ក្រសួងឲ្យប្រយ័ត្នចំពោះការវាយប្រហាររបស់ឧក្រិដ្ឋជន តាមប្រព័ន្ឋតេឡេក្រាម

ក្រសួងប្រៃសណីយ៍ និងទូរគមនាគមន៍ បានចេញសេចក្តីជូនដំណឹងឲ្យមានការប្រុងប្រយ័ត្ន ចំពោះការវាយប្រហាររបស់ឧក្រិដ្ឋជន តាមប្រព័ន្ឋតេឡេក្រាម ដែលកំពុងកើតមានគួរឲ្យកត់សម្គាល់។

ក្នុងសេចក្តីជូនដំណឹងបានឲ្យដឹងថា ឧក្រិដ្ឋជន បានធ្វើការវាយប្រហារក្រោមទម្រង់ជាការក្លែងបន្លំឈ្មោះ​ថ្នាក់ដឹកនាំក្នុងជួររាជរដ្ឋាភិបាល ឬឈ្មោះបុគ្គលដ៏ទៃទៀត ដើម្បីបញ្ជួនមេរោគតាមសារក្នុងកម្មវិធីតេឡេក្រាម សម្រាប់បោកបញ្ឆោតអ្នកប្រើប្រាស់ ដែលគេបានកំណត់មុខសញ្ញា។

ក្រសួងបានក្រើនរំលឹកថា ដើម្បីជៀសវាងការធ្លាក់ទៅក្នុងអន្ទាក់បោកប្រាស់របស់អ្នកវាយប្រហារ អ្នកប្រើប្រាស់តេឡេក្រាម គួរតែផ្ទៀងផ្ទាត់ និងត្រួតពិនិត្យគណនីរបស់បុគ្គលដែលបានផ្ញើសារមក ឲ្យបានច្បាស់លាស់ ហើយក្នុងករណីសង្ស័យ អ្នកប្រើប្រាស់គួរតែទូរសព្ទទៅសាកសួរម្ចាស់គណនីដោយផ្ទាល់តែម្ដង៕