យុទ្ធនាការ« ផ្ទះ១អំពូល១» នៅស្រុកបន្ទាយស្រីដាក់រួចរាល់ជិត ២០ភូមិ ខណៈជាង ១០ភូមិទៀត កំពុងបន្តរៀបចំ

ភូមិជិត២០ហើយ ដែលរដ្ឋបាលស្រុកបន្ទាយស្រី បានអនុវត្តយុទ្ធនាការ«ផ្ទះ១អំពូល១» ដោយបំពាក់អំពូលសូឡាជូនប្រជាពលរដ្ឋតាមភូមិនីមួយៗ ខណៈជាង១០ភូមិទៀត អាជ្ញាធរកំពុងបន្តរៀបចំ។ ជំនួយដែលរដ្ឋបាលទទួលបានភាគច្រើន គឺបានមកពីការរៃអង្គាសពីសប្បុរសជននានា ទាំងក្នុង និងក្រៅប្រទេស។

លោក ឃឹម ​ហ្វីណង់ អភិបាលស្រុកបន្ទាយស្រី បានប្រាប់ថា តាំងពីបើកយុទ្ធនាការ «ផ្ទះ១អំពូល១» រហូតមកដល់បច្ចុប្បន្ន ក្រុមការងារស្រុក និងប្រជាពលរដ្ឋនៅក្នុងមូលដ្ឋានបានបំពាក់អំពូលប្រមាណ៦០០០អំពូលហើយ ដែលមានភូមិជិត២០បានដាក់រួចរាល់ និងប្រមាណជាង១០ភូមិទៀត កំពុងរៀបចំជាបន្តបន្ទាប់។

លោកអភិបាលស្រុកបានបញ្ជាក់ថា «អំពូលយើងកៀងគរពីសប្បុរសជនទាំងស្រុង យើងមិនប្រើប្រាស់ថវិការដ្ឋទេ។ ការងារនេះ យើងធ្វើដើម្បីជួយបងប្អូនប្រជាពលរដ្ឋ បើថាយើងតម្រូវឱ្យបងប្អូនយើងចេញប្រាក់នោះ គឺមិនតម្រូវទេ តែបើបងប្អូនប្រជាពលរដ្ឋគាត់ស្មគ្រ័ចិត្តទិញដាក់ម្នាក់ៗ ដើម្បីចូលរួមជាមួយអាជ្ញាធរ នោះក៏ជារឿងដ៏ល្អ តែយើងឃើញថា សព្វថ្ងៃពួកគាត់បានជួយទៅលើដងអំពូលរួចហើយ អ្នកខ្លះគាត់ប្រើជាបង្គោលគ្រាក អ្នកខ្លះគាត់ប្រើបង្គោលដែក»។

លោក ឃឹម ហ្វីណង់ បានបន្តថា អំពូលដែលបានដាក់បំពាក់នៅតាមភូមិនីមួយៗ គឺមានប្រភេទអំពូលខុសៗគ្នា ដោយនៅតាមតំបន់ទីប្រជុំជនប្រើអំពូលធំ ដែលមានតម្លៃប្រមាណ ៤០ទៅ ៥០ដុល្លារ ហើយនៅតាមតំបន់ធម្មតាប្រើអំពូលខ្នាតតូច ដែលតម្លៃមួយប្រមាណ ៣០ដុល្លារ។

លោក ឃឹម ហ្វីណង់ បានបង្ហោះសារនៅលើទំព័រហ្វេសប៊ុកថ្ងៃទី៣១ ខែមីនាដូច្នេះថា យុទ្ធនាការ«ផ្ទះ១អំពូល១» បានដាក់បំពាក់ទៅដល់គ្រប់ឃុំ​ទាំងអស់ នៅក្នុងស្រុកបន្ទាយស្រីរួចហើយ គ្រាន់តែឃុំខ្លះបានគ្រប់ភូមិ ហើយឃុំខ្លះទៀតមិនទាន់បានគ្រប់ភូមិនៅឡើយ។ ភូមិដែលស្ថិតនៅជាប់នឹងផ្លូវជាតិ ផ្លូវកៅស៊ូ ឬផ្លូវបេតុង ដែលមានចរាចរណ៍ឆ្លងកាត់ច្រើន ត្រូវបានផ្តល់អាទិភាពមុនគេ៕