អង្គការសហប្រជាជាតិ ជំរុញការប្រើប្រាស់ប្រព័ន្ធឌីជីថល និងការវិនិយោគធនធានមនុស្សនៅកម្ពុជា

លោកស្រី ប៉ូលីន ថាំមីស៊ីស (Pauline Tamesis) ប្រធានសម្របសម្រួលអង្គការសហប្រជាជាតិប្រចាំនៅកម្ពុជា បានជម្រាបជូនសម្ដេចតេជោ ហ៊ុន សែន ថា អង្គការសហប្រជាជាតិប្ដេជ្ញាចិត្តបន្តគាំទ្រកម្ពុជាលើការវិនិ​យោគវិស័យធនធានមនុស្ស ជំរុញការប្រើប្រាស់ប្រព័ន្ធឌីជីថល និងការប្រែប្រួលអាកាសធាតុ និងសេដ្ឋកិច្ចបៃតង។ លោកស្រី ប៉ូលីន ថាំមីស៊ីល លើកឡើងបែបនេះនៅក្នុងជំនួបសម្តែងការគួរសម និងជម្រាបលាសម្តេចតេជោ ហ៊ុន សែន​ នៅព្រឹកថ្ងៃទី០៧ ខែមេសា ឆ្នាំ ២០២២ នៅវិមានសន្តិភាព។

ក្រៅពីលើកឡើងពីបញ្ហានេះ លោកស្រី ថាំមីស៊ីល បានវាយតម្លៃខ្ពស់ចំពោះភាពជាដៃគូល្អ កិច្ចសហប្រតិបត្តិការល្អ ការប្ដេជ្ញាខ្ពស់ចំពោះពហុភាគីនិយម ការចូលរួមចំណែកក្នុងការរក្សាសន្តិភាព ស្ថេរភាពពិភពលោក និងការដឹកនាំប្រកបដោយប្រសិទ្ធភាពក្នុងការប្រយុទ្ធប្រឆាំងនឹងការរីករាលដាលនៃជំងឺកូវីដ-១៩។ លោកស្រីបានគូសបញ្ជាក់ថា ទាំងអស់នេះ សុទ្ធសឹងជាភាពជោគជ័យរបស់កម្ពុជាដែលជាគំរូមិនត្រឹមតែសម្រាប់ប្រទេសនានានោះទេ ប៉ុន្តែជាបទពិសោធន៍ដែលអាចយកទៅប្រើប្រាស់បាននាពេលអនាគតផងដែរ។

ចំពោះបញ្ហាឆ្លងរាលដាលនៃជំងឺកូវីដ១៩នៅក្នុងប្រទេសកម្ពុជានេះ សម្ដេចតេជោនាយករដ្ឋមន្ត្រី បានជម្រាបជូនលោកស្រី ប៉ូលីន ថាំមីស៊ីល ថា រាជរដ្ឋាភិបាលកម្ពុជាបានប្រើយុទ្ធសាស្ត្រផ្ការីកសម្រាប់ប្រយុទ្ធប្រឆាំងទប់ស្កាត់ការឆ្លងរីករាលដាលនៃជំងឺកូវីដ-១៩ កម្ពុជាជាមួយការបន្តយកចិត្តទុកដាក់លើកិច្ចគាំពារសង្គម និងវិស័យសុខាភិបាលជាដើម៕