សម្ដេចតេជោ បង្ហើបថា ការរុករកប្រេងរបស់កម្ពុជា បានជួបបញ្ហាហើយ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបង្ហើបថា ការរុករកប្រេងក្នុងឈូងសមុទ្ររបស់កម្ពុជា បាននិងកំពុងជួបបញ្ហាមិនមានលទ្ធផល ហើយត្រូវបានគេលួចកប៉ាល់ថែមទៀត។ ប៉ុន្តែយ៉ាងណាក៏ដោយ កម្ពុជាបានរុករករ៉ែមាសបានច្រើនវិញ។

ការលើកឡើង របស់សម្ដេចតេជោ ហ៊ុន សែន ខាងលើនេះ បានធ្វើឡើងក្នុងពិធីសម្ពោធដាក់ឲ្យប្រើប្រាស់ជាផ្លូវការនូវស្ពានអាកាស និងផ្លូវក្រោមដីចោមចៅ នាព្រឹកថ្ងៃទី ៣១ ខែមីនា ឆ្នាំ ២០២២នេះ។

សម្ដេចតេជោនាយករដ្ឋមន្ត្រី បានថ្លែងថា «អារឿងបញ្ហា ការជីកប្រេងនៅឯសមុទ្រនោះ វាបង្កើតបានជាបញ្ហាហើយ ព្រោះអាជីកនោះ វាអត់ផល ថែមទាំងគេលួចអាកប៉ាល់ហ្នឹងថែមទៀត»។

តែទោះជាយ៉ាងណាក៏ដោយ កម្ពុជាបាននិងកំពុងទទួលលទ្ធផល ពីការរុករករ៉ែមាសយ៉ាងច្រើនវិញ។ សម្ដេចតេជោ ហ៊ុន សែន បានឲ្យដឹងថា ក្នុងរយៈពេល ៩ខែ កម្ពុជារុករករ៉ែមាសបានចំនួន ២ ២៧៥គីឡូ៕

អត្ថបទ៖ ឃួន សុភ័ក្រ