កសិដ្ឋានគិរីសួគ៌ កំពុងផលិតទឹកដោះគោ​កម្រិតខ្ពស់​បានចំនួន ​១២.០០០លីត្រ ក្នុងមួយថ្ងៃ

កសិដ្ឋានគិរីសួគ៌ កំពុងផលិតទឹកដោះគោកំរិតខ្ពស់ ចំនួន ១២.០០០ លីត្រក្នុងមួយថ្ងៃ ក៏ដូចជាទឹកដោះគោជូរ និងផលិតផលឆ្ងាញ់ផ្សេងៗទៀត។

កាលពីពេលថ្មីៗនេះ ឯកអគ្គរាជទូតអូស្ត្រាលីប្រចាំកម្ពុជាលោក Pablo Kang និងលោកស្រី Rebecca Ball  ស្នងការពាណិជ្ជកម្មជាន់ខ្ពស់អូស្ត្រាលី បានទៅទស្សនា កសិដ្ឋានគិរីសួគ៌ Kirisu Farm ដើម្បីមើលគោ Holstein មួយចំនួន ក្នុងចំណោមគោ៥៥០ ក្បាល ដែលនាំមកពីប្រទេសអូស្ត្រាលី ដើម្បីចាប់ផ្តើមផលិតទឹកដោះគោក្នុងស្រុកខ្នាតធំដំបូងគេរបស់កម្ពុជា និងមានឱកាសបានភ្លក់រសជាតិទឹកដោះគោដែលមានរសជាតិឆ្ងាញ់នេះផងដែរ។

តាមរយៈកម្មវិធី CAVAC បានបន្តជួយដល់កសិដ្ឋានគិរីសួគ៌ ក្នុងការផលិតផលទឹកដោះគោ ឱ្យកាន់តែប្រសើរឡើង ដើម្បីទទួលបានវិញ្ញាបនបត្រប្រព័ន្ធសុវត្ថិភាពចំណីអាហារអន្តរជាតិ (FSSC) ២២០០០ និងបានភ្ជាប់កសិដ្ឋានជាមួយកសិករក្នុងស្រុក ដើម្បីជួយដាំដុះចំណីគោ។

ការបង្កើនលទ្ធភាពក្នុងការរកបានទឹកដោះគោមានគុណភាពខ្ពស់ ដែលផលិតក្នុងស្រុក និងជួយលើកកម្ពស់អាហារូបត្ថម្ភ និងការអភិវឌ្ឍន៍សុខភាពរបស់កុមារកម្ពុជា។

ចំពោះកូនគោចំនួន ៩០០ ក្បាលដែលបានកើត នៅក្នុងប្រទេសកម្ពុជា ចាប់តាំងពីការដំណើរការផលិតផលទឹកដោះគោមក លោកឯកអគ្គរាជទូត សង្ឃឹមថា នឹងឃើញឧស្សាហកម្មទឹកដោះគោដ៏ជោគជ័យមួយនេះ បន្តរីកចម្រើននៅទីនេះ ជាមួយនឹងកេរ្តិ៍ដំណែលរបស់ប្រទេសអូស្ត្រាលី៕

អត្ថបទ៖ ទូន សុផល