សម្ដេចតេជោ ហ៊ុន សែន កំពុងគិតឲ្យក្រសួងសេដ្ឋកិច្ច រៀបចំយុទ្ធសាស្រ្ដស្តុកប្រេងឥន្ធនៈទុក

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានឲ្យដឹងថា សម្ដេច បាននិងកំពុងគិតឲ្យក្រសួងសេដ្ឋកិច្ច រៀបចំយុទ្ធសាស្រ្ដស្តុកប្រេងឥន្ធនៈទុក ដើម្បីត្រៀមលក្ខណៈទុកជាមុន ចំពោះបញ្ហាប្រឈមដែលនឹងអាចកើតមានឡើង នាពេលខាងមុខ។ ការឲ្យដឹង របស់សម្ដេចតេជោនាយករដ្ឋមន្ត្រី បានធ្វើឡើងក្នុងពិធីសម្ពោធដាក់ឲ្យប្រើប្រាស់ជាផ្លូវការនូវស្ពានអាកាស និងផ្លូវក្រោមដីចោមចៅ នាព្រឹកថ្ងៃទី ៣១ ខែមីនា ឆ្នាំ ២០២២នេះ។

សម្ដេចតេជោ ហ៊ុន សែន បានថ្លែងថា «ខ្ញុំកំពុងតែគិតថា ឲ្យក្រសួងសេដ្ឋកិច្ច ហិរញ្ញវត្ថុ រៀបចំស្ដុកយុទ្ធសាស្រ្ដបន្ថែមទៀត ទៅលើបញ្ហាប្រេង ក្រែលោពេលណាមួយនោះ ពីមុនមកយើងផ្អែកទៅលើក្រុមហ៊ុនឯកជន ដើម្បីស្ដុកយុទ្ធសាស្រ្ដ ឥឡូវយើងនៅតែស្ដុកយុទ្ធសាស្រ្ដ ដោយពឹងពាក់លើក្រុមហ៊ុនឯកជនដដែល ក៏ប៉ុន្តែយើងត្រូវបង្កើននូវការស្ដុកទុកនូវប្រេងឥន្ធនៈ ព្រោះឧទាហរណ៍ថា ស្រាប់តែវារីអគ្គិសនីរបស់យើង ឬក៏ម៉ាស៊ីនភ្លើងដើរដោយធ្យូងថ្មរបស់យើង រត់វាមិនគ្រប់ដូចនៅឆ្នាំ ២០១៨»។

សម្ដេចតេជោ ហ៊ុន សែន បានថ្លែងបន្ថែមថា ក្នុងនាមរាជរដ្ឋាភិបាល ត្រូវគិតគូរជុំវិញការបច្ឆេះម៉ាស៊ីនភ្លើង​ដែលដើរដោយប្រេងឥន្ធនៈ ប្រសិនបើជូបបញ្ហាប្រឈមភ្លើងប្រើប្រាស់មិនគ្រប់ ដើម្បីបំពេញតម្រូវការរបស់ប្រជាពលរដ្ឋ ហើយកន្លងមករាជរដ្ឋាភិបាល ក៏បានទិញម៉ាស៊ីនភ្លើងមកដាក់នៅក្បែររាជធានីភ្នំពេញ ដែលមានកម្លាំងរហូតដល់ ៤០០មេហ្គាវ៉ាត់ រួចទៅហើយដែរ។

សម្ដេចតេជោនាយករដ្ឋមន្ត្រី បានលើកឡើបន្តថា «អញ្ចឹងវាមានតម្រូវការប្រេង ដើម្បីនឹងៗបច្ឆេះម៉ាស៊ី​នហ្នឹងឲ្យវាដើរ…អញ្ចឹងពីដំណាក់កាលមួយទៅដំណាក់កាលមួយ តម្រូវវាខុសគ្នា ដូចជាយុទ្ធសាស្រ្ដចតុកោណអញ្ចឹង កាលពីមុនទឹក ផ្លូវ ភ្លើង មនុស្ស ឥឡូវយើងដាក់ទៅជា មនុស្សមុន»៕

អត្ថបទ៖ ឃួន សុភ័ក្រ