ក្រសួង​​កំណត់​ពេល​​៣ខែ​ឱ្យ​​បញ្ចប់​ការ​សិក្សា​ផ្លូវ​ល្បឿន​លឿន​​ភ្នំពេញ​បាវិត​​

ក្រសួង​សាធារណការ​ និង​ដឹក​ជញ្ជូន​​ បាន​​កំណត់​ពេល​៣ខែ​​​​ឱ្យ​​បញ្ចប់​ការ​សិក្សា​គម្រោង​​សាង​សង់​ផ្លូវ​​ល្បឿន​លឿន​​ភ្នំពេញ​បាវិត​​។​ ​

កិច្ចប្រជុំពិនិត្យមើលគម្រោងសិក្សាផ្លូវល្បឿនលឿនតភ្ជាប់ពីរាជធានីភ្នំពេញទៅក្រុងបាវិតរបស់ក្រុមហ៊ុន China Railway International Group Co., Ltd ដឹកនាំដោយ​លោក​​រដ្ឋលេខាធិការ សូរ វ៉ិច​ទ័រ នៅទីស្តីការក្រសួង​ប្រជុំ​ពិនិត្យ​មើល​គម្រោង​សិក្សា​ផ្លូវ​ល្បឿន​លឿន​តភ្ជាប់​ពី​រាជធានីភ្នំពេញ​ទៅ​ក្រុងបាវិត​របស់ក្រុមហ៊ុន China Railway International Group Co., Ltd ដោយ​មាន​ការ​ចូល​រួម​ពី​តំណាង​ក្រុមហ៊ុនសិក្សា តំណាងក្រុមហ៊ុនរ៉ូយ៉ាល់គ្រុប និងក្រុមការងារបច្ចេកទេសរបស់ក្រសួង​កាល​​ពី​ថ្ងៃ​ទី​៧ ខែ​មេសា​ ​ឆ្នាំ​២០២២​​។

កិច្ចប្រជុំនេះផ្តោតជាសំខាន់លើការពិភាក្សាអំពីការកំណត់ពេលវេលាជាក់លាក់ឱ្យក្រុមហ៊ុនបញ្ចប់របាយការណ៍សិក្សារបស់ខ្លួនប្រកបដោយលក្ខណៈគ្រប់ជ្រុងជ្រោយ ត្រឹមត្រូវតាមបទដ្ឋាន និង​មាន​គុណភាពដែលអាចទទួលយកមកពិនិត្យ និងវាយតម្លៃជារួមបាន។

ថ្លែងក្នុងកិច្ចប្រជុំនាឱកាសនោះ លោក​អគ្គលេខាធិការបានកំណត់ពេលវេលាចំនួន៣ខែ ដើម្បី​ឱ្យ​ក្រុម​ហ៊ុន​ធ្វើការសិក្សា ពិនិត្យ និងកែសម្រួលលទ្ធផលនៃការសិក្សារបស់ខ្លួន ឬ​សិក្សា​បន្ថែម​ដើម្បី​ផ្ដល់របាយការណ៍​ដែលមានលក្ខណៈគ្រប់ជ្រុងជ្រោយជាងមុន និង​បាន​ជំរុញ​ឱ្យ​ក្រុមហ៊ុន​ធ្វើ​យ៉ាង​ណា​បញ្ចប់​ការសិក្សារបស់ខ្លួនឱ្យបានលឿន និងទាន់ពេលវេលាដែលបានកំណត់ ដើម្បី​ឈាន​ទៅ​ការ​ចាប់​​ផ្ដើម​គម្រោង​សាងសង់​ផ្លូវ​ល្បឿន​លឿន​ភ្នំពេញបាវិតក្នុង​ពេលវេលា​ឆាប់ៗ​តាម​អនុសាសន៍​ណែនាំ​ដ៏​ខ្ពង់ខ្ពស់​របស់រាជរដ្ឋាភិបាល៕