ក្រសួងត្រៀម​ឈាម​១ពាន់ប្លោក​ដើម្បី​ជួយ​សង្គ្រោះ​បន្ទាន់​ដល់ជន​រងគ្រោះ​ក្នុងឱកាស​បុណ្យ​ចូលឆ្នាំ​ខ្មែរ​ខាងមុខ

ក្រសួងសុខាភិបាល​ត្រៀមឈាមប្រមាណ​១ ពាន់ប្លោក​ប្លោកដើម្បីជួយសង្គ្រោះ​បន្ទាន់ដល់​ជនរង​គ្រោះ​ដែលត្រូវការឈាម​ជាចាំបាច់ដោយសារតែពិធីបុណ្យចូល​ឆ្នាំខ្មែរមានអត្រាគ្រោះ​ថ្នាក់ចរាចរណ៍​ខ្ពស់ក្នុងចំណោមពិធីបុណ្យធំៗនៅប្រទេស​កម្ពុជា។

​លោកវេជ្ជបណ្ឌិត​ សុខ ប៉ូ ​ប្រធានមជ្ឈមណ្ឌលជាតិផ្តល់ឈាម​បានមានប្រសាសន៍នៅព្រឹកថ្ងៃទី ៥​ មេសានេះថា ​ការត្រៀម​ឈាមប្រមាណ១ពាន់ប្លោក​នេះដោយសារនៅឆ្នាំនេះ​រាជរដ្ឋាភិបាល​បានរៀប​ចំពិធីបុណ្យចូលឆ្នាំប្រពៃណីជាតិខ្មែរ​ឡើងវិញបន្ទាប់ពីបានផ្អាកអស់រយៈ​ពេល២ឆ្នាំដោយ​សារការ​រាតត្បាតជំងឺកូវីដ១៩។

​លោកវេជ្ជបណ្ឌិត​ រំពឹងថាដូចនេះ​ នៅឆ្នាំនេះអាចនឹងមានប្រជាពលរដ្ឋ​ធ្វើដំណើរទៅកម្សាន្ត​នៅតាម​រមណី​ដ្ឋាននានានិងស្រុកកំណើតច្រើនជាបណ្តាឆ្នាំកន្លងទៅ។

​លោកវេជ្ជបណ្ឌិត​ បានបន្តថា ​ក្នុងចំណោមឈាម​ប្រមាណ១ពាន់ប្លោក​ក្នុងនោះនៅរាជធានីភ្នំពេញ​មជ្ឈមណ្ឌលជាតិផ្តល់ឈាម​បានត្រៀមប្រមាណ៥០០ប្លោក​និងខេត្តចំនួន៤ដែលមាន​ធនាគារឈាម​រួមមាន​ខេត្តបាត់ដំបង សៀមរាប តាកែវនិងកំពង់ចាមបានត្រៀមក្នុងមួយខេត្តៗចំនួន១០០ប្លោក។ចំណែកខេត្តផ្សេងៗទៀតក៏បានត្រៀមឈាមនៅតាមមន្ទីរពេទ្យខេត្តរបស់ខ្លួនប្រមាណ២០ប្លោកផងដែរ។

​លោកវេជ្ជបណ្ឌិតបានបន្តទៀតថា​ប៉ុន្តែក្នុងករណីមានតម្រូវការឈាមច្រើនខេត្តទាំងអស់​អាចស្នើសុំមកខេត្តទាំង៤ខាងលើ​ឬមកមជ្ឈមណ្ឌលជាតិផ្តល់ឈាម​ដើម្បីឲ្យមន្ទីរពេទ្យ​មានលទ្ធភាព​គ្រាប់គ្រាន់ក្នុង​ការជួយសង្គ្រោះដល់ជនរងគ្រោះឲ្យបានទាន់​ពេលវេលាទាក់ទិន​នឹងជំងឺមួយ​ចំនួន​ដូចជា​ការហូរឈាមតាមប្រដាប់រំលាយអាហារ ការវះកាត់ជំងឺបេះដូង គ្រោះថ្នាក់ចរាចរណ៍ ការហូរ​ឈាម​មិនប្រក្រតីនៅមុននិងក្រោយពេលសំរាលកូន ជំងឺខ្សោយតំរង់នោមនិង​ការព្យាបាល​ថែទាំជំងឺ​មហារីកជាដើម។

​លោកវេជ្ជបណ្ឌិត​បានបន្ថែមទៀតថា​នៅក្នុងឱកាសពិធីបុណ្យចូលឆ្នាំខាងមុខនេះសូម​បងប្អូន​ប្រជា​ពលរដ្ឋ​ត្រូវគោរពច្បាប់ចរាចរណ៍ទាំងអស់គ្នាដើម្បីកាត់​បន្ថយគ្រោះថ្នាក់ចរាចរណ៍ហើយនៅពេល​ដែលអត្រាគ្រោះថ្នាក់ចរាចរណ៍ត្រូវបានកាត់បន្ថយវាក៏នឹងជួយកាត់បន្ថយការប្រើប្រាស់ឈាមផងដែរដោយបង្វិលឈាមទាំងនោះទៅជួយដល់អ្នកជំងឺដែលត្រូវការឈាមជាចាំបាច់។

​លោកវេជ្ជបណ្ឌិតបានអំពាវដល់​ប្រជាពលរដ្ឋខ្មែរទូទាំងប្រទេសជាពិសេសក្រុម​យុវជន​បន្តចូលរួម​បរិច្ចាគ​ឈាមឲ្យ​បានគ្រប់ៗ​គ្នាដើម្បីជួយសង្គ្រោះដល់​ជនរងគ្រោះដែលត្រូវការឈាម​ឲ្យបានទាន់​ពេល​វេលាខណៈបច្ចុ ប្បន្នការផ្តល់អំ ណោយឈាមដោយស្ម័គ្រចិត្តនៅមាន​ចំនួនតិចតួចនៅឡើយ​ដែលតម្រូវឲ្យក្រុមគ្រួសារឬសាច់ញាតិរបស់អ្នកជំងឺផ្តល់ឈាមជំនួស។

​គួរបញ្ជាក់ថាបច្ចុប្បន្ននេះកម្ពុជាតម្រូវការឈាមនៅទូទាំងប្រទេសសម្រាប់ជួយសង្គ្រោះជនរងគ្រោះមានការកើនឡើងពី ២៥០ទៅ ៣០០ប្លោកក្នុង១ថ្ងៃ ខណៈការបរិច្ចាគឈាម​ដោយស្ម័គ្រចិត្ត​មានត្រឹម​១០​ភាគរយប៉ុណ្ណោះ៕

អត្ថបទ៖ សំអឿន