លោក លី ធុជ ៖ កម្ពុជា ប្រកាសប្ដេជ្ញាចែក​រំលែកបទពិសោធការងារដោះមីនដល់បណ្តាប្រទេសនានាលើលោក

តាមរយៈចក្ខុវិស័យដឹកនាំរបស់រាជរដ្ឋាភិបាល លោក លី ធុជ អនុប្រធានទី១អាជ្ញាធរមីនបានលើកឡើថា កម្ពុជាបានទទួលមេរៀនគ្រប់បែបយ៉ាង និងបទពិសោធយ៉ាងច្រើនលើការងារបោសសម្អាតមីន។ លោកទេសរដ្ឋមន្ត្រី បន្តថា កម្ពុជាប្ដេជ្ញាចូលរួមចែករំលែកបទពិសោធទាំងនេះទៅដល់ប្រជាជន និងបណ្តាប្រទេសក្នុងតំបន់ និងពិភពលោកដែលត្រូវការចាំបាច់នូវការងារបោសសម្អាតមីននេះ។

លោក លី ធុជ អនុប្រធានទី១អាជ្ញាធរមីនបានលើកឡើងបែបនេះ កាលពីរសៀលថ្ងៃទី០៧ ខែមេសា ឆ្នាំ ២០២២ ក្នុងជំនួបពិភាក្សាការងារជាមួយលោកស្រី អាមេលីតា អាព្យូណូ (Amelita Aquino) ឯកអគ្គរដ្ឋទូតហ្វីលីពីនប្រចាំនៅកម្ពុជា និងគណៈប្រតិភូសកម្មភាពមីនប្រទេសហ្វីលីពីន នៅទីស្ដីការអាជ្ញាធរមីន ដើម្បីស្វែងយល់អំពីការគ្រប់គ្រងវិស័យសកម្មភាពមីននៅកម្ពុជា។

លោកទេសរដ្ឋមន្ត្រី លី ធុជ បានលើកឡើងអំពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការដោះស្រាយបញ្ហាមីន និងសំណល់ជាតិផ្ទុះពីសង្រ្គាមក្រោយទទួលបានជ័យជម្នះពីរបបប្រល័យពូជសាសន៍ខ្មែរក្រហម ជាពិសេសការទទួលបាននូវសុខសន្តិភាពពេញលេញក្រោមគោលនយោបាយឈ្នះ ឈ្នះ របស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ។

អនុប្រធានអាជ្ញាធរមីនរូបនេះ បានគូសបញ្ជាក់ថា សមិទ្ធផលសម្រេចបានរយៈពេល ៣០ឆ្នាំនេះ បានមកពីការយកចិត្តទុកដាក់ និងការចូលរួមគាំទ្រពីដៃគូរអភិវឌ្ឍន៍ និងប្រទេសជាមិត្ត ដែលបានរួបរួមគ្នាដោះស្រាយក្នុងការផ្តល់ដីមានសុវត្ថិភាព និងការកាត់បន្ថយគ្រោះថ្នាក់ដោយសារមីន។ លោកទេសរដ្ឋមន្ត្រី បានបន្តថា រាជរដ្ឋាភិបាលកកម្ពុជា ក៏បានដាក់ចេញនូវចក្ខុវិស័យដឹកនាំ និងរចនាសម្ព័ន្ធគ្រប់គ្រងរឹងមាំ ទាំងថ្នាក់ជាតិ និងថ្នាក់ក្រោមជាតិដែលមានអាជ្ញាធរមីនជាសេនាធិការ ៕

ដោយ៖ ធឿន វ៉ាន់សុង