្រីមួយរូប ដែលកំពុងតែធ្វើអាជីវកម្ម មានឈ្មោះបោះសំឡេងនៅក្នុងខេត្តសៀមរាប បង្កឲ្យមានការភ្ញាក់ផ្អើលយ៉ាងខ្លាំង ហើយវាមិនត្រឹមតែប៉ះពាល់កិត្តិយសផ្ទាល់ខ្លួនប៉ុណ្ណោះទេ វាថែមទាំងធ្វើឲ្យប៉ះពាល់ដល់អាជីវកម្ម ដែលកំពុងដំណើរការផងដែរ។

សូមរំលឹកផងដែរថា កាលពីថ្ងៃទី ២៤ ខែមីនា ឆ្នាំ ២០២២ ភាគីទាំងពីរបានសម្របសម្រួលគ្នា និងដោះស្រាយដើម្បីបញ្ចប់វិវាទរួចរាល់ហើយ និងបានវិលត្រលប់ទៅប្រកបអាជីវកម្មរបស់ខ្លួនតាមធម្មតា មិនមានបញ្ជូនទៅតុលាការដូចការចេញផ្សាយ នោះទេ៕