ព័ត៌មានជាតិ

ពលរដ្ឋពីរភូមិស្នើឱ្យអាជ្ញាធរបើកផ្លូវលំឡើងវិញក្រោយមានការឈូសឆាយធ្វើកម្មសិទ្ធិ

បានផុស

៣ years មុន

នៅ

ថ្ងៃសុក្រ ១ មេសា ២០២២

ដោយ

នៅព្រឹកថ្ងៃទី១ ខែមេសា ឆ្នាំ២០២២នេះ ផ្ទុះការតវ៉ា បន្ទាប់ពីមានការឈូសឆាយផ្លូវលំសាធារណៈយកធ្វើជាកម្មសិទ្ធិឯកជន ចំណុចព្រំប្រទល់ភ្ជាប់ពីភូមិបឹងជើងទៅកាន់ភូមិកណ្តាល ឃុំមៀន ស្រុកអូររាំងឪ ខេត្តត្បូងឃ្មុំនោះ ទើបលិចចេញនូវការកើតទុកមិនសុខចិត្តពីបងប្អូនប្រជាពលរដ្ឋទាំងពីរភូមិដែលធ្លាប់អាស្រ័យផលលើផ្លូវនេះតាំងពីបុរាណរៀងមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបាត់បង់ប្រយោជន៍រួម ជាផ្លូវសេដ្ឋកិច្ចយ៉ាងសំខាន់ ទៅកាន់ទឹកដីស្រុកកោះសូទិន នៃខេត្តកំពង់ចាម ហេតុនេះ ជំនាញភូមិបាលស្រុក អាជ្ញាធរ ភូមិ ឃុំ ស្រុក មេត្តាជួយសម្រួល ផ្លូវចាស់នេះឲ្យដំណើរការឡើងវិញផង។

បងប្អូនពលរដ្ឋទាំងពីរភូមិបានរៀបរាប់ឲ្យដឹងថា ផ្លូវលំមួយខ្សែនេះតភ្ជាប់ពីភូមិបឹងជើង ទៅភូមិបឹងកណ្តាល ដែលពួកគាត់ខំកសាងបន្តពីបុរាណរៀងមក ស្រាប់តែពេលថ្មីនេះ មានម្ចាស់អចលនទ្រព្យលេខ ៣៨ ចេញដោយមន្ទីររៀបចំដែនដី នគរូបនីយកម្ម និងសំណង់ខេត្តត្បូងឃ្មុំ នៅថ្ងៃទី៩ ខែធ្នូ ឆ្នាំ២០១៩។ ហើយម្ចាស់អចលនវត្ថុយោងវិញ្ញាបនបត្រសម្គាល់នេះ ឈូសឆាយកម្ទេចផ្លូវចោល យកធ្វើជាកម្មសិទ្ធិបាត់ទៅហើយ។

ប្រជាពលរដ្ឋបានបន្តទៀតថា ផ្លូវនេះមានតាំងពីដើមមក នៅឆ្នាំ២០១២ ពួកគាត់បានគ្នាធ្វើដើម្បីសម្រួលដល់ការអាស្រ័យផល ឥលូវស្រាប់តែ ភូមិបាលស្រុក ខេត្ត ផ្តល់នូវភាពស្របច្បាប់ ដោយចេញវិញ្ញាបនបត្រសម្គាល់ឲ្យទៅម្ចាស់កម្មសិទ្ធិដោយរលូនបែបនេះ។

ពួកគាត់បានសំណូមពរដល់អាជ្ញាធរគ្រប់លំដាប់ថ្នាក់មេត្តា ជួយដោះស្រាយ សូមរក្សាផ្លូវចាស់នេះឡើងវិញ និងសូមឲ្យជំនាញចុះមកដើម្បីពិនិត្យមើលទីតាំងដីនេះជាក់ស្តែងផង។ទាក់ទងនិងបញ្ហានេះដែរ លោក យិន ពៅ ប្រធានការិយាល័យភូមិស្រុកអូររាំងឪ បានបញ្ជាក់ថា គាត់មិនបានដឹងទេ បើមានចឹងមែនសូមឲ្យពួកគាត់ដាក់ពាក្យបណ្តឹងមក ដើម្បីឲ្យជំនាញធ្វើការពិនិត្យ និងដោះស្រាយជូនពលរដ្ឋ៕